迷失於這個石屎森林裡: 第二章︰Karma Police Part 2
4
「你估吓個新同事做幾多日就走？」阿力對著坐在他附近的男同事Alex笑問著，Alex望著阿力，一臉無奈。Alex與阿力同一部門，每天與阿力一同處理著會計文件，同時要處理行政、出入口運輸工作。
「耐嘅咪一個禮拜，快嘅咪今日頂唔順唔Q做！你知嗰位陳生，我哋老細幾難頂！」Alex轉頭望著他前面的電腦顯示屏，雙手於鍵盤飛快似的打著字。
「依加我好鬼憎QQ，成日要用嚟覆李小姐我依家做緊乜，煩到癡線…」阿力望著與李小姐私人通訊QQ，李小姐是公司會計部主管。李小姐問他現時有甚麼工作，欠了FW公司3個月的貨單的XA公司何時開支票還錢。
「問咗幾廿次，次次間嘢話老細未批…已經唔想再打電話問佢啦！」阿力又開始埋怨著他要再致電那間公司會計部詢問還錢事宜，他認為徒勞無功之舉。
「明明嗰間都叫做大公司，小小數都唔肯找…」阿力雙手掩著臉。
「你好，FW公司…」一名女同事接聽著電話，她戴著眼鏡，看似已年過50歲。
「阿飛，陳生搵你…」女同事向著阿飛方向叫道。
「等等…」阿飛慢慢拿起電話，女同事慢慢的接駁線路至阿飛所持的電話。
「喂，陳生…」阿力望著阿飛方向，覺得有一種不祥預感。
「老細搵佢做乜事…」Alex轉頭望著阿力。
「我無話唔做呀！」阿飛尤如瘋子的對著電話狂吼，看似被陳生責罵。
「份報價單我依家跟緊呀！無呀，我無成日唔喺位！你話我無教嗰位新同事Alice點用MYOB報價，我依家咪去教囉…」公司所有同事都聽到阿飛的咆哮聲，阿力對此相當厭惡，Alex卻不以為然繼續工作。
「好撚嘈呀屌，阿飛又喺度鳩嗌，好Q煩！啊…原來嗰位新同事高小姐英文名叫Alice…」阿力轉頭望著Alex。
「公司QQ咪講咗佢叫咩英文名囉，成日求其睇…」
「OK我錯…」阿力一臉沒趣，突然他旁邊的電話響起。
「你好，FW公司…」阿力接聽著電話。
「喂，我上個月同你哋公司運貨嘅錢幾時俾我？再唔俾我今日上嚟…」阿力聽著那位與他公司負責運貨的貨車司機關先生致電會計部追問著車費事宜，老闊陳先生嫌他上個月車費過於昂貴，要求阿飛與關先生商量減價。陳先生責罵阿飛不懂得控制運輸成本，還說著「你同嗰位司機係咪呃公司錢，我就嚟去ICAC告你」這些令人難堪和無理取鬧的說話。
「喂，Alex，老細批咗貨van關生payment未？」
「未呀，阿飛都未同佢傾倒個令關生覺得平嘅價…」
「屌，條肥閪嫌呢樣嫌嗰樣，logistic嗰邊話關生已經係最平喎…嗰位陳生，就算關生收佢一蚊佢都嫌貴…」
「妖，你第一日打佢工咩，佢係咁架啦…喂，我去廁所，有人打嚟話我唔得閒…」Alex說著，慢慢從座位站起來，走向廁所方向。然後Alice走過來Alex座位前，看似有工作事宜要詢問他。
「Alex呢？」Alice側著頭望著阿力。
「搵佢做咩…」
「有出入口shipping嘢要問佢，啱啱英國有貨要送到香港，想問佢幾多錢…」
「佢唔喺位喎，你陣間搵佢…」阿力揮手示意Alice返回她的座位，同一時間，阿力電話再度響起。
「俾我靜吓得唔得…」阿力不耐煩的拿起電話。
