《我家姐竟然做咗我班主任？？？》: 【12】

我心入面講咗好多粗口，直頭想開佢拖，但我忍！

「咁我對Miss Tai無興趣呀嘛。」我坦白講，雖然講出嚟佢哋以為係掩飾，但事實上我又真係無興趣，又唔係講大話。

「下？Miss Tai咁正都無興趣？你係咪男人嚟架？」同學A即刻搶住講。

「佢係咪鐘意漫澄呀？所以先對Miss Tai無興趣？」同學B係度鳩估。

「我諗係啦，成日同漫澄係度有講有笑咁，方死唔係溝緊人咩！？」同學C個樣極度黑人憎，我唔係幾想理佢哋班友。



我依家只係想幫家姐出番口氣。

「爛口輝，你過一過嚟呀。」我向佢揮一揮手。

「咩事呀？有咩咪係度講囉。」總係有啲人咁唔通氣！

「我有料要爆呀，咁你過唔過嚟？」我火都嚟埋，大聲喝佢。

可能咁樣喝一喝就嚇疾佢，佢哋成班你眼望我眼，似乎估唔到我都會咁好火。



「好好好。」爛口輝死死氣咁過嚟。

我哋行去班房一角，然後佢就問：「咩......咩...事呀？」

我輕輕一笑，佢嗰種想扮兇狠，但其實心入面又驚青咁嘅樣，真係幾好笑下。

「今日放學，約埋David去XX公園門口等，我有料要爆，唔嚟你哋會——後悔！」

我未等爛口輝嚟得切反應，就返返去自己個位度，完全唔想同佢再有咩接觸。



漫澄一如以往咁坐係度睇書，佢嘅世界似乎係得書，因為小息嘅時候佢都好少同我哋班啲同學傾計，有嘅，但唔係我哋班囉。

都好嘅，可以投入係書嘅世界入面，唔洗理會出面班閒雜人，與世無爭，先係好事。

平時嘅佢會好專心咁睇書，唔會理我，但今日佢出奇地放低手頭上嘅小說，轉個頭問我。

「做咩事心情唔好呀？」聲音聽起嚟好平，明明絲毫感情都無，但佢嘅關心，突然令我覺得好感動。

仲令我諗返起爛口輝嗰番說話，話漫澄份人古怪，我話呀！係佢哋唔識貨就真！！！

「無事呀。」我強顏歡笑，係自己鐘意嘅女仔面前，我唔想表現出自己嘅軟弱。

「好啦。」佢笑咗一笑。

哩次係漫澄佢第一次對住我笑，雖然只係微微一笑，但我都覺得又好似拉近咗咁，心情亦好返好多。



佢嘅微笑，有一種療癒嘅功能。

到咗放學，我係公園嗰度等佢哋。

過咗無耐，佢哋兩個有傾有笑咁行過嚟，完全唔知一陣會發生咩事。

點解我會揀喱個公園？因為我同家姐傾偈就係喱度，而且喱度唔近學校，應該唔會俾人知。

「嗨！大英雄！」爛口輝好好笑容咁同我打招呼。

「叫我哋嚟有咩料爆呀？」David把死人聲更加令我覺得——黑人憎！

佢 chock住把聲嚟講，係男仔眼中係柒，但係女人眼中係型呢......所以我唔明啲女人諗咩。



我二話不說，一拳向佢塊面打落去。

好痛！我第一次打交，真係架。我睇電影呀，古惑仔之類嗰啲呢，以為打交好型，佢哋唔會痛咁。

我打David一搥，但我拳頭都好痛，但心好爽快。David用愕然嘅表情望住我，我都估到佢接落去想講咩。

「打鳩我？你無撚病呀？」佢由愕然嘅眼神，轉為憤怒。

爛口輝都一樣愕然，但我目標唔係爛口輝，主要打David先。