[人性] [感情事]我不會講你知，其實是第幾次: 火車姐姐

開學第一個星期，我同樂仔都開始結識其他同學。 
當中當然包括同學A同B。 
起碼我地知道同學A叫Carol；同學B叫Tracy。 
佢地同另外幾個女仔好Friend。 
男仔方面，識親既都主要係波友同讀書上面可以請教既同學。 

如是者，我真係好比心機上堂。 
某程度上，除左呢班同學對我黎講冇乜引誘之外，會考考得唔好我都有少少唔開心。 
亦都加強左我讀書既決心。 



不過大家放心，我唔會要你地睇我讀書既經歷咁悶既。 
不知不覺，我係我地班入面既形象已經變成一個書生。 
但原來咁樣都有好處... 

"Hugo呀，究竟乜撚野係中庸之道呀？"有個男同學問我。 

"Hugo Hugo！幕府好難呀，點樣可以易記D呀？"　Tracy問我。 

唔知幾時開始，我就同班同學熟落左好多。 
佢地有咩學術上既問題都會問我。 



平平淡淡，直到有一日。 
我同樂仔如常番學，去到九龍塘火車站，我地企係月台等車。 
我前面有個著住我地校服既女同學行左過黎，係我身邊等車。 
下意識咁望一望佢，標緻既五觀，眼大大，好瘦下。 
望落去都係一個順眼靚女，可惜佢皮膚有少少黑，我都係比較中意白D既女仔。 

可能我望住佢太耐，佢意識到之後望一望我。 
我地對望左幾秒，就各自移開目光。 
由個日起，我同樂仔差唔多日日番學都會見到個個女仔。 


每日我地都會對望，然後又扮哂野冇望對方。 
樂仔都漸漸留意到佢。 
我地仲幫佢改左個名做火車姐姐。 

偶爾會有一日半日見唔到佢。 
我會不自覺咁四圍望，睇下有冇佢蹤影。 
有時候我地差唔多遲到，唔知點解，佢個日又會一齊咁遲。 
落車就一齊跑番學校。 

話咁快，上學期就完左喇。 
呢個學期，我居然考第二。 
我諗小學之後我都未試過考得咁前。