我只不過喺自修室溫書，點知比我遇番佢。: <四十>日常
開咗學之後，就代表距離DSE嘅日子越來越近，所以我同小涼、小霖都重返自修室，一切開始嘅地方。
其實只係兩個月冇去，但你已經有種重遊故地嘅感覺，而黎近呢半年我地又會喺到征戰好多個晚上。
「嗯~好耐冇黎啦，個感覺好熟悉啊！」小涼一入到黎就講。
「有幾耐啊，咪最多兩個月。」我講。
「兩個月已經好耐架啦！可以改變好多嘢！」佢唔服氣咁講。
「咁又係嘅，至少我地都關係都唔同咗囉可？」
「哼，我唔想應你喎死人頭！」又喺到鬥氣，不過同佢一齊最開心就係呢啲時刻。
「喂喂喂，你地當我死架，又喺到鬥花槍！」小霖都冇我地收。
「你都有機會嘅，嘻嘻。」我講。
「咪係，有支好籌喺你面前啊！」小涼一個神助攻！
「溫書啦溫書啦，唉。」小霖好怕羞，哈哈。
溫溫下，唔知突然我諗起阿月，唔知佢而家點。
「唔知阿月而家點呢？」諗諗下唔知點解講埋出黎。
「可能喺屋企受緊苦，哈哈。」小霖都笑咗出黎。
「阿月做咩啊？」小涼未知咩事，所以問。
之後我地就講咗插班生件事俾佢聽。
「吓，咁搞笑？中六都仲有插班？」
「所以靠父幹係幾咁重要呢。」
「希望佢地可以好好相處啦..哈哈哈哈。」小涼講完都忍唔住笑。
呢次好似係我地第一次可以咁開懷，咁輕鬆咁一齊溫書，我相信日後都可以。
而第二朝番到學校..
「阿月阿月，快啲話我聽點解啦！」番到去冇耐，已經見到插班生吊住正在入課室嘅阿月尾又煩住佢，雖然係煩咗啲，但係見到阿月個樣真係好好笑！
「我叫你靜靜地諗下先，唔好煩住我啦，我去廁所。」
我地都跟埋佢去廁所，問下佢咩事，順便笑尻下佢。
「哈哈哈..你又講咗…啲咩搞到佢..又煩住你？」一去到廁所阿星已經忍唔住笑咗出黎。
「原本我諗住問佢條問題，等佢慢慢諗唔會煩住我，點知..屌！」
「你問佢咩？」
「我問佢1+1幾時等如4之麻..」
「哈哈哈哈哈..呢啲乜嘢白痴問題黎！」我地幾個都笑到碌落地咁制。
「兄弟，你都係死咗條心去啦..哈哈哈..佢一定會煩死你架啦！」我一邊笑一邊講。
「妖，兄弟，我不如搵棵菜做兄弟！」阿月講。
「唔係你想點..你唔推個婚約？」阿星問。
「有得揀我都想，我老豆點會制。」
「咁如果係佢主動取消呢？」阿言講。
「噢..？」
番到去之後，阿靜就衝過黎講：「阿月！我諗到啦！！寫曬1+1出黎咪變個王字，王字有4劃！」
「哈哈哈哈哈哈！」我地再一次笑到崩潰，學霸同學霸之間就係咁溝通架啦？
「藍靜小姐，好嘢好嘢！」阿星走埋去拍一拍佢膊頭，我地有樣學樣。
「下..？唔啱咩？」
阿月即刻暈死當場。
而到咗小息，我地班再度變得人山人海，又係分曬男女兩派，佢地各自為阿靜同阿月組成親衛隊。
「藍靜，你接受我啦！我好鐘意你啊！」只係一個禮拜姐..有冇咁兒戲。
「阿月！唔好受個妖精誘惑啊！」阿月啲FANS都採取行動。
「你地死咗條心啦！我淨係會同月月一齊！你地全部走啊！」阿靜捉實阿月手臂。
呢個藍靜又都幾把炮，一句說話就鬧曬兩班人。
「妖。」阿月一嘢fing開佢。
從此我地班就成為世界大戰嘅地方，作為兄弟嘅..我地都愛莫能助。
禮拜六嘅朝早，原本係唔存在嘅..我指我係會瞓過咗。
點知黎明無情嘅聲音喺空氣中劃過，將我從夢中拉回到現實。
「隨時愛相見 便見面 未怕疏遠了十萬年..」
「喂…..邊個..啊」睡眼惺忪嘅我接過咗電話。
「死人頭，仲唔起身！」
「冇呢個人啊..打錯啊..」
「費子楓！！！」
「係…係！」WTF，就黎耳膜都穿。
「作死啊？去溫書啦仲瞓！」
「難得放假咁早...瞓多陣啦小涼大人。」
「又係你尋晚叫我剷醒你嘅，快啲啦，一陣晏咗又冇位啦。」又好似真係我叫，大家唔好怪小涼,哈哈。
「係係係..咁我一陣去你樓下等啦..」
「好啦..你唔好又瞓番喎..」突然把聲又咁溫柔，真係難捉摸。
.
