[人性] [感情事]我不會講你知，其實是第幾次: Bobo出場
又話說有一日，我同BOBO傾開，放學校隊要練波既野。
佢唔知痴左邊條根話要黎睇。
“唔好啦，我好廢架。”我慣性自嘲一番。
佢死都要黎，我都冇野好講。重點，係佢都唔知我咩樣。
其實心情點都有D緊張既，話哂都有個靚女話黎睇自己踢波喎。
放學一早換好哂衫就出發去球場喇。
跑下圈，熱下身既同時，我就係到搜索Bobo既蹤影，但又見唔到佢。
之後專心練波我就冇理喇。
訓練既尾聲我地分左兩隊比賽，當時我得到左一個單刀既機會，
點知離門兩碼，一腳就踢左個波出界。
當然全場屌聲四起，我就好尷尬咁去執番個波。
個波碌左去個女仔附近，我跑過去，望一望，Bobo居然真係黎左!
雖然我未見過佢真人，但靚女我一眼就認到啦。
但由於佢唔知我就係Hugo既關係，我執完波就走喇。
“Hugo?”我嚇左一嚇，心諗點解佢會知係我既？
我就擰轉頭，尷尬咁笑一笑，之後問佢點解會知道係我。
“你之前同我講過你好中意9號波衫嘛，所以我就估係你囉。”佢答我。
好野喎咁都記得，當時都真係覺得有D受寵若驚。
我企左係到同佢吹左陣水，後面突然就有人打打力拍左我個頭一下。
“你老尾…”我擰轉頭就鬧，點知一望，原來係教練。
至於我班隊友，就係後面陰陰咀笑，跟住仲要起哄。
我同Bobo講左句練完波再傾，就俾教練罰左去跑圈喇。