[人性] [感情事]我不會講你知，其實是第幾次: 拎電話

"唔好意思丫。"突然有人截住我。 

"可唔可以俾你電話我？"講完之後，個個人就拎出佢部電話。 

我望一望眼前呢個女仔！嘩，身材好高佻。 

由於小弟唔係高登仔身高既關係，佢差唔多同我平排咁濟。 
換言之，目測佢最少一米七。 
佢化左個淡淡既妝，對眼好靚好精靈。 
如果十分滿分，我會俾七分佢。 


扣左佢分最主要係因為佢個樣有少少俗。又或者咁講，佢俾我既感覺，有少少MK。 

我唔知講乜好，淨係係到諗我係咪俾人玩。 
個女仔見我冇出聲，就笑左一笑。 

"其實係咁既，我同班同學玩緊遊戲，我要負責拎一個男仔既電話。 
你介唔介意俾你電話我呀？" 

我點左一點頭，就接過佢手上既電話。 
呢個時候，我見到樂仔掩住半邊咀係到偷笑。 


攪到我鬼死咁尷尬。 
反而個女仔好淡定，神色自若。 

佢拎完我電話之後。 

"唔該哂你呀。我叫Stella。個邊幾位係我朋友。" 
我望向個邊，佢地同我笑一笑，Say左句Hi。 

我點一點頭，禮貌上同Stella講番自己叫咩名，就走左喇。 
走之前我再望一望個班女仔。 


唔怪得有個咁熟面口，其中一個原來係所謂既中五校花。 

"Hugo哥，你巴閉啦，唔識人啦，而家D女仔都淨係搵你喇。我以後點撈呀？" 

"痴線啦，人地玩遊戲之嘛。" 

"車你唔好扮純情啦仆街仔。人地擺明係籍口啦你唔係信呀嗎？" 

我不置可否。 
至於點解我認得個所謂校花，咪就係因為樂仔留意左人地好耐囉。 

一直去到晚飯既時候。