.
「今晚一齊食嘢啊，屋企冇煮飯。」小涼行緊去自修室果陣同我講。
「好啊，食咩？」
「到果陣先算啦。」
「咁等我話定俾阿媽聽。」
行到入自修室果陣，我地見到個又有趣，又期待已久嘅畫面...
小霖竟然喺到摸阿豪個頭！
小霖竟然喺到摸阿豪個頭！
小霖竟然喺到摸阿豪個頭！
咁突破性嘅發展好重要，所以要講三次。
「喲，肥佬，黎我球場玩都唔同我講聲，你好啊你。」我地行埋去，邊行邊竊笑。
佢地即刻扮到冇嘢，坐到直一直。
「咩..咩..咩啊，我有嘢唔識，咪...咪..咪叫小霖教我。」
「哦...有.有..有嘢唔識..哈哈哈。」我同小涼扮明白咁講。
「你地洗唔洗咁夾啊..」佢笑番我地轉頭。
「你羨慕嘅自己培養下。」我駁番佢。
「你地唔好亂講啦..」小霖又開始怕醜。
之後我地四個就開始溫書，呢種感覺幾好，有班朋友喺自己身邊溫，大家唔嘈住大家，默默地互相鼓勵，間唔中溫到攰就傾幾句計，溫都溫得特別入腦，而且時間都過得特別快。
「呃！不如我地搵一年嘅MC一齊做，睇下邊個做得啱最多啦！」小涼突然講，不過都係個好提議。
「你真係玩我姐..」我講。
「哼，阿楓實輸緊。」啦大家，溝女還溝女，呢隻肥嘢嘅本性冇因此而消失，佢依然好鐘意串我。
不過佢燃起咗我鬥志，睇住黎啦肥佬！
如是者，喺呢個幾鐘入面，我地就埋頭喺自己嘅領域計數，呢種良性競爭我喜歡。
「好！夠鐘！」
「唉屌！仲爭2題。」...你地實以為係我講呢，哼。
「剛剛好。」我緩緩講出呢幾個字，嚇得阿豪呢。
最後一齊對答案，54題入面，小霖最勁，啱咗47題，小涼都唔差，有45題。
「唉呀..爭少少。」小涼講。
「唔係啊，你都好勁架啦。」小霖永遠都係咁謙虛。
「點呀廢紙哥，實炒到PK啦。」阿豪又黎挑釁我。
「你顧掂你自己先啦！40題啊！」
「什麼？！？！竟然同我一樣？」佢難以置信...不過我都係。
「哼，唔係你估啊死肥佬。」
「嘩，阿楓你進步得好快啊。」小涼講。
都係嘅，短短幾個月，我由一個數學白痴，慢慢搵番做數嘅信心，都係因為小霖同小涼嘅支持。冇咗佢地，我諗我數學U硬。
「費時俾啲人睇唔起啊嘛。」我睥住阿豪，當然冇咩惡意。
「算，下次實砌低你。」佢不甘示弱。
「哈哈哈。」小霖突然喺到笑。
「你兩條友十幾歲人仲喺到鬥氣，無唔無聊啲。」
「呢個係面子問題！」我同阿豪同時吶喊。
「殊.....」fuck，呢次真係冇曬面子。