老實講,
嗰晚我都瞓得唔係幾好
因為我都唔知今日應該點樣拒絕,
個心情真係好忐忑
我係好想同佢講,
其實我唔係唔鍾意佢,
喺好耐好耐嗰陣,
我已經鍾意緊佢
但就係因為有啲外來因素,
搞到我唔可以按照住自己嘅心意去做


我係好想好想去接受佢,
但我真係冇信心去應付long d
有時我都喺度問自己,
如果我從來冇鍾意過佢,
咁幾好呢
十年之後,
我對於自己呢條問題,
終於有答案
比我揀多一次,
我都係冇後悔自己鍾意過佢


因為我知道,
如果唔係鍾意佢,
喺我個腦入面,
就會失去一啲我依家最鍾意嘅回憶
結果雖然令人唔如意,
但係仍然慶幸有出現途中嘅過程

去到兩點半,
我一步一步咁樣行上去天台
平時完全唔覺得,


行上去天台係咁漫長,咁沉重
呢一刻我覺得上去天台嗰條路好難行
定係因為我覺得,
我唔想做一啲我唔鍾意做嘅野,
所以自己嘅潛意識就放慢我嘅腳步
等件事遲啲發生,
拖得一陣得一陣
但係,
路係有限嘅
任我點樣放慢腳步,
我始終都係會上到去
一上到去嗰陣,
就見到有一個背影喺度
一個我一生都唔會忘記嘅背影
聽到我啲腳步聲之後


佢終於擰轉面,
呀琳:「到左喇樂仔
我:「係呀
你約我上嚟做乜
佢係唔知道我會知佢想表白,
所以決定扮唔知
對唔住呀,呀琳,
先講一個大話
呀琳:「今日係咩日子呀
我:「8月1號囉
有乜特別
呀琳:「的而且確冇乜特別,
不過我有辦法將佢變得特別啲
我:「即係點呀
呢個時候我一定要忍住,


唔可以喊
唔係就會前功盡廢,
我記得嗰陣我係揸實個拳頭
因為我隻手放喺側邊,
佢應該見唔到我隻手個動作
呀琳:「8月1號會係我地嘅拍拖紀念日
明唔明呀
我明呀,
我真係明,
今次唔好鬧我蠢喇
但係我要扮唔明,
當我一答明,
我地就會拍拖,
我地就會正正式式成為情侶
我相信我地會過得好開心


但更加相信半年之後分離嗰陣更加傷心
所以我一定要答唔明
對唔住呀,呀琳,
要講第二個大話
我:「我唔明喎
即係點呀
呀琳:「你真係好蠢呀
我鍾意你呀
我想同你拍拖呀
我好想同你渡過中五,會考,高考,大學,
仲有大學之後嘅日子
咁樣你明唔明呀
之後呀琳攬住左我
佢應該覺得,
我會答一個佢滿意嘅答案


我都好想答呢個答案,
但奈何真係唔得
腦海入面有把聲同我講,
忍住呀樂仔,
你忍心你將來去到外國仲要拖住呀琳咩
你想浪費佢嘅人生咩
你想佢為左你放棄其他男仔咩
你憑乜野令佢放棄呀
你個價值咁高咩
所以我好想答好,
我都唔可以咁樣答
對唔住呀,呀琳,
要講第三個大話
我:「我地之間係咪有啲誤會呀
之後呀琳無啦啦鬆開我
呆左一呆咁樣望住我
呀琳:「你講咩呀樂仔
我知啦,
你係扮唔知
我:「我知呀
我地之間係咪有啲誤會呀
呀琳呢個時候已經淚流滿面
呀琳:「夠喇,
唔好玩喇
我好認真架
我:「我都好認真呀
其實我知架
你鍾意我,我鍾意你
大家冇誤會呀
如果我醒啲,
一早知你心意嘅話,
我會趁我未知道要去外國嗰陣,
就會同你拍拖
但係我真係好蠢咁
你俾晒signal我,
我都仲唔知
呀琳:「唔通淨係得我誤會
你唔係怕醜,
原來你係真係唔知架
我:「唔知啲乜野
呀琳:「你feel唔到我鍾意你咩
我係好鍾意你呀
我一定揸實個拳頭講,
如果唔係我就會前功盡廢
我:「我同你誤會左喇
呀琳:「你成日陪我食甜品,
幫我慶祝生日,
晚晚都同我傾電話,
除夕生日都肯陪我出去,
真係我誤會左
我:「係
我覺得已經諗唔到其他野,
淨係識答係
呀琳:「你鍾意聽我彈琴,
肯借個膊頭俾我瞓覺,
我整親嗰陣你咁著緊,
真係我誤會左
我:「係
呀琳:「我唔信呀
呀琳完全唔信,
呢個時候我一定要講啲違背我良心嘅野
令佢相信
我:「冇得你唔信
我只係覺得你係一個好靚嘅女仔
跟住就冇其他野喇
當初都係你撩我講野先嘅
對唔住呀,呀琳,
要講第四個大話
呀琳:「你做咁多野,
只係因為你覺得我係一個好靚嘅女仔
如果我唔撩你,
你就唔會搵我傾計
我:「係
呀琳:「除此之外就冇其他原因
我:「係
呀琳:「我要你親口同我講,
你有冇鍾意過我
我:「冇

今次係我第一次拒絕呀琳
對唔住呀,呀琳,
要講第五個大話
呢個大話,
係我人生入面講過最大嘅大話
我講完冇之後,
呀琳成個人崩潰晒
跪左喺地下係咁喊
我個腦出現左兩把聲音
一方:「樂仔後悔仲嚟得切喎,
你真係忍心睇住佢咁樣喊
另一方:「樂仔你要忍住呀,
做咁多野唔可以前功盡廢
我行過去安慰佢,
我:「唔好咁啦
呀琳:「你走呀
都唔鍾意我仲過嚟做乜
唔使你可憐
我從來冇聽過呀琳咁大聲講野
就算佢喺溜冰場嘅尖叫,
都冇呢一刻咁震撼
我:「唔鍾意你都可以安慰你啫
呢句野,
「唔鍾意你」係假
「安慰你」係真
呀琳:「你走呀
唔使你對我咁好
我:「咁
你自己小心喎
呀琳:「走呀
我:「拜拜.」
今次我講拜拜,
佢冇再回應我喇
呢句亦都係我最後同佢講嘅野,
或者呀琳從來都唔知,
喺嗰日,
並唔係得佢一個喊,
仲有個人,
係背住佢,
離開天台嗰陣,
靜靜地喊,
呢個係我人生入面,
最後悔嘅位置.