「聖鬥士求愛大行動計劃會議!」
 
地點:星矢吧
 
人物:豪、月、言、星、楓
 
「相信大家都好清楚我地今日喺到嘅目的。」最多鬼主意嘅阿星主持住大局。
 
「清楚!」
 


「咁我地點幫阿豪呀?」我問。
 
「溝女最重要令佢對自己產生好感。呢樣,係第一步!」
 
「我地首先會去睇戲,飛我就已經買好,到時我地令小霖會坐喺最執邊,而阿豪就喺佢隔離。」
 
「所以阿豪又要準備定外套、紙巾果啲嘢啦。」阿月講。
 
「屌,等我仲以為你有咩好橋。」我附和。
 


「橋唔怕舊嘛,嘻嘻。」
 
「咁之後呢?」阿言問。
 
「有好感之後就梗係要有火花啦,唱K就最易產生火花啦。你諗下,2個人對住唱首lum歌,幾過電呀!」
 
「你點整到佢地合唱呀?」
 
「到時我自有方法啦。」都唔知條友信唔信得過。
 


「阿豪,你記住你要諗多啲話題同小霖傾,等佢了解你多啲。」
 
「哦..哦。」阿豪似懂非懂咁點頭。
 
「唔得!」我唔同意!
 
「小霖鐘意人靜靜地架,你講咁多嘢反而會嫌你煩。」呢樣應該冇人比我清楚。
 
「同小霖講嘢自自然然就得。」
「仲有最後一樣嘢,記得帶遮,我check過果日落雨機會極大,如果係就..嘻嘻。」阿星好陶醉喺自己計劃裏面傻笑。
 
「你快啲去應徵大台編劇啦。」阿言都忍唔住講,心聲呀!
 
我硬係覺得冇咁順利咁..
.


.
第二朝,我一早打電話俾小霖。
 
「喂..?」佢好似未瞓醒咁。
 
「一唔一齊去旺角join佢地啊!」
 
「啊..好啊。」
 
「咁地鐵站等啦。」
 
其實我係幫阿豪問嘅,呢個係製造機會俾佢地兩個嘅好時機,我之後會扮肚痛遲少少去。
 
阿豪住喺調景嶺,出旺角一定會同我地搭同一條綠色線,我知道我好似過小霖一棟咁。但係如果由阿豪親自約嘅話佢可能未必肯,我約係最穩陣嘅方法。
 


爭氣啦阿豪!
 
為咗唔惹小霖懷疑,我什至叫小涼一個去先,當然都係話因為肚痛。
 
當我到咗百老匯戲院果陣,小涼一見到我就揮曬手。
 
「搞錯呀,遲大到!」阿星見到我就罵。
 
「人有三急啊嘛,梗係解決咗先。」
 
「一陣先罰你,入場啦入場啦。」話說啲飛全部都係阿星搞,我都唔知睇咩。
 
喺跟住佢地行嘅同時,我問小涼,
 
「點呀,佢地冇刁難你啊嘛?」


 
「冇呀,佢地都好好人,特別係阿晴同小霖,阿月仲同我道歉添。」
 
「道歉?道咩歉?」
 
「佢話上次撩我只係想玩下你,刺激下你喎。」嚇得我,以為同佢講曬成件事。
 
「哦..哈哈..係呀係呀,佢同我講咗。」
 
入到場之後,我同小涼坐,而我隔離就係阿豪同小霖。
 
開場之後我先發現,阿星揀嘅唔係啲死人冧樓嘅煽情片,又唔係鬼片,而係…「車手」。

睇阿星個樣咁投入就知佢為咗私慾先揀呢套。不過我都冇所謂嘅,我都幾鐘意呢類戲。
 


不過,你咁樣叫阿豪點做嘢!!紙巾攻勢宣告失敗。
 
套戲又真係幾好睇,雖然好多犯駁位,個8000轉2咪車又真係幾型。
 
我望向小涼,佢睇果陣好投入,啲反應好可愛。
 
我見佢好似有少少凍咁,就喺袋到拎咗外套俾佢。
 
「唔..唔該。」雖然戲院入面黑曬,但係隱約都見到佢個怕醜樣,實在太吸引。
 
阿豪見到又有樣學樣咁問小霖凍唔凍。
 
「有小小啦。」佢答。
 
「咁我俾我件外套你啊!」佢即刻除件外套。
 
「唔洗啦,我有啊。」
 
外套攻勢都失敗。
 
再望下阿言果邊,阿晴挨住阿言睇戲,真係sweet死人,都真係幾葡萄。
 
不過戲院啲冷氣真係唔係講笑,睇睇下我都有啲凍,搞到我搓曬手又剩。
 
「分一半俾你啦。」貼心嘅小涼見到我咁可憐就咁講。噢,真係感動!
 
