[人性] [感情事]我不會講你知，其實是第幾次: 表白(2)
我首先同佢去左宜家傢俬食野。
(佢既凍蝦真係又抵又好食)
之後，我地儼如一對小情侶咁。
我地睇下傢俬，坐係梳化玩下，琪琪又講到第時屋企想點佈置。
"我中意開放式既屋企，唔要咁古板。
最好係開放式廚房，唔要梳化，淨係要一大堆咕臣。"
琪琪滔滔不絕，我就好專心咁聽咁記低。
總有一日，我要將我地既屋企整到咁！
今日既琪琪心情好似好好，好少見佢仲多野講過我。
或者，個天都覺得今日係一個表白既好日子？
行完之後，我地就去左睇戲。
今次睇咩戲我真係完全唔記得。
我淨係記得我腦海不停盤算陣間點樣同佢表白。
我地買左爆谷汽水，就坐低左。
如果大家有留意，有D戲院座位中間既扶手係可以拎起，有D就唔得。
好彩，今日呢個院可以。
我一坐低就拎起左條扶手，點知琪琪問我做咩拎起佢。
我話好鬼逼呀。
依稀記得當日睇既係一套愛情片，唔係動作片。
一路播既時候，我一路偷望琪琪隻手放係邊。
佢一直都雙手放係大脾上面。
我等到中間主角好深情咁對望既時候，
我倒吸一口氣，鼓氣勇氣，伸手拖住佢。