比賽完結咗之後,hip hop班嘅活動亦都告一段落,俾學生休息下,而我嘅日常亦都回復去返學等放學嘅狀態。
「呀信,估唔到你真係同咗Beverly一齊喎,又話冇諗過追人?」
「唔係呀...佢向我表白架...唔係我追佢。」
「吓,咁你即係唔鍾意人架?講到咁委屈你咁嘅?」
「唔係唔鍾意...但係嗰種感覺真係好奇怪,我唔係好識點講呀,好似每同佢行近一步,我個心就un住un住,唔上唔落咁。」
「咁你問心嗰句,自己係咪真係鍾意人先?」
「我真係鍾意佢架,但係同佢一齊嗰陣,好似feel唔到應有嘅嗰種幸福咁。」
「咁你有冇諗過其實係自己問題先,你唔好下下都等人做主動啦。」
「唉...我真係唔識點表達呀...」
「你自己諗清楚啦,你要做咩決定冇人控制到,最緊要唔好俾自己後悔。」佢係咪叫我同Beverly分手呀...



「Vincent,啱啱有人同我表白呀...」
「吓,邊個呀?」
「同我哋同班嗰個方子樂呀...佢話鍾意咗我好耐,我唔知點答佢好呀...」原來Beverly有market架?咁唔得喇,點都食咗佢先喇,等嗰個方子樂知道自己未夠班。
「你唔係淨係鍾意我一個架咩?哦~~你變心喇。得啦,唔要我啦而家,拒絕人都唔識。」
「我冇呀,我冇變心架,我真係最鍾意你架。」
「傻豬我講笑咋。我最愛你。」
我就係一個咁賤嘅人,啲嘢冇人同我爭嘅話我唔知佢有幾好﹐我唔會識珍惜。其實之前我都試過因為咁而錯失咗一個拍拖嘅機會,為免重蹈覆轍,我先會向Beverly講出呢番說話。講到底,我可能都冇我想像中咁鍾意Beverly,純粹係享受緊我有人冇嘅嗰種優越感,直接啲講,我而家係喺度消費緊Beverly,不過唔緊要啦,佢咁鍾意我,我咁樣對佢嚟講某程度上都叫係一件好事吖。
「Beverly我哋一陣去邊度食飯好呀?」
「我今日都整咗飯盒呀。」


「嘩,好耶,又有得食你親手整嘅嘢食。」

「Priscilla,你呢幾日做咩唔同我哋傾計嘅?」
「我費事做電燈膽阻住你哋啦。」點解?點解我聽完呢番悔氣說話之後會有種講唔出嘅難受﹐揪心感。
「喂,你做咩又發我脾氣呀,我咪講過你永遠都係第一位架囉,況且你都有男朋友啦,你...」
「妖...你唔好再講咩男朋友好冇呀?你知唔知我同佢一早分咗手喇,你唔Q見到佢冇搵過我架咩?」
「吓...呃...係幾時發生嘅事呀,點解我會乜都唔知嘅,做咩唔同我講呀?」
「你唔好喺度扮嘢啦,我同咗你講咁又點呀,你最多咪又係會攬住我,求其講兩句說話敷衍我,你幾時有真心花過心機陪我啫?」
「我...」佢講得啱,一直以嚟,我都利用咗Priscilla嚟滿足自己,我根本盡過一個作為呀哥嘅本份同責任,去保護佢。我一直只會擔心自己喺佢心目中嘅形象,完全冇諗過做一個體貼嘅呀哥,仲講咩要做一個最好嘅呀哥吖,我連呀明都比唔上呀,我真係全世界最賤嘅人呀!!!
我完全反駁唔到Priscilla所講嘅說話。



就算我食咗最鍾意食嘅飯盒,都覺得乏味。

返到屋企之後,我不斷反省自己究竟應該點樣先可以彌補過失,將Priscilla由佢一直承受緊嘅痛苦拉返出嚟。我決定打電話俾佢,估唔到我第一次打俾個妹會係因為犯咗咁大嘅錯。
「喂,Priscilla。呀哥真係好對你唔住,我應承你,我以後會花更多心機陪伴你,理解你同聆聽你嘅心聲。所以你原諒我好冇呀?」
「嗯...」
「你可唔可以同我講,你同呀明係幾時分手架?」
已有 0 人追稿