「喂，阿力呀，我要搵Alex呀…」李小姐致電公司，想找還在廁所的Alex。李小姐平時星期一至五會於下午大約3時正左右才回到公司，老闆陳先生不會當她遲到。
「佢唔喺位…」
「哦，咁我搵咗你先…嗰間X公司有無講幾時找錢…」
「佢話老細仲未批payment喎，不過佢都話快架啦，今個月批到嘅即刻寄票俾我地…」
「嘩，信唔過喎，間嘢成日話找找找，之後無哂影咁…」李小姐電話裡要求阿力準備reminder寄去XA公司email。
「得，今日搞，拜拜。」阿力苦笑著，他納悶著今個月第幾次寄reminder去XA公司email。此時Alex從廁所出來，慢條斯理的回到座位。
「李小姐搵你呀，你打番電話俾佢。」阿力指著Alex旁邊的電話。
「得得得…」Alex伸手示意，慢慢的按著李小姐手提電話號碼。
5
「Hi！」身穿背心的中年漢走入公司，向著阿力與Alex打招呼。
「陳先生又著背心，好鬼核突…」阿力壓低聲線致陳先生沒法聽到，視線慢慢移向電腦顯示屏，心想身為一名老闆，穿著如此不用心。
「OH，12點囉！Alex QQ job…」阿力聲線帶點疲倦，他肚子已經鼓鼓作響。
「今日去邊度食？」Alex望向阿力方向。
「下面有乜鬼嘢好食，去番嗰間蛇記茶餐廳…」
「哦…嗰間唔好食…」
「其實間間都唔好食啦，算啦大佬咪鬼奄尖聲悶…」阿力左手托著頭，臉帶不滿。
「阿飛，入嚟…」陳先生走進會議室，阿飛同時間走進會議室。
「老細依家成日叫阿飛入去，又鬧貨van司機關生單嘢…」
三十分鐘後，阿飛與陳先生仍然在會議室沒有出來，期間會議室不時傳出阿飛咆哮聲，十分滋擾。然而公司裡同事依舊未受影響繼續工作，尤如機器，只有Alice於座位顯得不知所措，而阿力一臉厭惡。
「呢兩條友喺心戰室幾耐吓，幾時佢哋兩個喺入面直抽…」阿力經常將會議室稱之為「心戰室」，不無嘲諷意味。Alex沒有理會阿力說著阿飛兩人悄悄話，繼續著工作，阿力感到沒趣後繼續著處理著今個月的Statement。此時陳先生與阿飛從會議室出來，陳先生依舊目無表情，而阿飛看似失魂落魄，陳先生走到戴著眼鏡的50歲女同事面前。
「Grace，食飯。」Grace點頭示意，然後跟著陳先生離開公司，只有Grace有著特權於午膳時間一時前與陳先生午餐。
「Alex、阿力，陣間你哋去邊度食…」Alice隨後走到Alex與阿力面前，令他們感到驚呆，從來沒有任何新同事會主動邀請Alex兩人食午餐。
「又係嗰間囉，蛇記…」阿力轉頭望著Alex，Alex點頭表示同意，看似將當時蛇記茶餐廳食物不太好的話語忘記了。
「我唔撚柒鳩屌你個含撚笨柒個老母個生滋甩毛爛臭花粒白濁梅毒性冷感閪都唔撚柒得嘅！」蛇記茶餐廳傳來兩名食客爭執。
「屌你老母臭閪，頭先啤啤貢，仲講粗口鬧鳩我，個位你架…打撚死你條性無能撚屌…」只穿著背心與黑色運動褲的食客對住坐在座位，喝著熱咖啡的中年男子破口大罵。
「好啦，唔好嘈啦…」一名侍應走到兩人面前，嘗試調解該兩人爭執。坐在餐廳出口處的阿力、Alex望著該兩人方向，看似見慣不怪，只有Alice嚇得花容失色。
「唔好介意，每個禮拜都係咁…」阿力對住Alice苦笑。
