深水埗,福華街一座住宅


「快d放低武器!」

兩名警察逼近屋內既一個中年男子



「唔好過黎呀!你地過黎既話我就殺左條女!!!!」





中年男子正用小刀置於女子頭上





「啊啊啊啊啊啊,救命呀!!!!!!」女子不斷哭泣

「本身我諗住入黎爆格,點知...」中年男開始失控:「我已經乜都冇架啦...最多攬住一齊死既姐!!!!」







「友美小姐,屋內情況點呀?」身處指揮室內既瞳瞳問

「目標人員響大廳脅持住人質」友美利用AWM/P狙擊槍,於對面大廈既天台上監視


瞳瞳望住平版電腦上既單位平面圖





「希路先生,由廚房窗去到大廳應該需要1秒,可唔可以?」

「明白」



希路從對面既單位跳過去,慢慢潛入屋內

「三、二、一」


希路以高於常人既速度,由廚房奔到大廳

「!!!」






響中年男發現之前,希路早已經用近身格鬥術扯開中年男持刀既右手

先對住手腕用力將小刀甩開,再用肘擊攻下中年男既肋骨,乘住機會將佢壓落地上制服



「呀呀,放開我呀!!」

中年男不停反抗,但依然擺脫唔到希路



「喂,快d鎖住佢」希路次次地指揮兩名警察





「你...你係....」警察們眼見來歷不明既希路為佢地解決疑犯,大感錯愕



「我係IID既人」




回程既貨車上

「哈哈,瞳瞳今次犀利啦!明明果d唐樓係最難攻入去架啦」

大久保毫不吝嗇地稱讚:「竟然諗到叫友美響對面樓視察,再由希路響對面單位突擊!」






「你黎左一個月就已經咁熟悉戰術,真係醒目」林聰道


「邊係呢...全靠咁多位,今次任務先會成功咋」瞳瞳謙卑地摸摸頭



「今次你係幾醒目既...」閉上雙眼既希路道

「睇下,平時希路唔讚人架!」奈央笑住鼓勵旁邊既瞳瞳:「全靠瞳瞳幫手,依家我地行動都有效好多啦!」



「希望,可以越做越好啦...」瞳瞳心中道









「媽咪..我返黎啦...」瞳瞳拖住疲倦既身軀回到家中

「返黎啦瞳瞳....今日你好似好攰咁既?」正在煮飯既媽媽問


「係呀...今日多文件要做呀...」瞳瞳從銀包拎出一萬多元:「媽咪,呢度係今個月家用呀..」

「嘩,成萬蚊架喎...」媽媽疑惑問:「瞳瞳,你比咁多家用我,你夠唔夠錢洗架?」


「放心啦媽咪,我夠錢用架啦...我返入房先啦」



望住閉上既房門,媽媽非常擔憂

「...自從瞳瞳返左呢份工之後,就開始收埋自己啦...到底發生咩事呢?」



「唉...」

瞳瞳尚未除下西服,就躺上床上


回想起呢一個月,瞳瞳響各人身上學到唔少擔任特工既知識,尤其是特別關照自己既奈央

而希路亦定期教授射擊既技巧

但始終,未能真人落到戰場上...


「究竟...幾時先可以成為一個特工呀...」瞳瞳望住天花版,喃喃自語


瞳瞳又想起奈央對佢既一席話

「你話過,你係因為石仔先咁想做特工,我又覺得...似乎只係你自己鑽牛角尖姐」


「奈央小姐講得啱...可能呢d只係我一廂情願既諗法黎....」


「石仔...我應該點做至好呀...」







「估唔到...你今日竟然讚瞳瞳喎....」

坐在梳化上既友美道


「我只係議事論事姐,佢今次的確係做得幾好」

坐響旁邊既希路正在抽煙

「你妒忌呀?」


「...無聊」

友美打開大腿上既手提電腦

「賞金獵人網站goldenjai.com今日有情報指,迪拉斯既十幾個人員已經混入左香港...即將有所行動」


「!!!」

平日冷靜既希路,眉頭一皺


「嘿,講中你既弱點啦...」友美嘴角一揚

「不過,到底迪拉斯有咩計劃呢...?」



「唔理佢地有咩計劃...」

希路眼神堅定:「我都會利用Archangel,將佢地全部刪除」






「哈,我當然知啦」



「呢個就係你當年救我既原因」






翌日


「好野!又夠鐘放飯啦」洛迪古斯一到午餐時間就特別精神


大久保諷刺道

「丫,頭先就訓到死豬咁,依家就咁醒神」


「咪係囉,d IT狗淨係識食同訓架咋!」磨住指甲既奈央乘機恥笑自己既冤家


「哼,就係多得你呢d人,精通電腦既人先至唔受尊重呀!」洛迪古斯一直替自己既IT專業抱不平




「洛迪古斯先生,你以前係做咩架..」瞳瞳問


「唉,講起就慘囉」

洛迪古斯抬頭望住天花板:「當年我響MIT畢左業..」


「咩...咩係MIT呀?」奈央問

「麻省理工學院呀老女人!」洛迪古斯繼續講自己既事:「畢左業我就去左一間投資銀行做IT總監」


「點知,有次公司既system比黑客入侵,好彩我及時阻止,不過都損失左成五億美元」

「但係我...依然比佢地以監管不力為理由,踢走左我!呢件事既風波太過大,之後都冇公司再請我」

「房又冇,女朋友又走埋,響我走投無路既時候,多得發叔請左我返黎」

「之後,我就立志要成為一個最好既IT人」



聽完洛迪古斯一番說話,眾人均一語不發

「..真係估唔到你咁慘喎」平時同佢針鋒相對既奈央都對佢有點同情








「嗶嗶嗶嗶嗶!!!!!!」

各人既電腦上隨即出現Archangel既提示


「今次係....九龍塘...約道8號?!」




「果度...係有錢人住既地方黎架喎...」林聰摸住鬍子:「唔通今次係綁架案?」


「推測合理」大久保道:「既然係綁架,今次就有機會要打追逐戰,各位要有心理準備」

「十分鐘後,樓下停車場集合」







「唉,臨食飯先黎搞呢d野,好肚餓呀!」正在駕車既洛迪古斯道


作為組長既大久保只好安慰道:「得啦,拿拿聲搞掂佢咪有得食飯囉」





「呼,今次竟然係綁架案呀...」正換上特工服既奈央嘆氣

「奈央小姐呀...乜你地未試過對付綁架案既咩?」瞳瞳問


「未呀,不過既然Archangel比既地點係住宅區,咁應該就係綁匪攔路、又或者係入屋捉人啦...咁即係我地仲未知道行動既確實地點響邊」奈央耐心地為瞳瞳分析

「咁...咪冇得佈署戰術囉?」


「嗯,分分鐘仲要同佢玩追車tim...」奈央道:「瞳瞳唔駛驚既,一陣有咩事我地都會搞得掂」



「嗯...」瞳瞳用平板電腦翻查資料:「約道8號係屬於...財政司司長陳偉鴻?!」

「唔係掛...目標竟然係財爺..」林聰慨歎道





貨車只用二十分鐘就轉入約道

可惜仍然太遲






眾人剛好望住,五個幪面人,從銀色benz中拉出一個四十多歲既中年女子

再將佢捉入自己既黑色七人車中
已有 0 人追稿