我只不過喺自修室溫書，點知比我遇番佢。: <三十三>雅典娜的訓話

「啊…好無聊呀，聽乜鬼講座姐。」阿星一朝早就呻。
 
一考完試就會有啲試後活動，番一番去就放學，多數都無無謂謂咁。
 
「咁你又番？」我問佢。
 
「費事又補假紙嘛。」
 
「算啦，你唔翻都仲要補課，冇得避。」
 


呢個時候小霖都翻到黎，我同佢眼神對望咗一眼，佢就移開咗視線。
 
十幾年嘅友情，就真係一夜之間化為烏有？
 
當一個人喺意識上建立咗一道圍牆，要打破佢，就會好難。
 
完咗講座之後，佢地各自都有嘢做，小涼又未放學。我見有啲肚餓就去咗星矢吧食嘢。
 
「娜姐一個叉燒拉麵，飲檸茶。」
 


「好嘅，咦得你一個嘅？」
 
「佢地各自都有嘢做啊。」
 
隔咗一陣，佢就遞上咗個拉麵，然後就坐低咗。
 
「點呀，唔開心？」
 
「冇呀。」
 


「識咗你咁多年，唔知你籠嘢咩。」
 
「識咗咁多年，真係可以好了解一個人？」
 
「你係講小霖？阿晴都同我講過下嘅，你地鬧咗交呀？」
 
之後我就將早兩晚嘅事話咗俾娜姐，我諗佢係唯一一個知道發生咩事而又可以好客觀咁俾意見俾我嘅人。
 
「我一直以為我最熟嘅人，我會好了解佢，但係就連佢幾時開心，幾時扮開心，心入面諗緊咩我都唔清楚，所以先傷害佢咁大。」
 
「我都明白你嘅感受嘅，你怕如果俾佢知你知道佢鐘意你，你地會變得尷尷尬尬。」
 
「你又唔想同佢攤牌，怕連朋友都冇得做，所以先一拖再拖。」Exact7ly，娜姐好樣的！
 
「係呀，但係而加個情況好似仲衰咗咁。」


 
「你唔同佢講清楚，反而搞咁多小動作，咪仲令佢傷心。」
 
「你病咗都唔會咩都唔做就突然好翻啦，要令佢傷害減到最低係要喺問題發生時就即刻解決，而唔係一拖再拖。」
 
「咁又係嘅…」
 
「而加都仲有機會嘅，俾佢知道你仲好重視佢，唔好搞到做唔成情人，就連朋友都冇得做。」
 
「嗯，我明啦娜姐。多謝你啊。」
 
「我翻黎啦，咦阿楓你都喺到呀？」阿言同阿晴翻咗鋪頭。
 
「係呀，你地個個都有嘢做，我咪黎食下嘢。」
 


「你地講緊..小霖呀？」阿晴問。
 
「係呀，個傻仔做錯曬啲嘢，搞到小霖咁hurt，我咪鬧醒佢。」
 
「啱架啦，罵醒佢啦，你搞到小霖喊咗幾耐呀。」阿晴講。
 
「你都知道咗啦..？」我問佢。
 
「果晚佢打俾我傾咗好耐啊，我罵咗阿言架啦，你地搞埋咁多小動作，搞到佢咁傷心。」
 
「對唔住啦..我都唔知會搞到咁。」
 
「對唔住唔係同我講嘅，唔知都唔係大曬，唔該你地做嘢之前諗下後果，唔係義字當頭就大撚曬架。」
 
只見阿言係咁點頭，咩嘢都唔敢講，俾著平時佢已經反咗枱，阿晴果然御男友有術。


 
睇黎今次我地真係做得好錯好錯。