我在籠裡的日子: #28-End

「點會太遲呢？凱晴，俾個機會俾我同你起埋一齊啦，我地將來仲有大把時間架，你放左我地先啦。」這時候的我一臉疑惑，完全唔知道凱晴點解無端端會話一切已經太遲？唔通係我遲左表白所以要虐待我？唔通因為我太遲喜歡上凱晴，所以要綁埋我家姐？我完全理解唔到凱晴在說甚麼。 

突然.....刺耳的警車聲「Bi ! Bu !Bi ! Bu !」傳入我們三人的耳中..... 

「屋裡面既疑犯同我聽住，我地係香港警察，你已經被我地重重包圍啦，請三分鐘內釋放人質，開門投降！否則我地會使用適當的武力。」警察用擴音器把說話放出黎，大聲到連在地下室的我們都把每一只字都聽得很清楚。 

「救星到啦！」家姐興奮地道。這一刻，我終於明白凱晴所說的太遲是甚麼，「他媽的香港警察，遲唔黎，早唔黎，係要揀我剛剛同女神表白既時候先黎。」我的內心憤怒地咒罵著。 

「凱晴，你唔好理我地，你快尐走先。凱晴，我愛你！」雖然唔知點解我會這樣衝口而出，但係我真係唔想凱晴有事，一起幸福快活生活落去，有一個完滿BBQ既結局，這一刻家姐都被我衝口而出的說話嚇到目瞪口呆「細佬，你係咪傻左阿，佢搞到我地咁，你仲叫佢走先，你係咪俾呢條女洗左腦阿！？」 



「我唔知，我咩都唔知，我內心有一把聲音叫我要好好保護佢！家姐，你唔好理啦！」我大聲向家姐道。 

凱晴把桌子上的東西全部掃到地上，激動地拿起地上的一把刀對住自己的心口哭著說「你地唔好再嘈啦！阿輝，對唔住，好多謝你講出你既心底話，但一切已經太遲啦！阿輝，我地來生再見啦。」 

「唔好阿！！！！」
 
「彭！」突然門外傳來一下槍聲，凱晴手上的短刀應聲跌下。 

接著有五至六個身穿避彈衣的警察衝了進來把凱晴制伏在地上。 



「死差佬，你地放開佢阿！」聽到我這句憤怒的說話後，所有警察隨即望過來鐵籠，其中一個更喃喃自語地說「嘩！咩而家尐細路仔鐘意玩埋尐咁既野阿。」好明顯班警察俾眼前的景象嚇親。 

後來我才知道，原來係姚詠詩收到我電話發出的影片後，立即去了報警，而警察就依照電話公司所給的資料查到來凱晴的家中，繼而揭發了整件事。 

而李婷，吳詠恩，張兆雯，王愛君在法庭上轉為污點証人指証凱晴，務求法官輕判，最後她們四個因為合謀禁固而被判守行為一年。 

凱晴則因為禁固罪而被判入女童院十八個月，但謀殺罪則因為証據不足而罪名不成立，或許這個結局對凱晴來說是一個比較好的結局.....
 
在法庭宣佈判決後，我鼓起勇氣走過去犯人欄，再一次向凱晴表達我的愛意，怎料正當我想開口之際，凱晴一手把我抱緊「阿輝，對唔住阿，請原諒我一直以黎咁樣對你。」 



唔知點解凱晴這一下擁抱我並唔覺得陌生，而且是非常熟悉，感覺我們原本就是一對熱戀中的情侶，相反對於那一個星期所發生的事情我就變得十分陌生，好像忘記了很多片段，很多重點似的。 

「無可能，點解會咁架？那件事發生到而家都無一個月，點解記億會咁模糊架？而且我同凱晴原本係咩關係？唔係寵物對主人的感覺，唔係剛剛才產生愛意的感覺，而係熱戀中情侶的感覺，肯定係。」這一刻我的頭突然很痛，內心不斷重覆著這幾條問題。 

我繼續向凱晴追問：「凱晴，你咁樣對我係咪有苦衷架？我地兩個原本係咩關係？我一早就估到阿新，阿思唔係你殺，但你係咪知道尐咩，而我係唔知架？」 

「你唔好問落去啦，咁樣對我地兩個都有好處，如果唔係佢唔會放過我地架......」凱晴還沒說完，庭警就把她拉走...... 

「凱晴，佢係邊個阿，唔好走阿凱晴！！」我嘗試拉著凱晴，但狠心的庭警強行把我推開。 

「記住，唔好再問阿！」凱晴被拉走前大聲回答著。 

就這樣，凱晴消失在我的眼前.......
 
經過這件事件後，家姐很少再番黎屋企住，佢男朋友俾錢佢落左個亂倫下的產物之後，佢就搬晒所有野去左佢男朋友屋企住，連學都無再番。我覺得我對我家姐的打擊實在太大，現在有佢男朋友睇住佢，可能是最好的結局。 



而我呢件事上左幾日新聞的A1，雖然有打格仔，報紙亦沒有開全名，但係發生咁大件事全間學校都知道我係男主角，唔好講同學，連老師下課後都唔願意跟我多說一句話。我雖然離開了鐵籠，但是返回現實社會面對眾人的有色眼鏡，豈不是變相換了另外一個大鐵籠把我重新鎖住，只是形式不一樣而已。 

身邊有很多親戚朋友都問我點解唔轉校，為的只是一個原因，凱晴除了加拿大的家人外，所有朋友都在這間學校裡讀書，我一定要在這裡弄清楚所有事情，然後等待凱晴出獄回到我身邊。 

< 我在籠裡的日子　－　全文完 >