[真人真事][校園][純愛]《最陌生的人，就是曾經最熟悉的人》: 第六十一章

搭完車返到屋企條村,
我都仲係唔甘心
好想喺2008年嘅頭一刻就見到呀琳,
我已經唔會追求任何野
我淨係好想見佢一面啫
就算佢見唔到我都冇所謂,
所以呢個時候,
又上左去天台
等佢返嚟
其他人等人返嚟就喺巴士站等,


我就要上去天台等
其實我都唔想咁偷偷摸摸
但係我只有呢個辦法咋
我唔咁做就別無他選
嗰日係除夕夜,
嚴格嚟講係已經新一年
因為已經過左12點
所以附近都開著晒啲街燈,
令我好容易就望到樓下啲人
咁我企喺度,


一路望
我知道邊架巴士係會由尖沙咀開出
所以我一路望住有邊架巴士符合要求,
我等到成點幾兩點鐘,
終於見到有兩個女仔落車
呢兩個女仔,
一個係我最鍾意嘅人
一個係我青梅竹馬
終於等到喇
雖然係尖沙咀嗰陣見你唔到


依家總算係遲來嘅見面
之後我見到呀琳喺隔離個巴士站,
等緊平時佢搭返嚟屋企嗰架巴士
下
乜咁夜仲有嗰啲巴士嘅咩
咁點解佢上年仲同我行返屋企
而唔係搭巴士
佢上年唔係話咁夜冇巴士嘅咩
諗諗下,
我終於知道答案
我真係好蠢
原來嗰陣,
呀琳已經俾晒提示我
但我仲戇居居咁樣,
完全領會唔到意思


係嗰一刻我真係好痛恨自己
有乜理由會咁戇居
咁都唔知呀琳想點,
如果我當時一早知嘅話
可能今日嘅我已經係企喺佢隔離
同佢十指緊扣緊,
不過錯過左就錯過左架啦
時間係唔會等人,
上年嘅我都估唔到我地今年會搞成咁啦
我諗住,
我地今年會好似上年咁樣
一齊倒數,
一齊返嚟,
之後送埋佢返屋企(唔好諗邪野)
而家我都係送佢返屋企


不過係目送嗰隻送
同我理想入面完全唔同
我腦海入面係諗住拍住佢一齊行,
一年時間,
真係已經變晒啦
睇完佢上巴士,
見住架巴士走
我再拎出上年呀琳送俾我嘅鎖匙扣,
對住個鎖匙扣後面嗰個字講,
「呀琳,新年快樂呀.」
我都解釋唔到點解我要咁樣做
我嗰一刻係好自然,
係我個褲袋入面拎個鎖匙扣出嚟,
呢個鎖匙扣
就係上年除夕日,


呀琳送俾我
今年,
得返一個鎖匙扣,
送俾我嘅嗰個人,
就已經離開我好遠喇
我只係可以對住個「琳」字講新年快樂
而唔能夠對住當日拎呢個鎖匙扣去鋪頭俾人刻字嘅嗰個人講
再揸實我戴住嘅嗰條頸巾,
喺度自己同自己講
點解我見你唔到,
明明大家都係喺尖沙咀
係咪見一眼已經係好難嘅事
講完之後我就返屋企
2007年嘅除夕,
我去外國之前,


最後一個除夕,
咁就完左喇.

放完聖誕假,
自自然然就要返學
我記得我地當年1月尾就係放新年假,
二月頭就新年
嗰個新年假已經當埋係study leave
即係話1月尾,
放新年假之前嗰日就係我地中五嘅last day
咁返到去學校,
同之前冇乜點變,
我同呀琳繼續都係河水不犯井水
可能時間愈嚟愈迫切,
我就快離開香港
有時我自己喺度諗,
究竟好唔好主動同佢傾返計
如果依家唔傾,
可能以後都冇得傾架啦
但係,
當時嘅我,
始終都係唔想佢有一絲嘅唔開心
有時我同佢面對面行過嗰陣,
我有幾次都好想同佢講野,
哪怕只係一句早晨都好
但始終都係唔夠膽,
每一次都係直行直過
以前嘅我真係好冇膽
而呀琳,
我每一次面對面見到佢嗰陣,
佢都係得一個樣
嗰個樣好冰冷,
冰冷到令人難以親近
喺其他時間我冇見過佢咁嘅樣
原本我都有ff下,
唔知佢新一年會唔會同我傾返計
但原來,
由頭到尾都只係我諗多左.