「叉燒公仔麵、熱奶茶…」一名面帶傷疤的侍應拿著盛滿食物的盤帶到阿力面前，阿力望著Alex與Alice面前的食物，Alice點了雞扒飯與利賓納，Alex點了豆腐火腩飯與熱朱古力。
「叫咗唔駛等我，食啦…」阿力對著Alice與Alex兩人笑道，然後他們三人低著頭進餐，期間不發一言，「食不言、寢不語」。
「你哋喺度做咗幾耐…」Alice對著Alex與阿力微笑，笑容煞是迷人，他們三人於回到公司途中一邊走著、一邊閒談。
「我…做咗兩年左右…」阿力右手手指指著自己。
「我三年，原本有個做得仲耐，成四五年左右，不過佢轉咗part time，今日妳見佢唔倒，因為佢今日day off…」Alex右手搔著頭。
「你哋喺度做咗都好耐呀，我上一份工一年…一年都無，哈哈…」Alice苦笑著，阿力對Alice的舉動不太瞭解。
「做乜鬼嘢笑呀佢…」阿力喃喃自語，Alice突然走到Alex面前，右手指著Alex額頭。
「以後多多指教！」Alice對阿力與Alex做了鬼臉，然後開著工業大廈大門，飛快的走進電梯大堂，阿力與Alex相互對視。
6
阿力三人趕於中午二時前回到公司，他們各自回到自己座位，開始著下午工作。
「其他人走都得，呢個千其唔好走…」阿力笑容壞壞的望著Alex。
「頂，你個樣，成個淫蟲咁，俾Alice見到佢之後唔鬼理你…」Alex指著阿力，樣子帶點不滿，突然Alex電話響起。
「係，李小姐，係，係，好啦…」五分鐘後，Alex放下電話。
「阿力，今日李小姐唔返嚟公司…」
「好呀，佢唔返，最後嗰個陳生同Grace姐都唔好返嚟…」
「唔好咁講…」Alex苦笑著。大約中午三時正，陳先生與Grace回到公司。
「Alice、阿飛，同我入房…」陳先生突然走到Alice座位面前，Alice不懂得如何反應，阿飛率先走進會議室，Alice跟著陳先生身後，慢慢走進會議室。
「砰！」會議室門口被阿飛重重關上。
「做乜事…」阿力望著Alex。
「唔知做乜…」Alex同時望著阿力，兩人面面相覷，他們感到Alice是否做了令陳先生感到不快的事，畢竟他倆除了有緊急的事，平時對銷售部的事近乎不聞不問。
「都話Sales嗰邊唔係人做嘅，老細咁鬼難頂，唔知Alice頂唔頂得著呀，Alex…」
「話事話阿力，我同你好少俾老細叫入房…」
「你好想入去呀？我就No，不了！」阿力雙手掩著臉，他有著不祥的預感。
「Grace，老細叫你入埋嚟…」阿飛開著會議室門口，對著Grace叫道。
「又咩嘢事呀…」Grace聲線帶點疲憊，慢慢走進會議室。剛才午飯期間，陳先生對著Grace疲勞式轟炸，批評著她的報價單頻頻出錯。
「老細做咩事…」銷售部某名同事對著另一名同事問道。
「唔知，不過好似Grace俾咗單報價俾新同事Alice搞，好似Alice搞到個客好嬲…」另一名同事卻一臉無奈，而阿力與Alex聽到後，不禁為Alice感到擔憂。三時四十五分左右，Grace三人從會議室走出來，而Alice雙手掩著臉，慢慢走回自己座位。
「嗚…」Alice飲泣著，關上她座位的電腦及顯示屏，拿起她自己個人物品，慢慢走到公司門口。
「吓…老細咁快炒咗佢…」Alex望著Alice背影，嚇得呆若木雞。
「屌，條肥嘢喪嘅…」阿力心裡感到憤慨。