個晚訓着之後，我穿越左去第二個世界。: 楔子

好黑，呢度好黑，伸手不見五指。
我都唔知自己行左幾耐。三日？五日？定一星期？ 頭腦已經開始唔清醒，仲有少少暈。

我叫程生，係一個二十歲嘅大學學生。而家既我應該係發緊夢，但今次呢個夢實在同平時個啲好唔同。好似，我已經開始分唔到現實同夢境。就算我點拍打自己嘅後腦，都係醒唔翻。

點算，我會唔會永遠被困係呢度岀唔翻去？

有冇人可以救下我？邊個都好，我靜係想離開呢度，翻翻去原本嘅世界。好暈，個頭好似被人用大石連續撞擊咁。如果我死係呢度，係唔係就可以係現實世界裡面醒過來？

唔得啦，我已經行唔郁。好攰，雙眼開始模糊。眼前好似有個人影向我走近，我睇唔清楚係邊個。





佢向我伸岀手。好溫暖，係記憶中嘅體溫。

「 你係邊個⋯⋯？我係唔係識得你嘅？你係黎呢度救我架？」

「 程生，而家由夢境中清醒過來。呢度唔係你應該黎嘅地方，唔好再插手呢件事。」

你⋯⋯講緊乜嘢？

「 我明知咁做係擾亂左呢個世界嘅規矩，但我唔可以䄂手旁觀。你係我最重要嘅人，以前係，而家係，將來都會係。就算我唔可以係你身邊，你都要加油啊。」





我睇唔清眼前人嘅臉孔，只係見到兩行涙水由佢臉上劃落黎。

點解，我會咁悲傷？

「 而家，醒過來啦。」眼前人使勁將我推開。

「 啊！」 我被吸入身後嘅漩窩，係黑暗裡面昏暈過去。

碰！我跌倒係地上，個頭好痛。發生乜嘢事，我係唔係已經翻到黎現實啦？





「 表姐，對唔住啊。你有冇事啊？」 柔風係床上面跳落黎，向我雙手合十地道歉。

「 我冇事，係個頭有啲痛。點解我會訓左係地下嘅？」我摸一摸後腦去確保冇受傷。

「 唔好意思啊表姐，係我懶訓一腳踢左你落地。」 柔風有啲尷尬咁望住我。

「 唔緊要啊，起碼我知道我安全翻翻黎啦。」感覺到臉上有啲熾熱，我反射性地擦一擦。

係眼淚。