[真人真事][校園][純愛]《最陌生的人，就是曾經最熟悉的人》: 第五十八章

聖誕聯歡會完左,
跟住落嚟我地就放聖誕假
迎接聖誕節喇,
講就講得好聽
其實咪又係匿埋喺屋企迎接聖誕節
睇下av,打下機
咁就又一日,
好毒呀可
鬼叫冇人陪咩
Candice同上年一樣,


都係會出去旅行
不過今年就唔會玩咁耐
喺除夕之前就會返嚟
聽佢講,
好似話除夕會約呀琳出嚟
唉,
原本我可能可以好似上年咁樣
喺除夕嗰晚陪呀琳,
一齊踏入2008年
不過依家都睇怕唔得囉


搵Candice陪都好啲嘅,
至少佢唔係搵第二個男仔
冇錯,
其實我係好自私
呀琳依家同我乜關係都冇,
佢要約邊個,
我係理唔到
亦都唔輪到我干涉,
就算佢係我女朋友,
約邊個都有佢自由啦


更何況,
我同佢係比陌生人更加陌生
連朋友都稱唔上,
我又有乜資格去理丫
只係,
我真係有少少自私
如果我知道佢約第二個男仔出去,
我都可以預料,
我個心一定會乸住乸住
我相信呢個心情各位巴打都會明白,
明明大家乜關係都冇,
就係要咁執著.

聖誕就咁過左
對我嚟講只係平日


正如我頭先所講,
我做嘅野同平時冇分別
完全都冇聖誕氣息
我家老娘都有問我,
點解聖誕節唔出去玩
我嗰下都有自己喺度諗,
你想我點樣答你丫
唔通我同你講,
我同我想約嗰個人反左面
所以留喺屋企度,
而反面嘅原因,
係關於我去外國,
而呢件事係你地安排
唔通我咁樣同佢講呀
點樣講得出口


所以我最後都係話,
聖誕節太多人
寧願喺屋企算數
費事講咁多啦.

Candice真係喺除夕之前返左嚟
Candice:「你喺唔喺屋企呀 」
我:「喺呀 」
Candice:「咁就啱啦
我諗住上嚟俾手信你同埋伯母,叔叔 」
我:「上啦 」
之後Candice就上左嚟啦
佢派完手信之後
就入左我傾計,
Candice:「唔好話唔夠老友喇


睇下買左幾多野俾你 」
我:「多謝Candice姐
有米啦又去旅行.」
Candice:「一年去一次咋頂你 」
我:「除夕諗住去邊度威呀 」
Candice:「我之前咪同你講左嘅,
我會約呀琳去尖沙咀倒數 」
呀琳竟然唔係好似上年咁樣,
唔去旺角,
佢唔係話唔鍾意尖沙咀嘅咩
原來人真係去變得好快
一變嘅話,
係快到你接受唔到
定係因為,
佢唔想我返你勾返起啲傷心回憶,


所以就唔去旺角
又或者只係我諗多左
人地根本就唔放你啲野喺心上
咪自作多情啦挑
我:「去尖沙咀呀
好q多人喎 」
Candice:「有氣氛丫嘛
同埋又有巴士搭
夠晒方便 」
我:「你地晏晝出去,
倒數完先返 」
Candice:「係呀
無啦啦做乜咁問 」
其實我梗係有目的啦,
只不過唔會同你講
我:「識左我咁耐,
一年聖誕都冇陪過我
收皮啦 」
Candice:「你扮乜啫
你都係喺屋企架啦
仲叫你去做乜 」
我:「咁你問下我都好丫
我去唔去又係另一回事 」
Candice:「唔通你諗住聖誕同我同呀琳出去
其實我都ok嘅,
最多我喺度幫你解釋
佢實信我 」
我:「唔係呀你諗多左啦
我仲有個零月就走,
唔會搞咁多野喇 」
Candice:「係喎
唔講唔覺你好快就會走 」
我:「咪就係囉,
如果我喺想咁樣做,
我喺半年前就做左啦
使乜等到今時今日 」
Candice:「咁又係,
你決定左就得 」
Candice就係有呢度好
佢從來唔會迫我
我:「呀琳近排點呀 」
Candice:「ok呀
我有時都克制住自己,
盡量啲話題唔好提到你
基本上同以前冇乜分別 」
我:「咁咪好囉,
我最想聽到就係咁 」
Candice:「唔知佢係咪特登扮出嚟
定真係放低左,
我都唔敢問佢 」
我:「唔好問喇,
係放低左又好,
放唔低又好
總之見到佢咁樣就得喇 」
咁就已經得喇
你好叻女呀
可以咁硬淨,
睇見你咁樣
我都覺得好開心
只係,
開心嘅某一個角落,
都仲有一絲傷心嘅存在.