二百尺的同居生活（完）（SP二章更新）: 第四十七章 - 二人之幸運
眼前的她慢慢向我過來，而當她愈是走近，我的反應也變得愈閃縮。因為此刻，我感受到一種非常強烈的預感。
一直以來糾纏不清的關係。現在，也許是時候作個了斷。
[樂樂做咩落咗嚟嘅？]
[我有啲事，要出一出去… ]
[你去邊呀？依家咁凍你得件外套會凍親㗎。我地返上去先啦，之後我再陪你去啦~ ]她拉起我的右手打算把我帶走，可是我卻沒有跟隨她的步伐，沒有移動半分。
[樂樂？… ]察覺異樣的她回望了我
[我，唔可以返上去…嗰個地方，我一定要去咗先。]我直視她雙眼，接著把她拉着我的手移開。
她看著被我移開的手，面上收起一直的笑容。我知道，她已經猜到答案。我所說的地方，以及正在發生的狀況。
[你要去佢到… 係咪？]她低下頭問着
我沒有直接回應，只是點了一下頭。
[明明佢已經離開咗你，點解你仲有去搵佢？]
[因為我知道，佢仲好需要我係身邊。]
[佢需要你… 咁我呢… 你知唔知，同你分開依十年我每一日都唸住你，無論生活幾辛苦幾難過我都一直支持落去，就係為咗有一日可以返嚟見你。唔通我就唔需要你係身邊？… ]她畢直的看著我，就像在告訴我這句話的份量有多重一樣。
[敏敏… ]
[樂樂，話俾我知… 我到底有乜野唔好，有乜野比唔上佢？點解我唔可以做你身邊嗰個？ ]
[我真係，無可能代替佢？… ]
她的所有的感受，終於傳達過來。這就是，她最真實的情意，最真實的，心底話~
[敏敏~ ]我觸碰她的肩膊，同時，她害怕接著真相的意識使身體發出抖震，並從肩上傳到我雙手手心。
[你無野比唔上佢~ 老實講你好多野都比佢更好~ ]
[咁，你點解唔揀我？… ]
[因為~ 佢唔同你~ 佢，係一個蠢材嚟~ ]
[吓？… ]
[從來唔識為自已着想，做乜都只會為咗滿足其他人。明明讀書好醒，但人際關係就攞0分。好多野都唔鍾意，但自已鍾意嘅野就永遠唔會講出口，成日喊又成日發脾氣。佢真係無野比得上你~ 但係，只要佢係我身邊~ 我先可以做到，我最想做同最期待嘅自己~ ]
聽着的她不解的看著我。
[你究竟係到講咩… ]
[我都唔知自己講咩~ 只係，依個就係我對佢，對你，同埋我自己嘅答案~ ]
她沒有回應，只是默默低下頭的失落，我把觸碰她肩膊的右手舉起放到她的頭上。而她亦對我的行動起了反應，慢慢把頭抬起看我。
[樂樂… ]
[敏敏，你的確無可能代替佢。但係唔係因為佢有咩野比你好，或者你有咩野做得唔好~ 而係因為你就係你，你係只屬於你自己，世界上獨一無二嘅藤宫 . 敏~ 所以你無可能代替佢，亦唔需要咁做~ 你從一開始就已經係個特別嘅人~]
[但係… 咁樣…我就唔可以再留係你身邊，你都唔會再支持我……]
[你講乜野？~ 緊係唔會啦~]
她對我的回應一時反應不來。
[你唔記得我係你邊個咩？]
[你係我嘅……]
[我係你嘅青梅竹馬，同時都係你表哥~ 我地係一家人。只要你需要嘅話，我一定會係你身邊一直支持你，一直做你嘅依靠。敏敏~你係我最重要嘅屋企人~ 亦係我最鍾意嘅表妹嚟~ ]
[樂樂… ~]她的面上終於露出微笑~
[敏敏，依家我…好想去帶佢返嚟…想去佢身邊，你可唔可以都支持住我，等我可以行到去之後嘅路？]她看一看我的眼，接著說
[我…可以~ 因為，我係你最重要嘅屋企人~ 係咪？ ]
[敏敏~ ]
[樂樂，作為你嘅屋企人，我講一件好事你知~ ]
接著她把一切也告訴我，包括她跟芷欣私下見面的事。全部，也告訴我~
[原來係咁… 咁我就更加要去。多謝你話我知，我行喇！]我正想轉身走去時。
[等等！]
[做咩呀？]
她走到我面前，把自己身上的黑色頸巾帶到我身上。
[你未到已經凍死咗喇，帶住去啦~ ]她淺笑說
[敏敏~ ]
[啪~~]她一手打到我的背上
[得喇，走啦~ ]
[嗯~ byby~ ] 我回頭別過她，接著全速走向車站。
[屋企人…依個就係你嘅答案…………] 背後的她，說着。同時…… 無聲暗泣。
………………………………
屯門一座私人樓宇下的行人路，她與她的父親正向着大廈的入口走去。
[daddy你有幾耐無試過食我煮嘅野呀？]她看著手上的材料說着
