佢流完馬尿之後,收拾好心情,「我都唔知,我都唔知依家搞緊乜。」

「做咩呀!講啦!」我開始有啲失去耐性,做乜婆婆媽媽咁姐。

「我愛上咗David,佢好似我一個遺憾......」

我心入面無乜咁驚訝,大約都估到係關條粉腸事。

「「以前我中學鐘意嘅男仔,就同佢差唔多,個底好花,但我又情不自禁咁鐘意佢......」





「就算追我嘅人好多,但我都唔要,我只係想要呀城。」

「一生人呀,你可能會遇到好多個鐘意你嘅人,但你真正鐘意嘅,可能只有幾個。」

「David係第二個俾到同樣感覺我嘅人。」

「咁你依家想點?」我單刀直入。

每個人都有自己嘅理由,原因。但做錯嘢就係做錯嘢,我怕家姐佢會錯落去。





「我......應承咗做佢sp。」佢好快講完喱一句,但係我用咗好耐時間去消化。

我以為最後會拍拖呀之類嘅,正正路路,點解會無啦啦,忽然間,好突然咁做咗人sp呢?

我覺得眼前嘅家姐好陌生,原來我好多嘢都唔了解佢,佢心入面到底諗緊咩,我完全唔知,掌握唔到...

唔好話佢唔知自己做緊乜,連我都唔知佢做乜鳩。

「你知唔知自己講緊咩?」我好認真咁同佢講。





本來佢諗住點決定,係佢自己嘅事,佢咁大個人應該知自己做緊咩,我做細佬嘅無謂干涉咁多。

但佢咁樣做,有無諗過後果?

我先得from4,都有聽過SP喱兩隻字,但對佢嘅認知少之又少,除咗係連登睇下之外。

「我知呀,SP姐係炮友囉。」

頂你......你有無咁蠢呀?平時你都唔會咁on9啦下話?

「你哋......咩咗?」我小心翼翼咁問,我個心突然跳得好快,因為好緊張,同埋好驚。

好驚聽到一啲我唔想聽到嘅答案。

「無呀...我只係應承咋。」我當堂鬆一口氣,如果唔係真係玩大咗啦。





「我同David出過幾次街,佢對我好好,好溫柔,有拖下手仔錫下咁。」

「臨尾佢問我可唔可以做佢女朋友,我當時即刻想應承架,但係又覺得發展得太快,所以無答到佢,佢都無繼續問。佢keep住對我好,然後係一次錫完後佢問我『不如SP?』,我情...迷意亂之下就應承咗。」

「痴線!」我第一個反應就係咁,我唔係幾識David,但今日聽佢嘅所作所為,我覺得佢超級狗公。

「好!」我拎走家姐手上嘅飯盒,「唔好食住,聽我講咗先。」

我終於意識到事情嘅嚴重性。

「點解你會咁快鐘意咗David?因為中學個呀城?」我好認真咁問。

「係呀,而且我真係一鐘意上,就咩都願意,我之前鐘意呀城嘅時候都係咁。」





姐係話......家姐只要一愛上人哋,就失曬理智。唉......有時候專情起上嚟都幾可怕,一個人失去理性,係咩都做得出。

我面前就有一個活生生嘅例子,但我無理由睇住佢錯落去架,好無人性,同埋我依家都嬲嬲地,嬲條仆街David,溝女咪溝女囉,S乜撚嘢P?好好地溝女唔得咩?

「咁你鐘意David啲咩?除咗對你好之外。」我要嘗試將家姐拉返嚟現實。

「嗯......型囉,似呀城囉。」

「除咗咁,無啦?」我肯定多次。

「係呀。」

「你只不過係將呀城嘅幻想,放係David身上,如果佢唔似呀城,唔靚仔,只係普通毒撚一個,但佢會對你好,你又會唔會鐘意佢?」

家姐咬咬唇,沉思一陣,「嗱!你要諗嘅話我大約都知道答案。」





「家姐呀!你唔可以俾愛情遮住理性,你係老師嚟架,萬一傳咗出去,你分分鐘連份工都無呀!」

「你做緊咩你自己唔知咩?喱件事如果上網俾人知,你實俾人屌死呀!」

「愛情唔係俾你無腦嘅藉口,係呀!你咩都願意,但你唔識得愛自己,邊有資格去愛人呀?」

講到喱度,家姐佢又再喊多次,今次嘅佢,係失聲痛哭。