今日系星期一,相信有好多學生都會系呢日無曬精神因為今日系一星期既開始要返學。
而我無曬精神既原因並唔系咁,而系尋日發生既事。
今朝早我六點就起左身,因為我發現自己已經面對唔到Amy。
我洗完面換好曬校服就出左門口諗住食個早餐,順便打埋個電話嘈醒阿輝落黎陪我。
「喂,阿輝你依家可唔可以落黎陪我食個早餐跟住順便一齊返學?」我問佢。
「嗯.....好阿.....」聽得出阿輝系未訓醒,但系佢都肯落黎。


過左差唔多三個字,我見到阿輝系佢大廈門口走出黎。
我地一路行既時候都無講到嘢,睇黎阿輝都系睇得出我唔開心。


因為太早既關係好多地方都無開門,所以我地都系去頹M食個通粉就算。
叫完嘢食坐低之後阿輝就開口:「點吖老友,究竟發生左咩事?」
「我尋日揾左機會去馬,最後食左個檸檬,佢話自己有中意既人wor。」我了無生氣咁講。
「咁吖.....你依家諗住點?」阿輝問我。
「我都唔知點好,依家個腦好亂,我唔明點解佢可以當無事發生咁樣。」我一次過講曬我既諗法出黎。
「睇開啲啦,我平時見到同佢friend既男仔得你一個咋wor,我覺得佢系有啲苦衷既。」
「你依家都唔好咁頹啦,平常心面對啦。」阿輝講。
雖然話就話平常心面對,但系正常面對住一個請自己食檸檬既女仔邊個接受到?




返到學校之後,一切都好似平常咁樣,只系我同Amy既關係已經變左質。
過左一陣之後,Amy都返到學校。
「早晨吖阿言。」佢都系同平時一樣好開朗。
但系我仍然接受唔到個日既事,所以都系輕輕咁答:「哦。」
今日成日我一句聲都無出到,Amy見到我咁樣之後都無點撩我講嘢。


話咁快就到左放學時間,班籃既日子都就黎到,所以就去左練波。
阿輝見到我個死老豆樣就行過黎問我:「點吖你?仲頹緊阿?」
「成日都無同Amy講過嘢啦,其實我都唔想咁樣。」我都想好想好似以前咁同佢相處。


「講經咩,過黎挑波啦,成日系到頹乜姐。」佢拋左個籃球比我。
咁又啱既,食檸檬姐,唔應該咁樣繼續頹落去。
「怕你阿,過黎one on one !」
就系咁樣,我地挑波挑到夜晚。
「頂你....個肺吖....今日你咁鬼長氣既,21分打大半個鐘。」鬥完波之後,我已經斷曬氣咁款,成個人攤左系地下。
「你都唔差啦...我都好耐未試過一場波挑咁耐。」阿輝又攤左系我隔黎。
或者,我唔應該咁執著系個啲事情上,而系應該去繼續向前行。


我打完波時間都差唔多八點,我慢慢咁行返屋企,諗緊一陣點樣同Amy講返嘢好。
行到屋企樓下之後,我見到兩個人。
系Amy同一個阿叔,睇個樣似系佢爸爸。
個個阿叔遞左封信比Amy睇之後Amy好大力咁打左佢一下之後就跑左入大廈大堂入面。
個阿叔都滿面憂愁咁另轉頭走左去。
我跟住Amy入左同一架𨋢入面,我見佢都好唔開心咁樣。


「你無嘢吖嘛?」我問佢。
「無嘢....我同我阿爸成日都系咁嘈交架啦....」原來個個阿叔真系佢阿爸。
「唔好唔開心啦,最多一陣我衝完個涼帶你去食好野!」我想佢開心返。
「好阿!你話架,唔準反口wor。」一講到食佢就成個人開心曬,唔知點解我見到佢咁開心,我自己又會跟住佢咁開心。 





今日太攰啦,所以寫得好差,過幾日會出篇再好啲既。
未follow我ig記得follow啦!
ig name: batmit_yin
已有 0 人追稿