「做咩呀?」我見漫澄個樣好奇怪。

「無......只係唔鐘意我哋班嘅男仔咁樣姐。」原來好多嘢,佢都睇在眼內,放在心內。

「男仔係咁架啦。」我嘗試將佢哋嘅行為合理化,畢竟自己都係男仔一個。

「但你唔係......至少你啱啱由頭到尾都無望過Miss Tai。」

哦~我唔望係有原因架。



因為我係屋企已經成日睇,一啲感覺都無,當你有時仲要聞到陣陣腳臭嘅時候,你就會無曬嗰種幻想。

當然喱啲嘢係一眾男仔都唔知嘅事,女神...係唔會痾屎。

「你...好特別。」漫澄用水汪汪嘅眼睛望住我。

我哋就咁對視幾秒,望多一陣先留意到,原來漫澄嘅眼睛都幾大下,平時可能因為戴眼鏡啦,所以遮住咗佢嘅大眼睛。

然後佢別個頭去,準備一陣要用嘅書。



「至少係我哋班嚟講,你係特別嘅,又會睇書,又正經。」

佢托一托眼鏡,低頭說道。

特別...?乜原來我對漫澄嚟講,係特別嘅存在?

感覺同漫澄嘅距離,又邁進一步咁,越嚟越期待同佢之後嘅發展。另一邊廂,唔經唔覺我哋正式上堂咗一段時間,繼上次性感火辣裝之後,班仔一樣成日上堂嘅時候目及我家姐。

「喂喂喂!大英雄班長!」爛口輝係小息嘅時候叫住我。



「咩事呀?」我係度玩緊手機。

我放低部手機抬頭望住佢,只見爛口輝望一望漫澄,然後細細聲同我講,「可唔可以出嚟傾陣?」

我再望一望漫澄,佢好專心咁睇緊書,我都廢事怕嘈住佢,於是答應。

一出到課室,係走廊上面,人來人往,爛口輝單刀直入,「大英雄,我直話直說,我哋級嘅男仔諗住派呀David去溝Miss Tai。」

David我知係邊個,我哋全級最靚仔嘅男神,又識打波又高又靚仔,出曬名食女無數。

型係幾型啦,但有少少MK味姐,最緊要啲女受。

「下?點溝呀?」我家姐你估咁易溝咩?

「之後再話你知啦,我哋要係暗中幫手架,幫手溝到Miss Tai。」



「你諗下啦,溝到Miss喎,成件事幾咁romantic呀?我哋就溝唔到架啦,但係見到人哋食到都好呀,俾自己識嘅人食,自己又幫過手,就好似自己食咁!」

「幫唔幫手先?Miss Tai咁撚正。」

佢咁樣講一講,我又幾想知佢哋諗住點樣溝Miss,仲要成級男仔溝一個,一定好撚好玩。

話唔定有啲仆街中途插隻腳入嚟溝,變曬成級男仔溝家姐一個,食下花生都好。

但嚴格嚟講,又應該無全級嘅,總有啲人唔鐘意喱類型,但大部分囉。我思索咗一陣,發覺有好大粒花生食。

「點撚樣架,幫唔幫先?」佢個樣加上語氣,真係好似古惑仔。

我個腦瞬間諗到好多嘢,我可以做二五仔中間向家姐通水,然後玩鳩成級男仔又得.......



唔幫家姐,等佢哋玩鳩家姐又得。

簡直進可攻,退可守,自己立於不敗之地,食住花生等睇戲。

「好呀!」我好爽快就答應。

「Good!!!」爛口輝拎張紙出嚟,上面有整全級男仔嘅名,然後係我個名上面打個勾。

之後佢繼續係我個班入面揾人,但求多啲人參與喱個計劃。

我眼尾瞄一瞄,好撚多人參加喎,見到好多人打咗勾。

家姐喱鑊真係仆街啦......

我就唔理嘅,同時間我諗緊方法溝漫澄。



萬一有咩事我實會家姐嘅,話曬佢都幫我溝漫澄呀嘛,點都唔可以玩過火嘅。