我突然間多咗個妹: 治療情傷

「呀信，你而家可唔可以陪我呀?」
「梗係得啦，但係你做咩喊緊呀?」
「出到嚟先講...」
「哦...」

我同Priscilla坐咗喺佢屋企樓下嘅一個涼亭嗰到。Priscilla一見到我就衝咗埋嚟攬實我。
「呀妹，究竟發生咩事呀?」
「就嚟情人節，我又諗起呀明喇!😭😭😭」
「吓，但係你唔係講過佢淨係打波唔會陪你架咩?」
「佢...佢唯獨情人節會陪我架...已經四年喇...今年冇咗佢...我好唔習慣呀...啱啱分手嗰陣我以為已經喊夠，唔會再諗佢，點知而家都會好掛住佢呀!」


「呀妹......」
我身為呀哥，點解真係可以乜都做唔到，完全幫唔到Priscilla架...
「對唔住呀，呀哥唔識氹你呀...橫掂聽日係星期六，不如我哋去唱K發洩下啦...呀哥請...因為，而家嘅我根本唔夠了解你，我可以為你做嘅，就只能夠係咁...對唔住呀...」
「呀哥...你肯陪我已經好好喇...」
「咁我哋去唱通宵K，盡情唱晒自己啲感受出嚟啦!!!」
「嗯...好...」

「...你算甚麼男人!!!!!算甚麼男人!!!」嘩...Priscilla真係好唔開心喎，都唔係唱緊歌嘅，係嗌緊歌嘅。
「我!!!就回去!!!別引出我淚水!!!尤其明知水瓶座最愛是流淚!!!」佢真係癲咗喎LOL，唔可以笑佢架，佢咁可憐，受咗咁多壓力，一定要體諒佢架...
「你唔唱嘅...」


「吓...我見你唔開心吖嘛...咪等你唱多啲囉...」
「我要聽你唱!!!」一定要揀啲好啲嘅歌，唔可以唱啲會令佢傷心嘅歌，又要俾佢知道有我一直喺佢身邊陪住佢，關心佢。鄭中基應該OK掛...
「晴天陰天雨天，你在何地，代表我天氣...」
「如果那個他不愛護你准我代你哭，因你受罪是多麼滿足...」
「呀信...」
「唉...都話唔唱架啦...整到你喊嘞...」
「好好聽呀...你係咪特登唱呢啲俾我聽架...」太好喇...佢察覺到呀，我終於有幫到佢同關心佢嘅感覺喇。
「係呀...你要知道我永遠都會喺你身邊陪住你，所以唔洗咁傷心架。就嚟兩點喇喎...你唔攰咩?」
「我仲想唱多陣。」
「哦，咁我瞓陣先喇，想走嗰陣嗌我吖。」


「吓...你唔陪我唱呀?」
「唔好扁嘴啦傻妹，要唱嘅都唱咗啦，你知我點諗咪得囉。乖，呀哥錫返。」
「行開啦><，變態。」
「我真係唔得喇，頂唔順。早唞。」
「Goodnight」「...Do you see how much I need you right now? When you're gone, the pieces of my heart....」

「先生，先生，唔好意思呀，夠鐘閂門喇，麻煩你埋咗張單先吖。」
「嗯?」係喎我喺K房瞓咗喎。「哦。」個身體咁重嘅...Priscilla，竟然瞓咗喺我上面!?仲流緊口水...原本佢嘅睡相咁可愛架。嘩，點解我會無意識咁直接用手抹走佢嘅口水架?好噁心呀我OMG。
「Priscilla，起身喇，等緊我哋閂門呀。」
「呀信...呵......早晨...」
「早晨呀呀妹，返去喇。」佢啲頭髮真係好香呀...喂，Priscilla你可唔可以用個正常啲嘅姿勢起身呀，唔好打開兩隻腳夾住我，再擺兩隻手撳住我心口吖，我有性慾架...
「呀哥，多謝你!」
「做咩呀?又想用呢招攻陷我呀?唔好意思喎，呀哥有女朋友喇。」
「唓!」
「傻妹又發脾氣，乖，呀哥錫返。」


「錫吖，做咩唔錫呀!?」
「你...你傻咗呀，我講下咋，你唔好下下當真先得革。」
「講大話嘅，以後唔理你。」
「呀好嘞好嘞，服住你喇真係，俾個飛吻你好冇?咁樣滿意未?」
「做埋之前貼塊面埋嚟再摸我個頭嗰個...」
「喂...嗰個好尷尬喎...我怕醜架...」
「快啲!!」
「唉，怕咗你，成日撒嬌。」
「呀哥，陪我行花市好冇呀...」
「花市?唔好同我講你係因為上年情人節同花市撞日子你想去回憶呀下?」
「係呀...唔得呀?」
原來我喺佢心目中嘅地位己經等同佢男朋友喇...