一個月嘅救贖期限: 前夕-剖白

5月18 -
聽日，就係一個月期限嘅第一日。
由聽日開始，我仍然係一個平平無奇嘅學生，依然係一個讀緊中三仲係唔太着緊學業嘅女仔，仲係一個生活左14年膚色都仲咁"健康" 嘅女仔。
我個樣未至於其貌不揚，至少唔係叫樣衰嘅...總之，我會照平時咁返學放學食飯瞓覺，盡量唔會令人覺得有啲咩特別事發生咗。
只不過，只有我會知道，
今日之後開始數嘅31日就會係主宰我一切嘅一個月。
如果，
去到最後一日，
無論喺屋企嘅一切，學校嘅一切，周圍呢一切嘅人和事，都冇令我回心轉意嘅意欲，即係代表...
一個月後，




就係我決定自殺嘅日子。
灰？
未係住，如果情況相反，呢個期限自自然然會延後，甚至作廢。
當然，呢個可能性有幾高我唔知，一個月可以有咩變數，再唔係只係我一個主宰，無論係屋企人丶friend、同學、甚至係街邊嘅一個人，都隨時可以係喺我心目中改變呢個限期嘅主宰者。
荒謬？
你望下藍鯨遊戲，再睇番我呢個一個月比自己嘅決定，你肯定我咁做係無中生有？起碼絕對唔係恐怖荒謬。唯一俾自己嘅規則係遇到咩事都好絕對唔可以早過一個月去選擇結束生命。
我唔使自己凌晨起身亦都唔使自殘，但只係想，俾自己一個月，盡我一切嘅視野，睇盡我身邊嘅一切。
究竟之後，我仲值唔值得、仲想唔想，
係往後擁有更多嘅一個月。
或者我會因為咁，




而被標籤為厭世、on9、食飽飯冇嘢做。
但係我深信，定下呢個一個月救贖期眼，會令我俾以前睇得更多，感受更多。
你仲係唔明？
唔緊要啊..如果個個都明，呢個期限就唔會出現，更加唔會實行。
.
1530 放學 -
「叮噹叮噹叮噹叮噹..」
我一放學，就即刻衝去對面商場間文具鋪買咗包memo,
上面係好清楚咁寫住"增量30%優惠裝"。
其實，我唔係一個貪小便宜嘅人，唔係話計過條數增量裝平先買，反而根本冇話特別平。




或者，我只係俾緊希望自己，買定多啲，話唔定..可以用得曬？
點都好，起碼可以肯定，
頭三十一張一定用得着。