[人性] [感情事]我不會講你知，其實是第幾次: 因愛成恨

不知不覺我同Bobo已經分開左兩個月。 
我近呢兩個星期終於似番個人，起碼我會同樂仔出下去。 
至於呀健同Bobo最近點樣，有冇搵過我，我一概唔知道。 
因為我一早Block哂佢兩個。 
唔知...我見番佢地會有咩感覺呢？ 

我一踏入課室，就同樂仔坐番上年個位。 
因為係中五，都係上年個個班主任。 
同學仔都係個D，所以我都冇乜興奮既感覺。 
唯一令我在意既，就係會見到呀健。 


我真係諗唔到自己會有咩反應。 

未上堂之前，我同班同學仔吹下水。 
傾傾下我就見到個熟悉既人影走左入黎，呀健。 
佢都注意到我望住佢，當我地眼神有接觸既時候，佢好快迴避左。 
我都冇再望住佢，廢事尷尬啦。 

去到食晏個陣，本來諗住同樂仔留係飯堂食飯。 
點知咁岩俾我見到呀健衝左出去，我就跟左佢出去。 



雖然我仲有一絲希望，佢見既並唔係Bobo； 
但個天真係好過癮，係都要我事與願違。 

係我眼前出現既係呀健，仲有Bobo。 
佢地兩個仲要肆無忌憚，厚顏無恥咁拖住手。 
兩個月冇見Bobo，佢依然係咁靚。 
而且我仲覺得佢精神左，可能佢已經完全忘記左我。 
我一諗到呢到，個心真係覺得好痛。 

我以為我咁耐冇見佢，我已經放低。 


我以為只要我捱過左段日子，我就可以重新做人。 
但原來唔得，我發覺，我仲係好愛Bobo... 

但係我知道，世界上任何事物都會有終結既一日。 
感情都唔例外。 
與其任人主宰我既感覺，我決定以後我行我素，只係會做自己開心既事。 
而呢段感情，我要親手埋葬佢。 

我慢慢行向佢地兩個。 
當佢地見到我既時候，顯得有D驚訝同尷尬，拖住既手都即刻放開左。 

我首先開口： 

"你地一齊左？我祝你地唔會分手，但日日嗌交，不停戴綠帽。再見。" 



或者呢件係我做過最幼稚既一件事，但係我冇後悔過。 

邊個話，愛你一定要祝福你？