[人性] [感情事]我不會講你知，其實是第幾次: 初中年代
話咁快升中，雖然升左中學，我都仲係好似魚生咁，戇鳩鳩，生勾勾。
不過都開始識得分咩係靚女，咩係豬扒。
我同小學個女仔唔同班，都唔知好彩定唔好彩。
大個左先發覺佢一D都唔靚，仲有少少樣衰。
不過話哂都係初戀，俾番少少面啦。
最後中一都未過一半就已經冇哂聯絡。
其實諗番起我初中都算有少少異性緣。
話說上SCIENCE堂既時候，有個女同學編左同我一組。
我地成日都傾計，久而久之都熟左唔少。有時仲會唔覺意掂到佢手仔，諗起都覺得自己好PURE好TRUE。
記得有一次，個女同學冇啦啦同我講佢就生日喇，問我有冇咩表示。
我成舊魚生咁答佢: “係咩？生日快樂呀。” 之後就冇理佢。
佢講左句多謝，見我冇表示就接住問我: “你會唔會送禮物俾我呀？”
我一野就拒絕左: “你就想呀，冇錢呀。”
之後佢就嬲左我成個星期。
後尾我諗諗下，都去買左隻毛公仔俾佢。
你知啦，中一既時候，拎住隻好大既毛公仔番學校，仲要送俾個女仔，唔俾人講就怪啦。
“哦!!!!! 你送公仔俾佢!!!”
我夠知我呀媽係女人啦。
“喂!聽講呀邊個同邊個拍拖呀!”
我記得個女仔冇否認，紅都面哂咁同我講多謝。
不過作為一舊魚生，我都係冇追佢。結果去到中二佢就比隔離班個靚仔追左喇。