[人性] [感情事]我不會講你知，其實是第幾次: 假Stella

眼前呢個女仔，無論身高，外表，打扮，化妝，都同Stella極到相似。 

"哦！！！你輸左！" 掛住望個個女仔，我唔記得左我玩緊遊戲。 

"懲罰！懲罰！懲罰！" 

"有野睇！有野睇！" 

一班莊員同組爸組媽慣性咁叫囂起哄。 
我回過神，將焦點放番係呢大班人身上。 



"Hugo！你輸左，要懲罰！"某個組爸講！ 

"罰佢跑圈啦！"有個組仔講。 
我屌你咩你估我而家跑馬拉松呀？ 

"俾你揀個女仔黎咀喇？"有個組媽見我咁靜，講野刺激我。 

"咁益佢？叫佢去隔離組，搵個女仔示愛啦！" 
有另一個組媽提議，好似驚左我會搵佢黎咀咁。 



"就咁話啦！Hugo快手d！"我肉隨砧板上，騎虎難下。 

我掃視隔離組既女仔，竟然俾我見到Ada！ 
本來諗住佢都叫做識既，冇咁尷尬丫嘛！ 
但係，我見到佢望住我，顯然覺得我一定會揀佢。 
我真係幾唔中意佢呢種自以為是既心態。 
我寧願尷尬都唔搵你呀！ 

突然，我見番個個好似Stella既女仔。 


我慢慢向佢個邊走去。 
佢左望右望，好似有少少驚訝點解我會走埋去。 

"hi，我係hugo，岩岩玩輸左要同人示愛。 
我愛你。" 我簡單直接，諗住講完就算。 

點知班人起哄。 

"佢咁hea你唔係受佢呀？" 

"唔得呀！俾d誠意啦！" 

我萬分無奈咁望住佢，佢又好尷尬咁望住我。 

"我願意保護你，照顧你，以後都唔離開你，我唔會俾你有事，永遠都係你身邊。 


我愛你，做我女朋友好嗎？" 

或者我當左面前呢個女仔係Stella，我真情流露。 
點知呢個時候，假Stella面露驚訝，又閃過一絲不屑， 
好求其咁應承左我。 
當然，其他人都冇得唔收貨啦。 

玩到去休息既時候，有人拍一拍我膊頭。 
我一望，係頭先個假Stella。 

"你係Hugo？你....識Stella？"