[真人真事][校園][純愛]《最陌生的人，就是曾經最熟悉的人》: 第五十一章

日子總係要過
雖然我已經唔可以同呀琳一齊去經歷任何野,
但係我亦都冇喺度自怨自艾,
不停放負
因為我覺得咁樣做冇必要
你想要嘅野,
唔會因為咁樣而攞得返
加上我亦都唔想身邊人知道我發生左啲咁嘅事,
所以日頭盡量扮到好似冇野咁樣
況且條路係我自己揀


當時我仲不斷說服自己,
我咁樣做係長痛不如短痛嘅處理方法,
反正遲早都會跌到好痛,
倒不如早啲跌
咁咪有多啲復完時間去康復時間
當然講係咁講啫,
一到夜晚上床嗰陣,
我就會諗返起呀琳嗰日嗰個崩潰樣
同埋佢大聲叫我走嗰把聲音,
我真係好唔捨得佢


我有時喺電腦開msn,
見到佢個狀態係綠色嗰陣,
我真係好想禁佢個名,
打開個通訊框
同佢好似以前咁樣傾計,玩遊戲,
縱使我唔會贏到佢都好,
明知輸我都想玩
因為我根本唔介意輸贏,
我只係好想利用遊戲去同佢溝通
但我知道已經冇可能,


呢個時候安慰佢嘅人已經唔會再係我
個個都可以,
唯獨我唔得,
事後睇,
其實我當初係講錯左
原來我都係好介意輸贏,
因為今次我唔係輸左一場遊戲,
而係輸左一個人.

過幾日,
Candice又上左嚟食飯
呢排佢係上得密左,
多數係因為我想知道呀琳嘅近況
佢又話喺電話講冇咁舒服
所以就多左上嚟,


我:「佢好返未呀 」
Candice:「佢表面睇好返好多
呢排我陪佢出嚟嗰陣,
同以前冇乜大分別
不過有時見佢隻眼都係腫
直覺睇佢仲未康復 」
我:「我都明嘅,
發生左啲咁嘅事 」
Candice:「係喇,
我講多樣野俾你聽,
不過你應該唔會想聽到 」
我:「關於呀琳嘅 」
Candice:「係呀 」
我:「咁講啦,
只要係佢嘅野我都想知 」


Candice:「係佢前日同我講嘅
佢話其實仲未放低你,
所以佢想用盡一切方法去忘記你 」
我:「即係點呀 」
Candice:「佢話佢會潛意識同自己講,
從來冇識過你
佢講,
只有咁樣做,
先可以幫助佢忘記到你
佢講起嗰陣都忍唔住喊
試問咁樣,
佢又點會係康復左呢 」
我:「唔緊要
其實我都預左啦,
發生左單咁嘅事之後,


我冇諗過我地可以返返去以前咁樣
如果換轉係我,
我諗我都會咁樣做.」
Candice:「佢直情係想斷絕關係喎
你地以後可能會形同陌路,
你甘心咩 」
我:「唔到我唔甘心
只要係佢覺得好的話,
我就冇問題
唔知你冇聽過有一個好老套嘅說話,
如果你真係好鍾意一個人,
嗰個人舒服就係一切
相比之下,
我嘅唔開心只係好微不足道 」
Candice:「識你咁耐,


估唔到原來你係一個咁嘅人 」
我:「你唔知我幾好啫 」
Candice:「有啲乜野同我講啦
隨時奉陪 」
我:「咁你咪好辛苦
又要睇住呀琳,
又要睇住我 」
Candice:「再辛苦都要啦
鬼叫你兩個係我老死咩 」
我:「多謝晒 」
Candice:「唔慣你用呢個態度同我講野
我受唔起 」
我:「收皮啦
咁樣得未呀 」
Candice:「都係咁樣慣啲 」

聽日呢單訊息之後,
老實講丫,
我點會接受得到
一個你鍾意嘅人,
以後唔會再同你有任何接觸
點會完全冇野丫,
呀琳似乎係好認真
因為我喺msn,
已經唔會再見到佢在線上
全部都係顯示為離線,
佢冇可能日日都唔on,
即係話佢應該封鎖左我
我以後唔會再見到佢個狀態係綠色,
永遠只有灰色
同我腦海一樣,
記得以前呀琳講過以下嘅說話,

我:「睇嚟你都幾恩怨分明,
親生都冇情講.」
呀琳:「係架,
所以你第日咪激嬲我呀,
我會好嬲你架.」
我:「我點會激嬲你呢.」
呀琳:「咁又係,
嘻嘻.」

我冇口齒,
講過嘅野做唔到
呀琳就唔同,
講得出呢句野,
佢就一定做得到,
件事已經冇彎轉,
佢真係會同我斷絕所有關係,
連朋友都唔會係.