[人性] [感情事]我不會講你知，其實是第幾次: 誰在無理取鬧

睇到Stella打左段咁既歌詞係到， 
我真係無名火起。 
而家算點呀？ 
我已經就黎考試，溫書又忙到痴哂線咁。 
而家你叫做俾說話我聽呀？ 
你有冇企過係我角度諗先？ 

我愈諗愈嬲，我決定打俾Stella。 

"喂！Hugo！你終於打俾我喇？我好掛住你呀。" Stella毫不掩飾佢對我既思念。 



"我想問你，你係blog打個段心亂如麻既歌詞算點先？" 我一開波就興師問罪。 

"下？咩算點呀？我聽到隻歌好好聽咪放上去囉..." 

"你講大話！好打唔打，你打段咁既野？ 
你而家想俾說話我聽呀？ 
有咩你咪直接同我講囉！"　我已經開始唔講道理。 

"我....我見你忙我唔敢煩住你呀...." Stella好委屈咁講。 



"咁你而家唔係都煩到我咩？ 
我都識講我忙架啦！你攪咁多野做乜呀？ 
你有冇為我著想呀？"　我連珠炮發。 

"咁你又有冇企係我角度諗呀？ 
人地做乜野都係為左你呀！ 
我怕你悶所以日日上黎陪你。 
我怕你餓所以日日煮埋俾你食。 
我幫你執房係怕你太亂搵唔到要用既野。 


我知道你好辛苦，我俾你鬧我都冇半句怨言。 
我怕我太過痴身，而家只係敢send下sms關心下你。 
點知你就覆都唔覆我。 
我都係人黎架我都有情緒有感受架！ 
嗚... 
Hugo你正一衰人黎架！我憎死你呀！" 
我諗Stella忍得好耐好辛苦，而家終於一次過爆出黎。 

時間停頓左，彷彿都屏息以待，係到注視住呢對可憐既戀人。