好攰,已經過咗差唔多三個星期喇,呢段期間我一直都搵唔到答案,我而家覺得,如其俾一條冇問題嘅問題一直煩住自己,倒不如唔好諗仲好,放低呢個問題,當冇事發生過。我覺得...Priscilla最近開始冇前一排咁唔開心,又多咗搵我講嘢係因為佢都有同樣嘅諗法...

「早晨,呀妹!」
「早...早晨...」Priscilla用驚訝又驚喜嘅表情望住我,都係嘅,畢竟係咁耐以嚟我第一次主動開口同佢講嘢。
「Beverly,早晨!」
「Vincent,你今日做咩呀...之前明明日日都好冇精神,上堂老師叫你幾次都唔應架喎...發生咩事呀?」
「哦...我之前有樣嘢諗極都諗唔明,而家諗通咗,所以咪冇唔開心囉。」
「你都會有嘢諗唔明架咩...點解你唔同我講嘅?」
「吓...呃...因為...其實就...係關於我屋企人嘅...所以咪冇同你講囉...係呀...哈哈...」
「唔可以咁架你...以後有咩都要同我講呀...因為我第時都係你屋企人嚟架...」聽到呢到我差啲俾口水濁親,一嚟我冇諗過Beverly咁快會諗結婚(我唔想咁早俾人綁住呀TAT),二嚟係我用屋企人做煩擾我嘅問題嘅原因係我一提起Priscilla就覺得佢好似我親妹咁,所以不自覺咁講咗係"屋企人"嘅問題...


「咁...我唔想你成日都要為我擔心吖嘛...你已經成日幫我整午餐喇...唔想再要你操心呀...」求下你Beverly,完咗呢個話題好唔好...
「我係你女朋友嚟架...你點可以咁諗架...你要應承我...以後有咩唔開心都要同我講呀...」你再講我就真係唔開心喇...Beverly你知唔知我用咗幾耐時間先逼到自己唔諗嗰啲問題呀...
「遵命...」差啲穿煲...真係險過剃毛...
「係喎...你今日同邊個食飯呀,點解琴晚同我講唔洗幫你整午餐嘅?」講唔講真話好呢...我其實係約咗Priscilla嘅...食餐飯啫...應該冇問題...掛...
「我約咗Priscilla呀...」
「吓...我仲以為你哋嗌咗交添,呢排都唔見你哋傾計嘅...」
「佢...佢發脾氣啫,話唔認我呢個呀哥喎...」我冇講錯吖...佢鍾意我,想做我女朋友,咪唔認我做呀哥囉。

「呀信...做咩無啦啦約我食飯嘅...」
「呀哥同呀妹食飯需要原因架咩?傻妹!」


「吖...好痛呀...痴線架你...用手指彈人額頭...」
「話時話,我哋好似係第一次得我哋兩個一齊飯喎...」
「係喎!咁你要幫我埋單喇,咁難得可以約到咁可愛嘅女仔同你食晏。」
「哦~~~乜原來係咁呀?咦,唔知係邊個欲求不滿嘅女仔喺花市夾硬錫我呢?」嘩!!!Priscilla塊面仲紅過佢碗上面嗰啲番茄喎=.=「~o~我講下咋,唔洗即場回憶當時咁愉快嘅經歷嘅...」
「妖...好PK呀你...唔理你喇...」喂,佢去邊呀...未俾錢架喎...唔乸係真係要我幫佢埋單呀嘛?

「好,大家有冇嘢唔明?冇就落堂嘞。大家可以放學。」
終於放學,一個禮拜真係可以長到好似一年咁,嗱嗱林狗衝返屋企睇Konosuba先。
「Beverly,我走先喇!」
「嗯...Bye bye」


「Bye,妹,我走喇!」
「哼!」
「唔好嬲我啦<3,我返去喇。」

「唔好已讀我啦,送張呀哥嘅自拍J圖俾你嘞。
   是但覆我一句都好吖,就嚟斷火喇...
   啱啱開始儲返火我唔想又斷呀>.<」「哦」「你唔嬲我嗱?」
「我幾時話唔嬲你
   我瞓喇 唔理你」
「咁早瞓?喂今晚會涼返喎,記得冚返張被呀」
佢唔係真係咁快瞓咗呀?

「早晨,呀妹」
「...」
「喂,做咩一早就扒喺張枱度呀,你好攰咩?」


「係呀,唔好煩我啦...」佢仲嬲緊我?
「Vincent,你又激嬲咗Priscilla呀?」
「佢自己發脾氣咋喎...」
...今日少有喎...上九堂Priscilla瞓足九堂嘅?
「妹你冇事吖嘛?」
「冇事,唔好阻住我返屋企...」
唔通佢真係仲嬲緊我...
算,返屋企睇暗殺教室。

「妹來電中」
呵呵,有人口是心非掛住我,仲掛到打俾我添,我唔聽,吊下你癮先。
暗殺教室真係越嚟越好睇...嘩...Priscilla做咩打咗成10次電話俾我呀?服咗佢。
「喂,做咩咁掛住我呀?」
「...信,終於...聽...好...辛...呀......」
「喂,喂!妹,你做咩呀,啲呼吸咁亂嘅!?」


死喇,佢肯定係琴晚冇冚被凍親呀...
「我而家即刻去你度,頂住呀!!!」
已有 0 人追稿