就係咁,我地一件外套兩份冚,挨埋一齊睇套戲,個感覺真係好正!
 
至於阿豪...你執生啦,都已經幫唔到你太多。
 
但又誓估唔到套戲都有洋蔥位,就係黃秋生死果到,一向眼淺嘅小霖終於失守喊咗出黎。
 
係機會啦,飛雲 阿豪!
 
佢即刻拎張紙巾出黎俾小霖,而小霖接過咗!
 
「YES!」我地幾兄弟 (除咗阿豪,佢不能夠太明顯。)都暗暗拍掌。
 
或者你覺得,車,俾張紙巾代表啲咩,但係對我地黎講,呢無形嘅一小步,已經係距離成功跨越一大步。
 
That’s what 青春!
.
.
睇完戲,我地就行去唱K果到。途中見到阿豪同小霖都仲喺到傾緊頭先套嘢,睇黎進展唔錯喎。
 
而阿晴就拉走咗小涼,咁我就阿言,仲有阿月阿星行。
 
「頭先套戲唔錯呀可!」阿星仍然好滿意自己選擇。
 
「唔錯你個頭呀,你自己想睇炸?好心你揀番啲愛情片或者鬼片啦。」我忍唔住笑佢。
 
「鬼片..我驚啊嘛,唔通你要我攬住阿月?」
 
「我唔是Gay嘅!」阿月即刻作出反應。
 
我被佢地激到反白眼咁滯。
 
去到Neway,幾個女仔都好開心,特別係小涼,原來佢真係好鐘意唱K,同我一樣,哈哈。
 
「我要唱失戀王!」阿星一入到去就嗌。
 
「每段戀愛都會認錯人...」佢引亢高歌,講真..都真係幾難聽。
 
佢唱完之後我地都喺到噓佢。
 
一開始幾首大家都係熱下身,都唔係好開口唱或者唱得都好hea下。
 
直至個MON彈咗首「You Can’t Stop Me」..我地就黎料。
 
You Can't Stop Me
 You Can't Stop Me
You Can't Stop Me
You Can't Stop Me
!」呢首係我地幾個最鐘意嘅歌,一唱K就會唱。
 
凌晨如延長罪惡的解禁 秩序快消失我慨憤
 
可能因為首歌曲風勁Rock,好易上腦。
 
誰人能明瞭像與死拉近 夜幕裡只得我發憤
 
又因為啲歌詞就好似諷刺我地嘅生活,表達咗我地對現實嘅不屈。
 
憑我傲氣 維持人世道理 來獲取勝利 

最重要係,首歌可以俾我地盡情咁嗌,個感覺真係好乸正。
 
唱完之後,我地喘曬氣咁望住大家,然後笑咗出黎,呢種共鳴唔係阿豬阿狗可以表達出黎。

唱咗一陣,阿星就行去個Mic Stand果到講:「Ladies and Gentleman,不如我地黎玩個遊戲。」
 
「好!」我地好識做咁附和,費時dead air。
 
「我呢到有8張牌,我地一人一張,其中有2張係相同,揭牌之後,號碼相同嘅就要合唱。唔洗唱嘅就點歌比要唱嘅人,冇得唔唱!唱完之後會重新派過。玩完之後唱得最難聽果組要罰!」
 
