我突然間多咗個妹: 春天來臨了嗎?(中)

話就話同Priscilla互相坦白咗，修補咗關係，但係...我而家應該點看待佢好呀!?當佢係一個普通女仔吖，定係當佢真係我呀妹咁呀?我唔想當佢係普通女仔，因為咁樣就會失去咗佢喺我心目中作為呀妺嘅意義，身為一個妹控當然係將呀妹放喺第一位啦。但係既然我做得佢呀哥，放得佢喺第一位，又係咪應該要聽佢講，當佢係女同學咁看待呢?即係我如果當佢係呀妹，就唔應該有其他諗法。但係我唔當佢係其他女仔咁，佢又唔鍾意。於是乎，呢個問題嘅矛盾存在咗喺我個心裏面已經個幾禮拜，仲有差唔多半個月就會比賽喇。我仲處於一個掙扎嘅狀態，然而，Priscilla就因為解開咗心結而主動咗搵我，仲比以前更加痴我。係因為我當咗佢係女仔吖定係我諗多咗呢?點解，Priscilla好似唔係用緊一個妹嘅方式去親近我，而係女朋友咁嘅?唔得架...雖然我唔鍾意呀明，但係唔可以橫刀奪愛架!
「咳...Hmm...Priscilla，你呢排做咩咁痴我嘅?」
「你唔鍾意咩?」當然啦，我想全心全意當佢係呀妹咁看待架嘛，Priscilla而家咁樣好快就會失去佢嘅妹屬性魅力架喇。但係我咁夠膽講得出口，我真係唔想因為做錯決定而再一次同佢疏遠喇。
「都唔係唔鍾意嘅...不過...即係咁...就好少呢...有一個妹呢...下，你明啦...哈哈...咁樣對個呀哥嘅...就除非你係兄控啦。」
「你好煩呀，唔同你傾計又叫嬲咗你，痴住你你又唔鍾意，咁你想我點呀...妖!!!」
「Priscilla!!!」...頂佢又跑去邊呀，小息就嚟完喇...
「Vincent，你唔鍾意Priscilla咩?」
「你指邊種鍾意先...」
「男...男女...朋友嗰...嗰種...」
「梗係唔會啦，佢係我呀妹嚟架嘛!」


「真...真架?」
「你做咩突然咁問呀?」
「冇...冇嘢，你哋好似忽冷忽熱咁，我以為你哋拍拖嗌交啫...」
「點解個個都會覺得我同Priscilla拍拖架，佢有男朋友架喇。Beverly，你係咪有嘢瞞住我?」
「冇...冇呀...」佢就好似隻鵪鶉咁笑，真係好奇怪，唔通佢真係有嘢瞞住我?

嗰日之後，好慶幸Priscilla再冇好似之前咁痴住我，但同時佢又少咗同我講嘢喇，希望佢冇嬲咗我啦。
而Beverly就開始多咗同我傾計，又好似多咗關心我咁，除咗喺練舞嗰陣成日幫我遞水遞毛巾之外，有次仲幫我整埋飯盒。嘩，有免費午餐食，你唔係唔食呀?
日子一日一日咁過，終於去到比賽前一日最後嘅練習。面對Priscilla嘅冷漠，我真係忍唔住喇。
「Priscilla!」


「做咩?」
「我有好多嘢想同你講。」
「?」
「其實我真係好鍾意Priscilla你，但係我真係好想你明白，我想全心全意當你係呀妹咁看待，因為，你作為我嘅呀妹，比起任何人更加重要，我係將作為妹嘅你永遠放喺第一位。」唔好同我講我整喊咗佢呀...
「其實我知架，我真係知架!我理解你對於妹嘅熱愛，亦明白你重視妹勝過任何其他女性角色呀，但係我真係好唔甘心，好唔甘心原來我喺你心目中永遠就只會係一個長唔大嘅呀妹呀!」
「對唔住呀Priscilla，但係我真係唔能夠亦都唔想用其他眼光去睇你呀...至少...而家係咁...」
「嗯...我都要講對唔住，我唔應該咁任性，亂發脾氣。」
「傻啦，呀妹係最重要架嘛，撒下嬌有咩所謂，重緊要你明白我就得啦。」
「你都係...唔准成日郁啲就唔理我。又話當我係你呀妹，都唔覺得你有關心過我嘅...」
「咁呀?聽日比賽之前我同你食飯嘞，好冇?唔好嬲呀哥啦。」


「嗯...」
太好喇，終於又解開咗同Priscilla嘅心結。

「好喇，我哋到咗會場喇，執齊嘢落車。呀信，你順便Check下有冇人漏低嘢，等其他人走晒先。」「OK，冇問題。」
咦，邊個跌咗個銀包呢?嘩!!點解會有隻手架，架車唔係得返我咋咩?「Vin...Vincent，個銀包係我架...」
嚇死我，原來係Beverly。「下次小心啲呀。嗱，俾返你。」「唔...唔該。」
「喇，Missy而家去報到，你哋快快手食個飯就好返嚟換衫化妝喇。」
「Priscilla，我哋去邊度食好呀?」
「Vincent，我整咗飯盒俾你呀。」
「吓，但係我同Priscilla約好咗喎...」
「唔緊要啦呀信，我自己買飯得喇，唔好嘥咗Beverly嘅心機吖嘛...」
「咁好啦，一陣食完喺返大堂等啦。」
「嗯...」

「Vincent，你...鍾唔鍾意食呀...」


「鍾意呀，好好味呀，你整嘢食真係好勁呀。」
「你...你想唔想...以後都...有得食呀...」
「你咁講...咩意思呀?」
「Vincent，你成日陪我，我真係好開心呀，我鍾意咗你...」
「吓...」Beverly...鍾意我?