[人性] [感情事]我不會講你知，其實是第幾次: 消失的Ada

唔理喇！我用手提試下打俾Ada。 

"嘟嘟...你搵我唔到你搵我唔到。係呀我唔得閒呀，留言或者遲d再打過黎啦。" 

駛唔駛熄機熄得咁快呀... 
我唯有打多幾次，J下Ada留言信箱把聲啦。 
自從呢日之後，我再聯絡唔到Ada， 
亦都冇任何佢既消息。 

時間飛快地去到四月。 


話說有一日，有班大陸同學仔約我去隔離市飲野唱k。 
飲完我先知自己係幾咁唔飲得。 
佢地話我聽12 歲已經飲緊烈酒。 
當佢地仲係面不改容既時候， 
我已經湯到一地都係。 
佢地見我醉成咁，就車左我番宿舍。 

我已經唔記得左自己點樣訓著。 
一張開眼，呢到邊到黎架？ 
點解我會訓左係浴缸到架？！ 


都算，重點係？我條褲去左邊呀？！ 
我搵左好耐，先係common kitchen到搵番.... 

呢d咁柒既事，我一定唔會話俾樂仔知。 
如果唔係佢一定笑到我面黃。 
當然，同Stella分享下，博得紅顏一笑都唔錯。 

"嘩！你做乜飲到咁醉呀？出事點算呀？"　聽得出Stella好緊張。 

"一次半次姐。你睇我而家咪安然無恙？"　男人老狗，醉左都唔洗死既。 



"你仲夠膽有下次咩？我唔放過你呀！ 
一個唔好彩，你跌左落街點算呀？" 

"嘩死女包你咒我？" 

"衰人我關心你咋！好心你啦！ 
咁大個人，唔開心咪做其他野囉。 
搵女女都得架！ 
我見你咁慘我先關心下你咋！" 

"唔開心？慘？我冇呀。" 

"下......我以為你唔開心先去飲酒。" 



"點解我要唔開心呀？" 

"樂仔冇同你講咩？你個Ada拍拖喇嘛...."　 

...........今日愚人節咩？