「娜姐,照舊四杯凍檸茶,1杯少甜少冰,1杯正常,2杯多甜多冰。」阿豪一去到就好熟手咁落單。

「好,即到!」

「唉,翻屋企就要溫數,最衰都係你啦廢子楓。」佢落完單就喺到呻。

「你估我好你好多,你又唔係唔知我啲數..」

「努力啦同志們!」阿月阿言2位學霸喺旁邊講風涼話。



「阿楓!」

「嗯!」

「崆峒絕學,一陽指!」

「4杯檸..茶。係..你地呀?」係阿晴..

「係呀,你黎幫你家姐手呀?」阿月問。



「嗯,呢排唔洗補習,所以落黎幫手。」

「睇下先,少甜少冰係阿月嘅,多甜多冰就阿豪阿楓兩個屎忽仔啦,杯正常..就係阿言你嘅。」

「勁呀,仲記得喎。」阿豪講。

「我去做野先啦,仲有好多人幫襯。」

由頭到尾,阿言眼尾都冇睨過阿晴一眼。都唔知佢避忌啲咩。



「嘩,靚女,放咗學都仲要打工呀?過黎同我坐陣我就俾錢你啦。」幾個流氓係到挑釁呀晴。

「死開啦垃圾!」阿晴好惡咁講。

「Wow,好惡呀,我好驚呀!」佢地大佬就將個玻璃杯dum落地下。

「喂!」我同阿豪阿月忍唔住就喝停佢地,而阿言仍然坐咗喺到飲檸茶。喂大佬飲少陣啦

「再搗亂我就報警!」我講。

「你大我呀?!你報呀,兄弟,做野。」佢地開始亂dum野,嚇走曬啲客。頂,唔記得佢地真係嚇大添。呢下愈幫愈忙。

我地為咗唔好俾佢地整爛曬呢到啲野,都出手阻止。期間難免有啲肢體碰撞,受到少少傷。

然而,個大佬一路行近阿晴,阿晴好驚咁一路後退。



「哎呀!」個大佬突然嗌咗聲,原來阿言衝咗過去拗條HIHI個手臼。

「你試下再搞佢!我即刻拗甩你手臼。」

「唔..唔好 !」妖,原來係無料扮大袋,咁我頭先驚乜春。

其餘果啲二打六見到個大佬比人夾住都唔敢再亂郁。

「唔好再搞事,走!」

班友即刻賴曬屎咁走夾唔頭。

「你冇事呀?」阿言問阿晴。



「關你咩事姐?我幾時要你救呀?係你話以後各不相干架,你救我做咩呀?」阿晴突然淚如雨下。

「我..」阿言竟然都有應唔到機嘅時候。

「算啦,你地走啦。」

「你地走先啦,呢到我地執得啦。」娜姐都講。

阿月放低咗茶錢,我地就走咗。之後我地就散咗Band,各自各番歸。

「咦,阿楓你黎啦?」係呀,我又返到自修室,一個令我放低所有煩惱嘅地方。

「你塊面做咩呀?」

小涼一見到我塊面瘀咗一大撻就問,佢好似好緊張咁。



「同人有少少碰撞之麻,冇野嘅。」

「下?發生咩事呀?」

之後我就講咗件事俾佢聽啦,佢聽完之後就話:「哈哈,你好渣呀,係到搞亂檔。」

「咩姐,我都係想嚇走班爛仔之麻。」

「算啦,見你都係想幫你朋友解圍,咁就唔笑你啦。仲痛唔痛呀?」

「唔搞佢都..嘩屌!」佢特登整蠱我,用手指篤我個瘀傷,我地仲要喺自修室入面,搞到我又唔可以嗌出黎。

乜用手指篤人塊面嘅情節唔係好SWEET架咩?童話裡果然都是騙人的T.T



「嘻嘻,仲整蠱唔到你?」佢笑果陣,泛起咗淺淺嘅笑窩,果一刻嘅佢確實幾迷人..如果唔係用黎整蠱我嘅話。

「你個衰妹..溫書啦!」我冇佢咁好氣。

之後我又拎啲數出黎做,天呀,今次仲要考咁多,點溫得曬!

「點解你黎黎去去都係溫數?其他唔洗溫架咩?」

「要呀!但係下個禮拜有個TEST,要test翻我地成年學過嘅數,所以冇計啦!」

「哈哈,等我救下你啦。雖然我啲ECON麻麻但係啲數都唔差架!唔識就問我!」

「咁好死!?好呀。」

「不過你都要教翻我ECON!」

「超,你幫唔幫我都要我教你ECON架啦!」

「嘻嘻,係喎,咁等我諗過第二啲野俾你報答下我啦。」

唔知點解,有小涼係到果陣溫書係會有效率好多,有時又講下笑咁,時間都過得快啲。

最可幸係,佢同小霖好似漸漸熟落咗。

過2日放學,小霖都落咗黎自修室溫數。自從上次單野之後我都驚驚地佢地同場。

「呢題咁難嘅..你地識唔識?」一時間多咗2個「老師」,我都唔係好知問邊個好,所以索性2個都問。

「俾我睇下!」佢地兩個同時間講。

「一齊睇啦。」好彩小霖作出咗讓步。

隔咗一陣,,

「又真係幾難...我都唔係好識。」小霖講。

「嗯...我都唔太識。不過我唔信做唔到!」小涼答。

佢地一路係到計,反而我坐喺隔離無無聊聊等答案咁,成碌廢柴咁。

「呢個角應該同呢果隻一樣,但係又好似奇奇怪怪咁。」小涼講。

「係囉,2隻角應該come from同一條segment,但係都係搵唔到個unknown。」

佢地竟然喺到討論起上黎,我仍然係到得個望。

「計到啦!個答案係36度!」佢地幾乎同一時間計好,仲一齊係到嗌。

好快佢地都意識到自己係自修室,仲一齊笑咗出黎。

惜英雄重英雄原來唔係淨係得男人先會,自從計好呢條數,佢地就好似變得好好傾咁。

咁當然,成件事嘅大贏家,梗係我。

時日如飛,好快就到禮拜一,其實我都知一個禮拜要溫識曬都冇咩可能,但係盡做啦。我都唔想辜負佢地2個嘅心機。

一打開份卷,一堆一堆數字就喺我腦海轉動,成個過程我好似將啲數字同份卷做配對咁。

當中一定有識有唔識,但係收卷果一刻我已經好滿足,我知道自己已經盡咗力。

😁👍完卷後我對住小霖做咗個咁嘅手勢,佢用翻佢最殺死人嘅笑容回敬我。

「我講明呀,最低分果4位同學每逢禮拜六都要翻黎補課,直至大考完為止。」阿王收咗卷之後就講。

「千祈唔好係我,千祈唔好係我!」我心入面默念。