[真人真事][校園][純愛]《最陌生的人，就是曾經最熟悉的人》: 第二十二章

踏入十二月,
代表聖誕就快來臨喇
以往每逢聖誕,
我都會喺屋企打機同埋聽lonely christmas
年年都係咁
唔知今年約唔約到呀琳呢
不過喺呢個大節日之前,
發生左一段小插曲
話說喺十二月頭,
有一日呀琳好唔舒服


佢係好勤力嗰啲學生
基本上冇乜邊日會缺席,
所以佢有時病緊都照返
不過今次睇嚟又唔係病喎
因為佢冇帶口罩
係有時見佢個樣有啲辛苦
小息嗰陣都伏左喺張枱度
係之後聽到Candice問佢係咪痛
先知佢真係有事
但唔知佢邊度痛


咁啱嗰日要補習,
所以放學同佢一齊行去補習社
途中都比平時行得慢
亦都比平時靜
我:「你邊度有事呀 」
呀琳:「親戚嚟呀 」
嗰陣我就知咩事喇
我:「呢啲野我幫你唔到喎 」
呀琳:「咁又係...... 」
我見佢咁唔舒服,


都廢事撩佢講野喇
原來有時兩個人靜靜地行路,
個感覺都唔錯
特別係同緊一個你鍾意嘅人一齊行
補完習之後,
佢個情況都係差唔多
咁我就提議不如食碗熱野啦
呀琳:「好呀 」
呀琳真係搞笑
成日都無厘神氣,
一話食甜野,
即刻龍精虎猛
有返活力
我聽講m到食熱野會好啲
所以先咁講


利申我都係聽講架咋
咁我地就去返上次嗰間糖水舖啦
食甜品嗰過程就唔多講喇,
上一章先講完
費事悶親大家
我送埋佢上巴士先走

返到去Candice無啦啦打俾我,
我:「無啦啦打俾我做乜勁 」
Candice:「衰仔講單好消息俾你聽 」
我:「有咩好消息咁巴閉呀
要專登打俾我講 」
Candice:「糖水飽唔飽呀 」
我心諗點解佢會知架
唔通俾佢見到


冇理由丫,
我地補完習都好夜喇喎
佢冇理由咁夜都唔返屋企
定係呀琳同佢講左
我:「點解你會知嘅 」
Candice:「你同邊個食丫
佢啱啱同我講左喇 」
我:「無啦啦同你講做乜 」
Candice:「唔使咁驚,
佢同我講嘅野就係我打俾你嘅目的 」
我:「有屁就放 」
Candice:「死仔呀琳讚你呀 」
聽完之後個心梗係飄飄然架啦
女神讚我喎
但梗係要暗爽啦


費事俾Candice知道我喺度自high
我:「讚乜呀 」
Candice:「佢話你好細心
無啦啦話同佢食甜品
仲要特登食熱嘅甜品
我聽佢語氣都覺得佢好開心 」
我:「你見唔到佢個樣咋
真係好辛苦
咁咪一齊食碗熱野囉 」
Candice:「死仔心思好細密喎 」
我:「識左呀琳咁耐
點會唔知佢極鍾意食甜野 」
Candice:「我同佢有時食飯講起你
佢都笑得好甜 」
我:「你有冇幫我問呀 」


Candice:「呢個就係我打嚟嘅第二個目的 」
我:「Candice姐咁快啲開估啦 」
Candice:「答案就係......
佢話唔講住
遲啲先講俾我聽
不過一講起嗰陣,
佢啲反應話俾我聽,
應該係好野嚟 」
我:「我信你架喇 」
Candice:「我一知就話俾你聽
係喎,
聖誕就嚟喇
有咩行動呀 」
我:「仲諗緊呀 」
Candice:「你放心,
我一放聖誕假就去旅行
一月先返 」
我:「死乞衣又喺度曬命 」
Candice:「幫緊你咋
仲鬧我乞衣
費事聖誕喺度阻住你呀 」
我:「咁多謝晒喎 」
Candice:「講多謝有咩用
要用行動代表你心意架嘛 」
我:「又想飲野 」
Candice:「不愧係識左十幾年
叻仔 」
我:「唉飲喇飲喇 」
Candice:「多謝 」
死狗西
又呃野飲