我只不過喺自修室溫書，點知比我遇番佢。: <五十五>付之一炬
又係要番學嘅日子了，呢個開學日就好似炸彈咁。
一番到去，就見到一個好震撼嘅畫面。
阿星終於有拖拍，而個對象仲要係鄭子妮！
「Wow阿星好嘢喎！原來你一直就係溝緊子妮！」阿月講。
「乜你地.. 睇唔出架咩，呵呵！」洗唔洗咁牙擦，不過係開心事黎嘅！
「子妮，你好自為之。」阿言講，貫徹佢毒舌作風。
「旅行果陣都估到你地有啲嘢架啦！」阿靜講。
「咁都睇到？」子妮好愕然咁問。
「冇嘢逃得過我法眼嘅！」
仿佛全世界都為佢地而開心，唯獨有一個人只係默默望住佢地。
係有事發生啦，仲要係破壞氣氛嘅事，所以我都係小息先睇下佢咩事。
到咗小息，阿星嘅事逐漸淡化，我地幾個圍住阿豪。
「做咩啊..」阿豪望住個窗，死曬氣咁問我地。
「你做咩就真啊。」阿言問。
「衰咗啦…白費曬啦…」佢答，果然始終發生咗。
我望一望小霖，佢望番過黎，點一點頭，示意係真嘅。
「你係話小霖..」阿月猜想，根據番上次佢發現阿豪想表白。
「係..」
雖然係意料之中，但係聽到之後都有啲震驚。
「點解會咁嘅？」阿星問。
「唔知啊..果日一倒完數番去我就瞓咗，起身就見到小霖嘅訊息，佢話唔想我因為佢而影響DSE，叫我專心考好個試，仲多謝我對佢嘅付出，佢話佢係感受到，但係唔想再耽誤我喎..」
「咁你諗住點？」我問。
「唔知啊…順其自然啦，都要考試架啦，咁唯有盡快收拾心情啦..」好彩佢冇諗歪姐。
「至於佢..忘記到就忘啦。」
一隻鷹喺天空飛過，將阿豪呢個月嘅付出，一併帶走。
唯有祝福佢同埋幫助佢走出陰霾啦…
放學之後，我諗住佢地邊個去星矢吧，點知阿豪話想番屋企溫書，小霖要去圖書館，阿靜要同佢屋企人食飯，阿星、阿言兩pair人各自拍拖。
得番我同阿月兩支公..唉屌。
「做咩姐，好唔想同我去咩！」佢喺我隔離問，我諗咩佢都知？
「有得揀唔太想，哈哈！」開玩笑姐。
「你一早知阿豪會衰？」佢突然好正經咁問我。
「下…啊..係嘅….」佢點知架？
「你一直咁落力幫佢地，果日你竟然話順其自然估到啦。」嘩，你又知我諗乜？！
「其實係小霖叫我唔好周圍講嘅，咁我覺得我講俾阿豪聽同小霖親口講都好似冇咩分別咁，咁咪由小霖自己講囉，費事阿豪覺得我挑撥離間啦，況且要我講都講唔出口。」
「你又啱嘅..」好彩佢同意姐。
「唉，希望佢地兩個可以搵到佢地真命天子啦，佢地啲愛情運好多都爭咗啲咁。」佢講。
「呢啲嘢，有又煩，冇又煩架姐。你感受緊你知架。」
「係就係咁講..但係遇到個你鐘意佢，佢又鐘意你嘅其實都唔錯，你會喺佢身上見到自己有咩缺點，再為佢去改善。」
「雖然有時煩就煩咗啲，但係諗番起其實佢都幾可愛啊！」阿月一路講，一路含春咁笑，肯定又諗起阿靜啦。
不過阿靜真係改變阿月好多，至少佢成個人開朗咗，肯講下自己嘅諗法，唔再收埋收埋。
小涼呢？我唔知我嘅出現令佢有咩改變，但至少佢令我改變唔少。
佢令我變得有承擔咗，承擔住我同佢嘅未來，令我做任何事前都會諗下後果，唔會再一味橫衝直撞。
亦令我知道，就算全世界唔支持我，都有佢喺到。
「隨時愛相見 便見面 未怕疏遠了十萬年…」
係個傻妹，我地真係心有靈犀。
「喂？死人頭，做緊咩啊？」
「諗緊你囉！」真心的。
「又口花花..講真啦！」
「同阿月去緊星矢吧之麻，打黎做咩啊？」
「想問下你夜晚食唔食飯之麻，屋企冇煮飯。」
「上我屋企食囉，同我阿媽講聲咪得。」
「吓，會唔會勞煩佢啊？」
「佢當你新抱咁啦而加，點會。」
「哈哈，係咩？好啦，咁我打去同佢講。拜拜。」
「嘩~~好sweet啊。」阿月喺側邊笑我。
「扮啦你，你地平時咪仲sweet過我。」
「行啦，屌你！天就黑啦，費時阻你交人啦！」
我地肩並肩，一齊向住夕陽走，諗番起都覺得…gay..
「坐啦坐啦小涼，唔洗客氣架！」阿媽講。
「你唔洗客氣就真啦Auntie，洗唔洗我幫下手煮？」
「唔洗唔洗，衰仔，招呼下人地啦。」我都唔明，由唔係第一次上黎，洗乜咁客氣？
不過都好，至少唔會有糾紛就得。
「係啦..阿豪佢..衰咗啦。」等緊食飯果陣我講。
「下..佢表咗白啊..？」
「唔係。冇表到已經衰咗。」
「真係可惜啊..佢做咗咁多嘢..」佢個表情都表現得好可惜。
「係囉，有時真係付出太多都未必有結果。」
「你睇你幾幸福，有個咁好嘅男朋友。」我講。
「嘩，有人好厚面皮囉！」佢笑笑口咁講。
食完飯之後，我地就落番自修室溫書，咁啱小霖都喺到。
「喂，小霖！」我嗌佢。
「咦，咁晏嘅你地？」
「食完飯先落黎啊嘛。」
「哦…….」
「點解咁快就..」我一坐低就長驅直入咁問。
「好簡單，我地一直忽略咗一樣嘢。」
「忽略咗..咩？」
「就係佢如果表白起上黎，根本冇得避。」
「所以與其等佢開口不如同佢講清楚？」我問。
「就係咁。」
聽落個理由好簡單粗暴，但實情充斥住好多雜質。
講果個會有好多顧慮，講出黎果陣要有好大勇氣；聽果個又要承受痛苦嘅折磨。旁人亦都感到唏噓同無奈。
畢竟每一個人對另一個人付出嘅愛都係經過好長時間同好大精力嘅消耗，所以求愛失敗對精神係好大嘅損害。
「你地睇住佢啦，唔好被佢頹落去啊，唔好俾佢影響到個考試。」
從來人拒愛都係唔想被人影響到自己，唔想被人阻住自己搵食，但係好似小霖咁，拒愛後仍然咁顧被拒者感受，每一步都想將傷害減到最低就真係碩果僅存。
只能可惜阿豪冇福份去得到佢嘅愛。