[幾耐？應該都三四年喇。]
[咁你今晚一定要同我食曬佢呀，唔準有剩㗎。]
[哦… ]
他看看身旁的女兒，面容沒有明顯的不妥，但卻令人為她而不安。接著他用擔心的語氣問着。
[女，其實你真係……]他話到一半
[daddy，我無事，唔好再講… ]她則著面說
[daddy明嘅。]他回，接著眼睛從她身上轉回到前方，而當他望回眼前的路段時。
[女呀，等我拎啦。]他把她手上的食材通通搶過來。
[唔使啦daddy。]
[要嘅要嘅，我唔幫你拎，你又點走呢~ ]
[吓？]她不解的看著直望向前的他，接著她也跟隨他的視線望向前方。終於發現另一個他。
我~
我快步上前一手捉住芷欣的手腕，接著直接把她拉走。
[喂！你想點呀！]她用力掙扎著，但卻無法逃脫。
[我要帶你返去。]
[放手！你捉到我好痛呀！]
聽到這句話，我反射動作的放開了手。並轉身面對她。
[你係咪痴線㗎！咁樣拉人走！]
[sorry……]
她無奈的看著道歉的我，而我也尷尬得不敢作聲
[你走嚟做咩… ]
[我咪講咗囉，我要帶你返去。]我從尷尬的氣氛中復活，並一面認真的說著。
[封信已經講得好清楚啦，我地已經無可能… ]她則起面說，明顯的，我看得到，這絕對不是實話。
[真係咁？]
我慢慢接近她，而發現我的她慢慢退後，可惜依然被我捉到她的手臂。被捉住的她只是一直回避我的視線。
[李芷欣你望住我！]
我大叫一聲，她終於願意跟我對視。
[你真係捨得就咁走咗去？]
[係……]她輕聲回應
[唔係咁…]我深呼吸一下繼續下去。
[欣~ sorry，我令你咁傷心，令你咁驚… ]
[你… 係到講咩呀……]她驚訝的看著我
[呀敏佢已經講曬我知… 你會走係因為我。係咪~ ]
她沒有回答，只是一直則起面來，非常非常害怕繼續面對我。
[我好開心~ ]我微笑的說
[吓？]她一面不解的看著我
[你知唔知，我之前一直都好驚。我不停唸緊，你會唔會已經嬲到以後都唔想再見到我。所以我變到唔敢同你講野，亦都唔敢同你道歉。最後我地變成完全唔關心對方，就好似陌生人咁… ]
[但係，當我聽到你離開其實係為咗我，我真係好開心。因為我知道，我依然係你個心入面一個好重要嘅地方。重要到，你願意為咗我而離開~ ]
她的眼睛一直看著我，就好像在叫我不要再說下去一樣。可惜，這一次，我是不會聽話的~
[欣，無論係之前我傷你心嘅事，定係今次令你擔心嘅事都好，我都希望你可以再俾多次機會我~ 返嚟我身邊啦~]
[唔可以… 唔可以呀… ]她不斷的搖頭，令人一眼看穿她內心的掙扎。是個非常痛苦的掙扎…
[欣… ]
[我唔可以返去… 只要我係你身邊，你一定會受傷。我唔想你好似媽咪咁，永遠係我眼前消失。我唔要咁… 我已經決定咗要走… 求下你，唔好再理我… ]
她的聲音正在抖震著，令我也不禁心痛起來。但是… 不能停下，現在放棄的話。她便會永遠消失在我的生活之中。無論多痛苦也好，多心痛也好。我，絕對不能停下。
[你話你決定咗要走，咁點解，你仲要帶住呢條鏈呀？]我看著她頸上帶着的海豚頸鏈，她所留給我的最後希望~
[我… ]
[點解要帶走佢，你都決定咗要走，做乜唔留低佢？… ]
[我唔知… 我唔知… ]她舉手遮著這條頸鏈
[或者真係好似你講嘅咁，我可能會因為你而受傷。又可能我會係你眼前消失。如果咁樣真係命運嘅話… ]我溫柔地牽起她的手。
[唔好… 求下你，放開我……]
[我無用到力，想放嘅，你可以放~ ]
[衰人… 你明知我做唔到……]
[我晤係知道~ 我只係信你~ ]
[欣，如果真係咁嘅話，我就用我嘅幸運尼反轉依個命運，等我嚟帶走你嘅不幸~ 然後等我，去成為你嘅幸運~ ]
我看著眼前淚水早已滿瀉的她，把最真誠的話語奉獻着。
[你係…認真嘅…… ]
[我幾時都係認真~ ]
我抱緊她的腰，漸漸的拉近着。
[芷欣~ 返嚟我度啦~ ]
[我真係… 可以咩……]
[只要你願意就可以~ ]
我們把最後的距離消去，雙唇久違的吻在一起。一切也令人窩心，同時令人興奮。現在，我倆也同樣地享受，享受著對方這份確確實實的存在，以及這份只屬於我們兩人的幸運~