[真人真事][校園][純愛]《最陌生的人，就是曾經最熟悉的人》: 第六十九章
返到去大陸
就問堂家姐可唔可以借部電腦俾我玩
堂家姐話好
仲叫我慢慢玩
對唔住呀堂家姐
其實我都唔想咁樣做
但係如果唔係咁樣做,
我諗唔到其他更加好嘅辦法
之後我個計劃就好成功
將啲相save落個手指度
今次我返大陸嘅任務就完成喇
返到嚟香港之後,
我就喺Angela Wong個面書上面用返手指入面啲相做icon
之後我就搜尋呀琳嘅全名
終於搵到佢個面書
然後戰戰兢兢咁樣,
撳嗰個加為朋友嘅按鈕
一撳,
畫面就顯示已送出交友邀請
呢個時候我個心卜卜卜卜咁跳
唔知佢會唔會accept我呢
唔知佢知唔知我係樂仔呢
應該唔會嘅
點會俾人知
我最擔心只係佢唔accept我
咁我就前功盡廢,
同埋連唯一一個接觸佢嘅方法都冇埋
希望佢會肯accept我啦
至於我用嚟社交嗰個面書,
即係啲人知我係樂仔嘅嗰個面書,
就從來冇加過呀琳做朋友
我始終都冇勇氣撳加為朋友嘅按鈕
到今時今日,
佢個版面都仲係顯示加為朋友
而唔係朋友,
估唔到,
我地喺面書上面
都只係一個陌生人
我唯一可以ff嘅就係,
我同佢都好有默契,
大家都唔加大家做朋友.
講返正題先
當我喺度躊躇緊佢會唔會accept我嗰陣
右上角個通知就顯示「你和xxx(呀琳嘅英文全名)已成為朋友......」
呢個時候我就暗自yes左一聲
估唔到佢真係肯accept我
但更加令我估唔到嘅係,
呀琳之後竟然inbox我
呀琳:「你係邊個
我係咪識你架
」係呀
我係識你架
我同你有好多開心嘅回憶
但亦都令你好唔開心
我唔知我地用乜野關係形容
但我同你的確係認識,
仲要曾經係好接近添
但係我唔可以咁樣講,
因為我唔係樂仔
我呢一刻只係一個叫Angela Wong嘅女仔,
所以我唔可以話我係識你
唔通好老土咁樣講,
我係你幼稚園同學咩
我又唔知你讀邊間,
萬一我話係,
跟住你唔信我
問我地係邊間幼稚園的話,
咁樣咪穿煲囉
之後我睇佢個簡介
見到佢like左醫神個專頁
跟住我撳左入去睇
見到佢有喺下面留言,
咁我就知點講啦
唯有搏下啦,
Angela:「唔係呀
不過我見到你like左醫神個專頁
同埋有留言,
咁咪add左你囉
因為我都係醫神粉絲
」我覺得,
投其所好係會令嗰個人放低啲戒心
所以我就咁樣講,
當然啦
我打呢個野嗰陣,
盡量避免我平時咁樣喺msn打字
驚俾佢認得
當然我都知,
其實呢啲都係我心多啫
佢可能已經唔記得晒,
不過有得避免的話,
就盡量避免啦
愈重視一個人,
就會愈小心
同埋用多啲表情符號
似返一個女仔丫嘛
呀琳:「我都係呀
好鍾意聽佢啲歌
」Angela:「識貨
我本身好少聽到有女仔鍾意醫神架
」其實梗係唔係啦,
醫神不論男女都好多人鍾意
身邊幾乎個個都係聽佢啲歌
我咁樣講,
都只係想有個藉口令呀琳覺得我係因為咁樣而加佢做朋友
呀琳:「係咩
我都有啲朋友鍾意聽佢
」Angela:「咪就係囉
佢啲歌咁好聽
係我啲朋友唔識貨
」呀琳:「哈哈
你咁話佢地架
」Angela:「真係丫嘛
」呀琳:「係喇,
Angela,
你唔介意我咁樣叫你丫嘛
」Angela Wong:「唔介意
你想我點樣稱呼你呀
」按照我係Angela Wong嘅關係
我係唔知佢叫呀琳,
所以我一定要先問佢咩名
唔係陣間口快快打左呀琳就大鑊
呀琳:「你叫我呀琳丫
係喇Angela,
你鍾意佢乜野歌呀
」Angela:「好多喎
數都數唔晒
」呀琳:「咁又係
但點都有幾首好鍾意嘅
」Angela:「人來人往啦
粵語殘片,阿牛都好鍾意
」其實我冇呃佢
呢幾首我真係好鍾意,
係真話嚟
呀琳:「估唔到有女仔會鍾意聽阿牛
」Angela:「哈哈係呀
雖然啲意思唔啱我,
不過我覺得好聽
」呀琳:「唔緊要啦都冇乜所謂
只係我聽歌,
鍾意了解埋個意思
」我知道呀
所以當初你就咁鍾意孤單心事
只係你唱俾佢聽嘅嗰個人當時唔明
先至咁冇心裝載
依家嗰個人明首歌係講乜喇,
Angela:「正常嘅
咁你鍾意聽邊首呀
」呀琳:「我都好多呀
最鍾意係不如不見
」你嗰個不如不見,
當中腦海幻想嘅畫面會唔會有我喺度呢
你對我嘅態度,
係咪就好似不如不見呢首歌咁樣
收到晒呀琳,
我知道要點樣做喇
Angela:「不如不見都好聽呀
咁好久不見呢
」呀琳:「鍾意粵語版多啲
」佢冇再講落去,
咁我就費事問佢點解唔鍾意
呀琳:「係喇,
Angela你今年幾歲呀
」Angela:「我今年A-Level呀
你呢
」冇錯,
我係明知都仲要問佢,
係因為呢一刻我並唔係樂仔
但咁樣係正常社交嚟
佢問我,我問返佢
呀琳:「咁啱嘅
我都係今年A-Level呀
」Angela:「估唔到咁橈喎
你讀咩科呀
」呀琳:「商科呢
你呢
」Angela:「文科.」
點解我會話我係讀文科
因為Candice係讀文科
咁遲啲呀琳問起我考成點嗰陣,
我都可以問返Candice拎料
當佢話讀商科嗰陣
我記返起佢以前教我econ嗰啲野
咁就過左三年幾,
一眨眼咁就過左
我地由喺msn傾計,
轉移到喺面書吹水,
我亦由樂仔變成Angela Wong
呀琳:「咁我地加油啦
有時溫書溫得唔好掂嘅,
都可以搵我傾計呀
我明有啲野真係唔知點樣喺現實同人講
網上傾計嘅有網上傾計嘅好
」Angela:「好呀
」呀琳:「拜拜
」Angela:「拜拜
」呀琳終於再一次同我講拜拜
好耐冇聽過喇
由2007年7月31日之後就冇聽
當日佢同我表白嗰日,
我最後同佢講嘅拜拜,
三年半後終於覆返我
當然我會清楚,
今日同呀琳傾計嘅,
並唔係樂仔
而係Angela Wong,
不過冇所謂啦,
我就係我
唔理其他人點睇,
又或者佢地知唔知個真相
呢啲唔重要,
最重要係,
我仲可以同呀琳有接觸就已經可以
唔理用咩方法,
用乜野身份都好,
咁就已經好足夠.