我地掃完街,
行完一輪,
都成十點幾
之後去邊呢
話晒都係除夕夜,
係咪應該要跟大隊去尖咀慶祝
然後倒數
我真係冇頭緒呀
鬼叫我冇經驗咩
我:「依家係咪要去尖咀慶祝就到2007年


呀琳:「嗰度好多人喎
老實講我就唔係幾想喇
我:「你咁搞笑嘅
竟然倒數都唔想多人
食飯又係
寧願掃街,
都唔食啲乜q高級餐廳
呀琳:「咩喎,唔得咩
我:「得
實得架


呀琳:「呀,
我諗到去邊喇
我:「去邊度呀
呀琳:「不如返返去我地屋企樓下嗰間糖水舖
呢間糖水舖即係之前我地食開嗰間
我:「你真係好野
啱啱食完又食
呀琳:「你唔知女仔有兩個胃架咩
我:「係女仔有兩個胃定係肥妹有兩個胃先
呀琳:「死人頭


成日都咒我肥
唔睬你呀
我:「講下笑啫
呀琳:「唔好意思唔好笑喎
我:「係係係
唔肥唔肥
呀琳:「你肥啲定我肥啲
我:「梗係我啦
係咪先
呀琳:「算你啦

之後我地上左巴士返去我地住嗰頭,
好彩時間尚早(十點幾)
架車唔多人,
我地可以一齊坐


呀琳:「樂仔借個膊頭俾我瞓覺丫
繼上次旅行之後,
我終於可以再借多次個膊頭俾呀琳
咁梗係得啦
我:「你瞓落嚟啦
呀琳:「多謝
之後佢就瞓咗落嚟,
呀琳:「今日行左陣好攰呀
我:「慢慢瞓啦,
落車叫你
呀琳:「嗯
我相信每個乘客見到我地,
都會覺得我地係拍緊拖
但係,
呢個已經係我地最接近嘅距離,


望住熟睡嘅呀琳,
我不期然會諗起
幾時我先可以用男朋友嘅身份,
去借個膊頭俾你
我好想有朝一日會係你自己瞓落嚟
覺得我借個膊頭俾你係理所當然
唔知幾時先會有呢一日,
我自己搭車就唔多瞓覺嘅,
更何況依家呀琳瞓喺我膊頭度
我更加唔可以亂郁
費事佢瞓得唔舒服
當然啦,
我好想好似電影入面嗰啲男主角咁樣,
趁女主角瞓緊覺,
就偷錫佢一啖


但現實上嘅我係做唔到
真係太淆底喇,
萬一俾佢發現左,
就水洗都唔清
對住佢,
我從來都係用保守嘅態度,
因為好怕失去

我:「落車喇
呀琳:「落車喇
咁快嘅
我:「你瞓喺度梗係覺得咁快啦
呀琳:「係咩
好明顯佢依家仲未係好醒,
我:「落去啦


唔係話食甜品咩
呀琳:「係喎,嘻嘻
我:「一講甜品你即刻醒
服左你
呀琳:「仲講
行啦
落到車,
我地就去返熟悉嘅糖水舖
老闆娘:「細佬細妹食乜野呀
呀琳:「一個香蕉船
一個海底撈野
老闆娘:「好呀
你兩個咁乖嘅
除夕夜都走嚟呢度拍拖.」
我同呀琳都呆左一呆
老闆娘:「唔玩你地喇,
好快有得食
老闆娘走左之後,
呀琳塊面即刻秒紅
呀琳:「好熱呀可
我:「係呀
呀琳:「嗱,
我淨係好熱咋
唔好誤會其他野.」
我就R晒頭喇
究竟我誤會啲咩呢
我:「誤會啲咩呀
呀琳:「冇呀冇呀
冇就最好
我:「即係咩
呀琳:「唔明就算啦.
唉.」
我:「你唔開心呀
呀琳迅速變面
呀琳:「冇呀
甜品快啲到就好喇
好肚餓呀
我:「雖然話有兩個胃啫,
但係你幾個鐘頭前先食完野咋喎
呀琳:「你唔明架喇
好耐好耐之後我先發現,
呀琳呢句可能係語帶雙關,
但當時嘅我就梗係唔明啦,
老闆娘:「香蕉船同海底撈野
呀琳:「正,
有得食
我:「其實你冇試過有一日係冇食甜野
呀琳:「冇喎
就算嗰日冇食甜野,
我都會飮甜野,
所以屋企好多可樂
你都見識過架啦
估唔到一個身形窈窕嘅女仔,
係會日日飲可樂
呀琳:「俾舊野你喇
費事成日話我搶你啲野食
我:「我係咪要回敬架
呀琳:「最好啦
咁我梗係識做啦
成程就係佢俾啲我食
我又俾返啲佢食(我指甜品,唔好諗錯隔離)
有時真係唔使要做好多野,
簡簡單單
食個甜品已經好開心
呀琳:「不如我地再叫一個share嚟食
我:「你仲食得落呀
呀琳:「有你喺度嘛嘻嘻
我:「你想食乜
呀琳:「海底撈野或者楊枝甘露
是但一個
我:「海底撈野囉,
反正咁好食
下次先楊枝甘露
呀琳:「好
就係咁,
我地又叫多個海底撈野