[深夜重口味] ABC 女教師的性事: 哭泣的遊戲

話說我 (Celestine Leung) 同 David 終於發生咗關係，經過徹夜纏綿我地靈慾一致，點知朝早準備再度交歡時，Katy 突然返嚟撞破我地...

「就係咁囉，Sylvia，你話點算?」
「咁你地又離譜啲嘅，嚮個女仔面前搞野，應該返入房嘛。」
「咪講咗唔想見到張結婚相囉。」
「咁都係第一次先要避啫，第二三次無所謂啦... 都唔知個女仔會唔會有陰影添?」
「唔會啩?」
「你試下換轉係自己? 一返入屋見到自己爹地唔著衫攬住個女人嚮度啜，你點諗?」
「唉...」
「不過依家最重要係個爹地點處理，同埋你當時唔好走吖嘛，既然你話個女仔本來都喜歡你，你應該留低幫手氹啦。」


「你唔知啦 Sylvia，當時佢喊得好激動，我變咗衰人咁，唔走點得喎?」
「咁個爹地揾番你未?」
「未呀，仲未有電話，可能仲氹緊啩。」
「嗯，個爹地會唔會借個女唔接受你做籍口，乘機飛你，趙完鬆?」
「唔會，我唔信佢係咁嘅人。」
「不過就算係都無所謂啦，至少你地開心咗成晚，好過我同 Derek 咁若即若離。」
唉，佢一提馬公子我就頭痛...
「我都唔知佢仲當唔當我係女朋友?」
女朋友? 你幾時做咗女朋友?
「明明又成日陪我，又帶我去見佢啲 friend，點解仲唔搞我?」


人地係 gay 點搞你呢?
「唔通佢係 gay?」
Bingo!
「唔會! 佢一定唔係 gay，gay 佬感覺唔係咁。」
Oops...
「唔通... 一直只係我表錯情?」
咪係囉!
「諗番，佢好似好小同其他人提起我嘅，好似講你仲多過講我...」
做乜燒埋我果疊?
「Sylvia，唔好講馬公子好唔好? 講番先我啦，我依家點算...」


Sylvia 係好謹慎嘅人，不過都幾負面，佢分析我同 David 已經玩完。
直到深夜，終於接到 David 電話...
「David，點呀? Katy 點呀?」
「佢依家瞓咗，不過我唔敢講太耐，佢唔畀我搵你架。」
「佢係咪好憎我?」
「佢... 唔... 咁...」
「我都估到嘅，不過有冇連慮埋你?」
「Celestine，唔好咁講啦，我都有責任架。」
「咁我係咪暫時唔可以見 Katy? 我好想親自向佢道歉，同佢解釋清楚。」
「我諗要佢過咗啖氣先，放心啦，我會努力令佢接受你嘅。」
突然我個心好暖。
「而且好消息係 Katy 外婆，即係我外母，都唔反對我地一齊。」
「真係? Thanks god!」
「佢冇明示，不過佢話我呢一年好似老咗好多，但最近又回復生氣，如果因為感情有寄託咁係好事喎。」
「太好喇! Thanks so much!」


「Celestine，唔講咁耐喇，我怕 Katy 會突然扎醒，我依家守緊行為，打唔到畀你，聽晚夜啲或者星期一再搵你。」
「OK, I love you, David.」
我啲擔心好似突然消失晒，我預感將會同 David 有美滿將來...
同 David 同 Katy 組織一個溫暖幸福嘅家。
不過有啲手尾要解決，星期一 Patrick 趁冇人拖我埋一邊猛道歉...
「Celestine，對唔住，對唔住，對唔住，果日女友班機突然取消咗，我都係返到屋企先知，佢捉住我狂呻，我冇辦法走開通知你，有冇搞到你好尷尬? 對唔住，對唔住，對唔住...」
「That's alright.」
其實都係多得佢我先可以同 David 一齊，我應該多謝番佢。
「你唔嬲就好，Celestine，咁我地下次幾時補番? 不如後晚?」
「唔喇，Patrick，上次係最後一次，冇下次。」
「點得架? 明明話做埋最後一次噃。」
「咁你放棄咗就冇架啦。」
呢個人真係野蠻!
「唔得，Celestine，你一定...」
「許 sir，Miss Leung，你地傾緊咩?」


「校長!」
馬太竟然突然出現...
「冇，我地傾閒偈啫。」
「咁啱喇，許 sir，我想同你傾傾你果班果個陳俊...」
Great! 馬太駛開咗 Patrick，我甩難了。
以後同佢冇任何瓜葛，我可以專心做 David 嘅女人喇。
夜晚十點幾，我嚮屋企附近糖水舖門口等，終於見到 David...
「David!」
我即刻攬住佢，如果唔係附近多人，我一定會錫佢。
「我好掛你，David，Katy 點呀?」
David 都攬住我，仲嚮我額頭錫咗一啖...
「仲係咁，佢要我放工即刻去外婆度陪佢，唔畀我有機會見你，仲要我開住屋企個 ip cam，畀佢隨時睇到我喎。」
Katy 梗係驚我偷偷地上佢屋企。
「唉，個 ip cam 係佢 BB 時畀我嚮公司睇佢嘅，點知依家被佢攞嚟監視番我，好似坐監咁。
David 表情好趣怪，我忍唔住錫佢一啖。


「咁你就乖乖地，唔好隨便帶女人返屋企喇。」
「我嘅女人只有你一個，Celestine。」
跟住又再錫我...
「有兩個先啱，仲有 Katy!」
如是者，我地每晚等 Katy 瞓咗就拍夜拖，有時四維行，有時食霄夜，但咁搞法我會愈嚟愈肥。
不過為咗見 David，在所不惜!
有一晚，我地去咗好遠食野，David 聽同事講呢度啲打冷好好食。
其實我以前就係住呢頭，不過自從同展文分咗手已經冇嚟過...
唔知點解，我好唔想返嚟，心入面好似好怕會撞見展文。
其實我驚咩? 唔係應該展文怕我先啱咩? 我冇欠佢，但佢欠我一句道歉!
話雖如此，如果依家撞到展文，我都唔知點面對佢...
或者我未準備好，先咁想逃避，一直唔敢返嚟。
如果唔係陪 David，我諗我唔會再踏進呢區。
「嗯? Celestine 係咪唔啱食? 你冇晒表情嘅?」
「唔係，不過有啲飽喇。」


「咁我地走啦。」
離開舖頭，David 拖住我行咗兩條街，我仍然心不在然...
「Celestine 你係咪唔舒服? 不如我送你返去先?」
「好吖好吖! 走喇!」
我恨不得快啲離開，點知就嚮呢個時候見到前面冇幾遠，有個女仔坐嚮輪椅上... 
佢雖然面色倉白，不過我仍然認得，佢係雅文，係展文個細妹。
既然佢係雅文，嚮後面推住佢嘅...
果然...
就係展文!

<未完待續，不日連載>

戀情仍有阻滯，突然撞番前度，如果你係 Celestine，你會?
a. 攬住 David 示威
b. 閃