今次又好似做得唔錯喎,至少效果出黎唔突兀。
 
第一輪開始之後,阿星都唔造馬造得太明顯,結果係阿言同阿月抽到相同牌。
 
兩大男神合唱,所以我地就揀咗首玩味重嘅「今期流行」俾佢地。
 
雖然個MV冇大台果個咁膠,但係都唔少伏味,估唔到佢地又拋得低身段,連舞都跟住跳埋。
 
到第二輪,又係抽中阿言,不過今次就換中阿晴,果然係..天作之合,我地揀咗「拖字闕」俾佢地唱,首歌好考驗默契。

難唱就無謂寄望拖得更高音
分手遇見覆雲都過分性感
愛是華麗旅行 這麼遠 那麼近
同步卻陌生

 
可能佢地都經過過呢個階段,所以唱起上黎特別有感情,我地似係欣賞緊表演咁,兩個都唱得好專業。唱完之後我地都拍曬手掌。

第三輪,阿星終於洗橫手,阿星同小霖抽中咗相同嘅牌。

「簡邊首呢…」阿星喺到思索咁。
 
「唔好緊張,唔好緊張..」 見到阿豪好似好緊張咁揸實支咪,阿月忍唔住講。
 
「得未呀?」小霖問,相反佢就冷靜好多。
 
「妖,等我揀啦。」我搶咗阿星個搖控。
 
「就..呢首啦。」
 
我幫佢地揀咗「唯獨你是不可取替」,仲要係合唱版本,夠曬sweet,如果阿豪唱得好一定加好多分,因為係小霖最鐘意嘅,而且…
 
曾聽說有許多戀愛 沒有結果卻剩傷心者感慨


一路唱果陣,小霖都好似心不在焉咁,平時佢一定會好投入咁唱呢首歌,今日就..
 
令我都刻意避開 是我不敢相信真愛
 
唔知係咪我錯覺,點解我覺得佢唱果陣都有意無意咁望住我..
 
如果今天將失去 眼前的一切 剩低清風兩袖也不計

中段到阿豪插入黎,佢地把聲其實好夾,但係就硬係爭咁啲默契,成日都有人唱快咗,或者慢咗。
 
其實我知道 是可一不可再 下半生准我留住你 一直相愛
 
唱到尾果陣,仲好似隱約聽到小霖有少少哽咽嘅聲音。
 
本身首歌就係好淡淡咁完結,所以當首歌完咗之後,全場靜咗落黎,變得鴉雀無聲。
 
「唔..唔好意思,我去一去洗手間。」小霖唱完就出咗去。

「快啲去睇下咩事。」阿言叫阿晴去睇下。
 
「我..係咪衰咗啦?」阿豪問。
 
「未必嘅未必嘅,佢一陣番黎就冇嘢。」阿星安慰佢。
 
「唉,頭先都好地地架。」
 
「唔關阿星事嘅,繼續唱歌啦。」阿言望住我,煞有介事咁講。
 
佢地翻黎之後,表面上佢已經冇咩嘢,但係事實上氣氛已經有啲變,我地都係靠唱啲快歌隔硬炒熱啲氣氛。
 
我地行去食飯果陣,個天果然真係落起雨。
 
「我遮你啦。」阿豪同小霖講。
 
「唔洗啦,我有遮。」
 
「吓..咁..」阿豪望住我地,好似好不知所措。
 
「呃..你地有多把咁借黎啦,我同阿星冇。」阿月出黎打圓場。
 
「你冇帶遮呀?」我問小涼。
 
「冇呀,邊估到今日會落雨。」
 
「咁我走先lu,你慢慢等啦。」講完我就擔住把遮跑咗出去。
 
「喂,死人頭!你試下唔遮我!」佢跟住衝埋出黎。
 
「玩下你姐,邊敢唔遮你呀?」
 
「哼,衰人。你係咪有嘢未同我講。」
 
「講咩?」
 
「今日出黎嘅目的囉。」林小涼小姐,我建議你可以去應徵做柯南或者金田一嘅助手。
 
「係..我地係想幫阿豪追小霖嘅...」
 
「但係你地似愈搞愈差喎..」
 
「邊估到個死人星咁靠唔住姐!而家都係見步行步啦。」
 
「乜你份人咁鐘意見步行步架..」
 
「係咁架啦,都做唔到啲乜啦。」
 
「以後唔可以呀!做人要有啲計劃同方向,如果唔係好冇安全感。」
 
「係係係,收到巴大人。」
 
講講下都已經到餐廳,好彩餐飯都算食得融洽,阿豪撩小霖講嘢,小霖都肯應下機。

.
.
「我憎死你呀!」估唔到呢句會係作為我地今日約會嘅終結。
 
原來,最危險嘅事,往往喺你以為最安全嘅時候發生。