我只不過喺自修室溫書，點知比我遇番佢。: <六十>尋回記憶的旅程(四)

「啦，我地今次又玩下大冒險！」阿星講，我地沖好曬涼之後又圍埋一齊玩。
 
「不過就唔咁麻煩，每人派一張牌，其中有兩張就一樣嘅，邊個抽到一樣嘅牌就要懲罰！」
 
「下，嘩咁咪每輪都有2個人輸？」阿晴問。
 
「咁樣先刺激啊，阿星可！」子妮講，哦~玩夫唱婦隨咁話。
 
「咪係！啦，我派啦。」
 


「一、二、三，開啊！」
 
之後我地一齊開牌，不知是否天意弄人，還是真係有緣份，第一鋪竟然阿言同阿晴抽到一樣嘅牌！
 
「Wowww！合巹交杯，之後po IG！」阿星嗌！
 
「咁有幾難？」阿言講。
 
「係喎..咁諗過個！」
 


「痴線，邊可以諗過個。」佢反駁。
 
「咁算！照做！」阿星相當冇癮。
 
果然兩口子嘅吸like力特強，淨係阿晴IG喺10分鐘內已經有50個讚，阿言嘅更加唔洗講。
 
其實每一輪大家都好驚，驚抽到唔知同邊個會做埋啲核突嘢。
 
譬如有一輪阿星要舉起阿豪隻腳黎聞，仲要扮曬好享受咁，俾我地拍曬片又剩。
 


又有一次阿月要用whatsapp錄音同阿靜講嘢，子妮要突然大嗌月月BB咁樣，阿靜又咁啱真係信阿月有景轟，搞到佢要解釋幾耐。
 
又到咗新一輪，今次係阿晴同阿豪抽中。
 
「阿晴你揹住阿豪由一樓行番上黎，來回3次！」阿月講，估唔到咁毒….
 
雖知道阿豪都唔輕，唔係點叫肥豪。
 
「你想我死姐..」阿晴講，呢句真，呢到大大話話都三樓。
 
「快啲快啲！」阿星起哄，子妮又附和，加埋阿月喺到助興。
 
望住阿晴咁樣揹住阿豪，我都為佢眼淚在心裏流啊。
 
阿言都愛莫能助。


 
「嗶..唔掂..抖抖先大佬！」阿晴行完扯曬氣咁講。
 
死火啦，阿晴一抖，抽中嘅機會率又再大啲...
 
嘩我屌！真係賭大細都冇咁易中，真係到我！
 
而另一個就係..
 
就係阿月啊屌！阿豪實玩死我地啦！
 
我地兩個企起身，一副就黎受死嘅款。
 
「你地互相千年殺對方！唔痛唔收貨 ！」我實在太了解呢個人！
 


「準備好未啊..蕭皓月？」我問佢，佢已經兀起咗個屎忽。
 
「千年殺！！」我大嗌之後就用力咁隊落去。
 
「啊！！」佢嘅嗌聲真係響徹雲霄，足以嗌醒嫦娥咁制，佢地其餘都笑到見牙唔見眼。
 
至於我...skip咗去啦。
 
然後我地再玩多咗幾輪，然後到今次抽中咗我同小霖。
 
「嗯...你地咬住百力枝兩端，咬到得番2CM！」阿言唔知邊到拎咗包百力滋出黎。
 
「咁樣....」我講。
 
「好啊，黎啦！」小霖反而好爽快講。


 
「嚼、嚼、嚼..」我地一啖一啖咁食，食掉百力滋，亦食掉我地嘅距離。
 
我地嘅頭慢慢慢咁貼近....
 
每前一吋，我就愈緊張，我見到佢塊面都紅曬咁。
 
我望住佢果陣，真係俾佢怕怕醜醜個樣..有啲電親，我嘅心跳又好似快到一個新速度。
 
到咬碎枝百力滋果一刻..直情好似心臟頓時都停埋咁。
 
我同佢嘅嘴唇..好似真係有意無意咁..觸碰咗一下。
 
我地分番開之後，條百力滋有幾長根本已經唔重要，佢地望住我地兩個就黎腦充血嘅樣都靜曬。
 


「我..去一去廁所。」我即刻跑入廁所洗面，將成舍人降下溫，亦都冷靜下自己。
 
「唔好亂諗唔好亂諗！」我個腦係咁諗住小涼，要記住唔可以做啲對唔住佢嘅事！
 
我諗頭先果一刻只係錯覺黎姐！
 
到我行番上去搵佢地，阿晴咁啱落樓。
 
「你唔好亂黎啊，你要諗下小涼，同埋小霖好辛苦先忘記你。」我地擦身而過果一刻佢講。
 
「得啦，我好清楚。」
 
上到去之後，原來佢地都各自番咗房，我番到房之後，望住小霖都面面相覷，唔係好自然咁。
 
「哈哈..瞓囉！」我好努力嘗試變得自然，但反之更為突兀。
 
「好啊..」
 
上到床之後我地都各自愣開咗，冇講嘢。
 
我望住部電話，小涼原來一個鐘之前send過訊息黎。
 
「點啊，今日去過邊？有冇曳啊！」
 
「去過好多地方啊，聽日話你知，同埋梗係冇啦！」唔算掛應該？