終於完咗個垃圾DSE,可以盡情享受下個假期!
 
考完之後第一日,我瞓到成2,3點先起身。我覺得唔咁樣瞓餐飽對唔住自己囉。
 
醒咗之後見到阿言打過黎,少有喎。
 
「喂,點啊言少?」我打番過去。
 
「喂屌你去咗邊,而家先蒲頭?」
 


「瞓教啊嘛大佬,做咩姐?」
 
「今晚黎我屋企食飯啊,阿月阿豪都會黎。」
 
「不過你自己黎好啦喎。」
 
「哦,得啦。」奇奇怪怪咁。
 
之後我就打俾小涼。
 


「阿言佢好似奇奇怪怪咁,唔知佢做咩。」
 
「係咩?佢都唔會做啲咩架啦,你咪去囉。」
 
點解佢反應咁平淡咁?
 
到咗六點鐘,我就去咗阿言又一村間屋,對於佢間屋,三個字,好撚大。
 
雖然我就唔係第一次去,但係每次去都覺得葡萄。
 


「搞咩啊?又話阿月佢地都黎嘅?」我問佢。
 
「唔咁講..點tum你黎啊?」佢一步一步行埋黎,好似想殺人咁。
 
「做..做..做咩?」好驚喎大佬。
 
「你知嘛..我一直好想..」佢仍然不斷咁行埋黎,一直放喺後面嘅手仲緩緩舉起。
 
「唔好!」我直覺佢想傷害我,即刻擰歪面用手擋一擋。
 
「嘭!」嘩屌!咩事??
 
 
「嗚呼!生日快樂!!」佢地成班喺二樓衝落黎,原來頭先係拉炮聲。
 


「哈哈哈,膠刀黎炸傻仔!」阿言笑到停唔到。
 
「估唔到你咁細膽!哈哈。」阿豪又係,屌。
 
「我生日過咗耐啦喎!」
 
「之前考試嘛,咪今日幫你補番囉,都算係咁啦掛。」阿晴講。
 
班友都幾有心。
 
「連你都瞞住我!」我指住小涼,佢都喺佢地當中。
 
「嘻嘻,唔係點樣叫驚喜啊?唔好嬲啦。」咁我又唔嬲,咪睇到我咁小器。
 
「不過頭先你個反應真係好好笑。」小霖講。


 
之後阿靜就拎個電話出黎,原來佢地頭先拍低曬..
 
「唔好!」
「唔好!」
「唔好!」
 
佢地係咁重複呢一到,之後係咁笑尻我。
 
「哈哈哈,原來廢紙你咁細膽,我都係而加先知!」連子妮都黎埋,佢都加入成為我地一分子。
 
就係咁,我地10個人就喺阿言間屋到玩同補祝我生日。
 
「嘩阿言,部機好正啊!」阿月同阿星講。
 


阿言屋企有部燒烤機,就咁放啲嘢想去就燒得,好方便,我地又可以喺室內一邊玩一邊食。
 
不過阿言就做咗我地成晚廚師,服侍我地。
 
「你去玩啦,等我黎燒。」阿晴講,好一個一百分女友。
 
「一齊啦,點捨得你咁辛苦。」媽啊,好骨痺。
 
「擇到七啊!你飲啦!」阿豪對住小涼嗌。
 
我地玩緊個擇骰飲酒嘅遊戲,輪流用兩粒骰黎擇,兩粒骰總和係單數就可以指一個人黎飲酒,雙數就自己飲,兩粒骰一樣就要飲雙倍。
 
「吓..又飲啊..」
 
「我黎飲!」呢個時候,男朋友梗係要挺身而出。


 
「唔洗!」之後佢就一飲而盡,真係一個鐵娘子!
 
「好,到我擇!睇我點擇到單數啦」阿星講。
 
「哈哈哈哈!」我地爆笑,佢擇到雙六,要飲雙倍。
 
「屌!飲咪飲!」
 
「食啦!食完先再玩啦!」阿言同阿晴叫。
 
「嘩,掂啊,好入味!」我地一路食一路讚,其實同韓燒好似,但係成本就低好多。
 
「阿楓,你食呢個啊,雞翼你鐘意食!」小涼夾俾我。
 
「嚼、嚼..正啊,甜到漏!」其實落得太多蜜糖..
 
食完之後我地玩多咗陣就切蛋糕。
 
「等陣!小涼一齊啦,佢都係4月生日。」我講。
 
「係喎係喎,一齊吹啦你地,啱曬。」阿星講。
 
就係咁我地就一齊吹咗我地識咗之後嘅第一個蛋糕,又多一樣值得我地留念嘅嘢。
 
我地玩到三點幾先走,個個都飲到好醉,好彩我同小涼都算係清醒,但係小霖就..
 
「啊!今日好開心啊!」我地截的士果陣,佢喺到大嗌。
 
我即刻摁住佢個口,費事被人掟花樽。
 
「佢好醉啊..」小涼講。
 
「係囉,都唔知點解。」
 
「嗯..嗯..潑!」oh shit,掛住摁住佢個口,佢突然嘔咗出黎,搞到我成隻手污糟曬。
 
「嘩..頂..」靚女啲嘔吐物都污糟架大佬。
 
「你扶住佢先啦,我幫你用水沖下佢。」小涼喺個袋拎咗個水樽出黎,倒落我隻手到沖,再幫我抹走去。
 
都真係..需要好大勇氣先做到。
 
上到的士之後,我地三個坐喺後座,我地兩個夾住小霖,費時佢坐門邊亂咁黎。
 
佢一直挨住我瞓,仲不時喺到嗌我個名,又喺到傻笑。
 
「阿楓啊..」小涼嗌我。
 
「你覺唔覺小霖好似好唔開心?」
 
「嗯..?有咩?」
 
「我覺得佢好似有好多嘢壓抑自己。」
 
「唔知啊..人人都有自己嘅煩惱架啦。」
 
「如果佢嘅煩惱係因為你呢?」
 
「點會啊,佢都應該放低咗我啦。」其實我唔知,但係當然當係。
 
「嗯..或者啦..」
 
我地夾手夾腳送咗小霖番去之後,我先送小涼番去。
 
「你咁夜番去你父母唔會鬧啊?」我問佢。
 
「唔會啦,我同佢地講有你喺到佢地都放心。」
 
「咁又係啊,我咁有安全感,哈哈。」
 
「係啦,叻啦!你激少我一陣都偷笑。」
 
「放心啦,我對你只會一心一意架炸!頭先嘅嘢..你唔好亂諗啦。」我講。
 
「我冇亂諗啊,我信得過你喎。」
 
「咁就得啦,你上到去早啲瞓啦,聽朝再搵你啦,睇下搵咩地方想去再陪你去啦。」
 
「嗯~好啊,拜拜!」
 
番到去果陣,其實頭先小涼喺的士嘅問題都好難唔諗,我相信小涼都係。不過無論真相係點,我都唔會改變我嘅心意,我相信小涼都係。