[人性] [感情事]我不會講你知，其實是第幾次: 東京夜(4)

我假設左Ada係感情動物。 
一個咁衰既前度，佢都依然係放唔低佢。 
證明感覺比起理性重要，更加係我地解決問題既方向。 

如果Ada當過我係佢前度，或者代表佢對我都有一定感覺。 
我唔想再理究竟日後會點，我唔理我會唔會放得低Stella。 
我淨係知道呢一刻，我好想照顧Ada。 

Ada一路冇出聲，始乎係等緊我繼續頭先講既野。 



"我既意思係，不如你做我女朋友好嗎？ 
我會帶住你走出呢段咁不堪回首既記憶。 
或者我唔細心，但我會全心全意照顧你。" 

Ada呆左，佢應該冇諗過我會無啦啦表白。 
我靜靜等佢回答。 

"Hugo...我唔想當你係水泡。" 

"Dada，你淨係答我，你對我有冇感覺？" 



"有，但係我怕我只係當左你係佢既替身。 
我怕我會傷害左你。 
當友情變成愛情，我地就冇得番轉頭架喇。" 

"你又何必要諗埋我個份？ 
你估我冇諗過我可能只係一件替代品？ 
連我自己都唔介意，你又介意咩呢？" 

"咁Stella點算？" 



"我...我相信佢冇左我都一樣咁幸福快樂。 
而且，呢一刻，你比佢更重要。 
點呀？我好高鬥架！ 
你唔答應我，我搵第二個架喇！" 

"你夠膽？你搵第二個我一定切左你！" 

"嘩！切左我？到時你冇幸福咋！" 

我地雙視而笑，十指緊扣。