[真人真事][校園][純愛]《最陌生的人，就是曾經最熟悉的人》: 第三十五章

我:「落車喇 」
呀琳:「好,
又夠鐘食野喇 」
我:「啱啱瞓醒就食到 」
呀琳:「係呀
你唔得嘅咩 」
我:「唔得
起完身一定要等一陣先可以食野 」
呀琳:「咁怪嘅你 」
我:「唔係你怪啲咩 」


各位巴打絲打,
不如你地講喇
究竟係邊個怪啲
我真心想知
我真係唔可以一起身就食
個胃口完全未開,
呀琳:「唔好講邊個怪啲喇,
快啲去買蛋糕啦 」
入到去蛋糕舖,
呀琳:「你想食邊隻 」


平心而論我就冇所謂嘅
但係我知道呀琳鍾意食朱古力蛋糕
仲要蛋糕裏面係冇其他餡,
你知有啲蛋糕,
裏面係會有提子呀
或者其他生果做餡
但係呀琳就唔鍾意
既然係咁,
我就揀一隻冇其他餡嘅朱古力蛋糕
可能最奇怪係我先啱


自己生日,
竟然唔係根據自己嘅口味嚟揀
而係走去迎合人地,
不過講真丫,
食咩蛋糕又有咩所謂
反正當我想食嗰陣,
隨時都可以買到
但呀琳就唔係成日都可以陪我食
所以遷就佢我覺得冇乜問題
我指住個冇其他餡嘅朱古力蛋糕講:「就呢隻.」
呀琳:「有品味丫 」
計劃成功
都估到佢鍾意呢隻
呀琳:「我俾得啦,
有乜理由要你出錢


話晒都係你生日 」
我:「咁多謝晒喎 」
呀琳:「之前你請過我食生日蛋糕,
我記得嘅 」
原來呀琳記得
記性都幾好
話晒都幾個月前,
我:「去邊度食呀 」
呀琳:「梗係天台啦 」
呢個天台即係我地之前去嗰個,
我:「咁夜仲去天台
有冇光呀 」
呀琳:「插蠟燭咪有光囉 」
我:「醒喎今次 」
呀琳:「使乜講 」



之後我地就上左去天台,
呀琳:「好
插蠟燭先 」
我:「係喎,
插完真係夠光 」
呀琳:「你唔係冇插過蠟燭呱 」
我:「真係冇 」
因為以往屋企人同我慶祝嗰陣,
我都係叫佢地唔使搞咁多野
仲細咩
拿拿臨食完就算
不過今日,
呀琳令我再一次返返去細個嗰陣咁樣
食生日蛋糕嗰陣,


係要插住蠟燭
然後吹熄佢
呀琳:「許願啦 」
我:「你信呢啲嘢嘅咩 」
呀琳:「信呀
快啲許啦 」
呀琳叫到就冇辦法唔許啦
咁我許左咩願呢,
就係好老套咁想呀琳以後開開心心
同埋奢侈啲想以後陪住佢
哪怕係做兵都好
對住呀琳就係咁,
可以冇晒尊嚴
當然,
我相信呀琳唔會咁做嘅


你估佢係啲普通港女咩
呀琳:「許左咩願呀 」
我:「世界和平
身體健康咁囉 」
呀琳:「真唔真呀 」
我:「真 」
我真係冇膽同佢講我真正許嗰個願
呀琳:「咁我地食囉 」
我:「嗯 」
食食下,
呀琳:「真係好好食
今次你真係揀得好 」
我心諗,
我就係知你鍾意食
先揀呢個
我:「梗係啦 」
呀琳:「係喇
你第日大個左想做乜野 」
我:「講真我真係冇乜理想
三餐安好就夠 」
呀琳:「其實咁樣都唔錯
做人嘅野,
有時平平淡淡就好
與其咁落力去滿足人地嘅期望,
不如踏實咁樣根據自己嘅想法去做 」
我:「你竟然同意我呢個諗法 」
呀琳:「同意呀
你自己覺得舒服就已經可以
你估真係好似啲大人話齋,
真係要好有理想先得咩
嗰啲係電視劇,卡通片先有 」
我:「咪就係
你就好啲嘅,
做女仔又生得靚
求其釣搵個金龜咪得 」
我特登講呢句,
想睇下佢個愛情觀係點
識佢咁耐都未聽過佢講呢方面嘅野
呀琳:「我追求嘅愛情唔係咁樣
可能你唔信啦,
但我覺得搵一個自己唔鍾意嘅有錢人去拍拖係好辛苦嘅事
冇錯,
你嘅經濟環境係會好好,
要乜有乜
但只限於用錢買嘅野,
乜你個心真係好開心咩
你要對住一個你自己唔鍾意嘅人,
嗰種感覺我覺得好辛苦
因為你都唔鍾意佢,
當你面對住一個咁嘅人,
你就唔可以將你嘅真性情表露出嚟
拍拖呢啲私人時間都唔可以做番自己最舒服嗰一面,
咁樣真係好辛苦 」
我:「的確係
都大個左,
唔係成日都可以將你嘅真性情表露出嚟
唯有喺拍拖又或者喺屋企嗰陣,
先可以做返自己 」
呀琳:「第二啲女仔我就唔知啦,
我追求嘅愛情好簡單
舒舒服服,
平平淡淡就得喇 」
唔知係咪我錯覺,
以前嘅女仔,
真係冇依家嗰啲咁拜金
咁當然,
有時拜金都正常,
現實啲講句,
個世界冇錢點得丫
我只可以話我睇法唔同
唔會去踩呢啲拜金女
呀琳:「食飽飽
走囉 」
我:「好 」
呀琳:「今晚我搭返巴士得喇,
費事你好似上次咁樣
凍到成個人都震 」
我:「好啦 」
呀琳:「條頸巾要keep住用呀 」
我:「收到晒 」
呀琳:「拜拜 」
我:「拜拜 」
我永遠都記得,
喺我十六歲生日嗰陣,
有一個我鍾意嘅女仔陪住我渡過
嗰種感覺係開心,
真係好開心,
因為罕有.