我只不過喺自修室溫書，點知比我遇番佢。: <二十三> 對不起 我愛你

完咗比賽之後，我地班就打算去星矢吧慶功。

「喂，你今次好勁喎。」小霖走過黎講。

「有幾勁呀？入得果6分。」

「唔係啊，我係指阿言同阿晴...」

「佢地係有緣嘅點整都唔會拆得散啦。」



「咁你呢？冇諗過搵個新嘅緣份？」

「我？邊有人會睇得上我呀。」

「我。。」

「阿楓！」

「點解..?!」



「點解我會係到呢。」

我地行到出學校門口，小涼失驚無神出現喺我地面前。

「㗅～靚女喎。」個個喺到起哄。

「食屎啦你地，friend黎炸。」我屌佢地。

「我特登飛的黎睇你打波架！不過只可以喺門口睇。你地今日打得好好呀！」



「阿楓，佢就係...」阿言拖住阿晴講。

「嗯...嗯嗯。」

「嘩屌！」我突然俾人好大力咁拉走咗，原來係阿月。

「佢就係你之前講嘅有特別感覺果個呀？」佢問。

「下？！係...」

「又真係幾靚喎...你冇興趣嘅不如...」

「你想溝佢啊？！」

「哈哈，咁靚嘅女仔食得唔好嘥啦。」



我可能霎時俾佢撻著把火，忍唔住扯住佢衣領，

「仆街講咩呀你？咩叫食得唔好嘥？」

「即係你唔溝個女仔就唔好阻我搵食！」

我即係當堂想打柒佢。

「你地做咩呀？」阿言喝停咗我。

「冇，冇事，阿楓同我玩下姐。」佢扯開我隻手，陰陰森森咁講。

「Hi，靚女，我叫阿月啊，你係阿楓啲朋友啊可？一齊去慶功啦！」佢搭住小涼膊頭講。



好彩小涼都推開咗佢，行埋黎我到講：「咁我同你地去得唔得呀？」

小涼望住我，我係咁擰頭，但係佢好似接收唔到咁，「好啦好啦，俾我去啦！」

最後我好無奈咁都要俾佢去，沿途佢都同小霖傾計，但係去到星矢吧...

「下次你想黎都同我講聲啦。」

「諗住俾啲驚喜你嘛。」

「今次真係唔荒唔驚喜啦...」我好細聲咁講。

「點解呀？」佢眼仔碌碌咁望住我問，真係成隻小牧羊咁。

「你小心啲果個阿月啦，你成為人地狩獵目標啦。」



「唔會啦，你諗多咗姐，佢唔係你兄弟黎架咩？」

「你唔好問咁多啦，我唔想你落喺佢手上！」sorry，我好似激動咗少少，不過一直保持好細聲。

「噢，你都會緊張我架喎。」死啦，搞到我都有啲心如鹿撞添。

「鬼得閒理你。」我要保持理智。

「嘢食到！」阿言同阿晴拎啲野食出黎，十足十一對小夫妻。

「HI小涼，你悶唔悶呀？我同你傾陣計啦。」
阿月無啦啦坐過去小涼隔離。

「我唔悶呀，有阿楓陪我呃嘛。」我一路留意住佢地講嘅野，費事有咩差池。



「你地識咗好耐架啦？」屌，扮咩呀，你明明知！

「唔係呀，幾個月炸。」

「咁你地咁快就咁熟架啦？」

「我地差唔多日日都落自修室，所以慢慢就熟起黎。」

「佢對你好好？」

「係呀，佢對我好好呀，成日教我Econ架。」

「都夜啦喎，我送你翻去先啦不如。」點解條仆街進取到咁。

「唔洗啦，我同阿楓走就得啦。」

「唔緊要啦，我送你啦。」

「下，咁...」

「唔洗啦，我送佢得啦！」呢個時候我都忍唔住出聲。

「小霖你走未，一齊呃？」我都唔係好想留喺果到。

「你地走先啦，我玩多陣。」佢好冷淡咁講。

「好，咁走啦我地。」

行到出巴士站，我先發現原來我一直拖住小涼隻手。

「呃，唔好意思啊。」當我發現果陣就即刻放開佢隻手。

「唔...唔緊要嘅，你想拖咪...繼續。」佢愈講愈細聲，可能怕醜掛。

小涼見到我正想將隻手伸出去，但係又縮番，個樣好似有啲失望。

但係經過頭先嘅事，其實我都幾肯定，我好緊張小涼，我係鐘意咗佢！

「你俾啲時間我，我一定會俾個答覆你。」我唯有咁講，因為我都想搞清楚阿月個衰仔搞咩先。

「嗯，我等你！」嗚呀，呢句說話由佢把口講出黎好好聽，好有說服力！

上到車之後，可能我做得太多運動，頭先又發生咁多野，令到我真係好攰，所以我唔覺意訓著咗。

「醒啦白痴，到啦。」到咗之後小涼就嗌醒我，原來我瞓瞓下挨咗落佢膊頭瞓。

「我..好重啊可，哈哈。」唉屌，好尷尬。

「唔會呀，我想話你知嘅係，無論你背負住幾多責任同負擔，我都係你嘅一個避風港，俾你依靠。」
試問邊個聽到呢啲野唔會動心，我真係行大運！

「對唔住，你同我一齊，我俾唔到信心你，仲要你幫我咁多。」

「我咪係你最大嘅信心囉傻佬。」

果一刻，我真係好想攬住佢，但係我冇咁做，我希望我下一次有機會咁做，係所有事都搞清之後。

「多謝你！」可能我淨係做到咁多。