時間一日一日咁樣過去,
轉眼間已經嚟到十月
十月係一個好重要嘅日子,
點解咁講
因為呀琳係喺十月十四號生日
我仲記得佢上年生日之後,
我好想同佢渡過以後每一個生日
無論係用乜野身份都好
但係估唔到,
今年已經唔可以咁樣做


世事真係好奇怪,
總會出現好多變數
當中嘅變數,
你係唔會估得到,
即使我唔可以同呀琳慶祝生日
但我都好想送禮物俾佢
但係如果我送的話,
我叫佢多數唔會收
咁點做先好呢
唉,


又要搵Candice幫下手先

我:「靚女Candice有野想搵你幫幫手
Candice:「做乜野呀
我:「呀琳係咪今個月生日嘅
Candice:「係呀
咪下個星期日囉
我:「我想問你會唔會送禮物俾佢
Candice:「梗係會啦
無啦啦做乜咁問


我:「冇,
如果你唔送,
我諗住買份生日禮物俾佢
之後用你嘅名義丫嘛
Candice:「原來係咁咋話
好簡單啫
我:「你諗到咩辦法
不妨同小弟講下
Candice:「你依家想送禮物俾佢
但又唔想用自己嘅身份送丫嘛,
啱唔啱先
我:「醒左喎
竟然一講就中
Candice:「超
不嬲咁醒


我:「係喇
咁樣跟住呢
Candice:「你用我呀媽個名義咪得囉
我呀媽同呀琳都算熟,
如果我同呀琳講,
話我呀媽送禮物俾佢
佢都唔會覺得好怪
而且一定肯接受
我:「咁唔該晒你喇Candice姐
不過你怕唔怕呀琳問你呀媽
我驚到時穿煲啫
Candice:「放心啦,
呀琳唔係嗰啲咁多口嘅人
而且我會同我呀媽講架啦
我地會夾晒口供


總之一定唔會穿煲
我:「咁靠晒你
係啦仲有呀,
你幫我睇下呀琳有冇新水樽
係咪仲係用緊舊嗰個
Candice:「如果我冇記錯就係
不過唔肯定,
我下個禮拜返學幫你睇下
你想送水樽呀
我:「係呀,
我之前行街嗰陣
見到有個蠟筆小新水樽好靚,
我諗住送個水樽俾佢
Candice:「仲記得人地鍾意蠟筆小新喎
我:「好多野都記得


上年呢個時候,
我應該係同緊佢傾電話
上至天文,
下至地理,
乜都傾一餐,
總之係好開心,
一年之後,
好多野已經變晒
到左夜晚總係會令人亂諗野
咁下個禮拜返學嗰陣,
Candice就幫我留意到呀琳仲係用緊嗰個舊水樽
咁就得啦,
我可以放心去買個新水樽
希望佢會用啦
我知你地會問我,


點解唔自己親手整啲小禮物俾呀琳
咁樣會仲有誠意喎
我都知,
但係我從小就已經唔識整呢啲手工藝
完全零天分
我都唔知點解
總之就係冇藝術細胞
就算整左出嚟之後,
個外表都係唔吸引
所以諗諗下都係唔親手整
費事呀琳唔鍾意啦
咁呀琳就係今個星期日生日,
我禮拜五喺後面跟完佢上巴士之後,
就去左商場買水樽
入到去,
我見到我想買嘅嗰個水樽仲喺度
好彩啫
因為之前都擺左喺度一段日子,
不過唔係次次都咁好彩,
遲左都仲有得賣,
有啲野,
遲左就係遲左,
想追都追唔返,
而且嗰啲野係冇得用錢衡量,
咁先最麻煩
算啦,
又講多左,
買完之後,
就嗱嗱聲俾Candice
因為Candice喺星期日會陪住呀琳
我依家俾左個水樽Candice,
喺星期日,
Candice咪可以當面俾呀琳囉
我:「就係呢個
Candice:「真心幾靚喎
我:「係咪架
Candice:「我估佢鍾意嘅
我:「之後就靠你喇
Candice:「得啦
呀琳,
唔好意思呀,
今日生日我陪唔到你食蛋糕,
又或者你唔會想同我食,
不過唔緊要啦,
你生日你話事
只要你過得開心就得啦,
同埋我有個奢想,
就係希望你會鍾意個水樽,
會攞嚟用就好喇.

星期日夜晚,
Candice打左俾我
Candice:「佢好鍾意個水樽呀
佢讚我媽咪好好眼光
仲話聽日會即刻用.」
我:「咁就好
佢有冇懷疑呀
Candice:「冇懷疑呀
我同佢講左,
話我一早同我媽咪講佢係鍾意蠟筆小新
所以我媽咪先送個蠟筆小新水樽俾佢
佢仲叫我多謝我媽咪添
亦即係你
我:「我幾時做左你呀媽
Candice:「唔知呀,
呀琳叫我多謝咋
聽到佢講句多謝,
我就已經好滿足
因為我仲可以令佢開心
雖然我要換轉個身份,
不過都冇乜所謂,
喺嗰晚
唔知點解,
我無啦啦喺屋企跑左出去
然後去商場買左個蛋糕,
一個朱古力,
冇餡嘅蛋糕,
自己一個喺度食
食食下,
覺得有啲苦
點解我上年食唔覺嘅
唔通佢改左啲調味?
定係因為,
我身邊已經冇人陪我食蛋糕
咁我就唔知道喇,
不過我都好傻咁樣,
拎住呀琳送俾我嘅鎖匙扣
對住一件死物喺度講,
生日快樂,
我都唔知點解我會咁樣做
可能我幻想嗰個有個「琳」字嘅鎖匙扣,
係佢主人掛
等我自己安慰自己,
或者係自欺欺人
第二日返到學,
我小息嗰陣特登行過去呀琳個位
偷望下有冇用到個新水樽,
之後見到佢有用到
咁就足夠,
我仲聽到有其他同學同佢講,
同學A:「生日快樂呀
雖然遲左一日,
個水樽好靚喎
生日禮物嚟架
呀琳:「多謝先
係呀
同學A:「邊個送架
呀琳:「Candice媽咪囉
好眼光呢
同學A:「係呀,
Candice你媽咪同呀琳好熟架
Candice:「好熟呀
熟到連呀琳鍾意蠟筆小新都知
呀琳:「係呀
我諗呀琳永遠都唔會知道,
個水樽係我送
不過如果我講個真相出嚟,
而佢聽完之後覺得唔鍾意嘅話,
咁我寧願唔講
鐘意一個人就係咁,
唔需要周圍同人講,
喺度宣揚你對佢有幾好,
買啲乜買啲物,
我覺得,
只要默默付出就可以啦,
係咪好傻,
或者係啦,
鍾意佢鍾意到傻左,
最傻嘅係,
明知佢已經同我再冇任何瓜葛
都照樣鍾意佢,
愛情,
就係咁令人盲目.