[倫理小品] 姐夫與小姨仔的不倫關係: 第十八章 : 死裡逃生

已經跑到上八樓, 我仍邊咳住, 邊大嗌住惠宜, 突然, 我聽到有把微弱嘅聲音響度叫住, 「姐….夫….姐….夫….」 係惠宜把聲, 我急到循住聲音方向走去, 搵到嘞, 惠宜果然就正坐響樓梯轉角嘅地下度, 見佢開始有啲昏迷狀態咁, 我即時將惠宜抱起, 跟住再急急腳咁向住樓下走去, 樓梯濃煙實在太濃密, 但我已經唔理得咁多, 心中就只擔心住惠宜嘅情況。
 
我抱住惠宜落左幾層樓之後, 跟住再行去其他無咁大煙嘅樓梯方向繼續向下走去, 惠宜已經無哂動靜, 而我就急到已經喊住出黎, 「惠宜, 唔好瞓呀, 就快去到樓下架嘞,  惠宜………」
 
已經去到三樓樓間之處,  剛好迎面見有幾個消防員正在上樓,  我見到咁急到正向住佢地大嗌, 「有人暈左呀, 唔該快啲送佢上白車呀!」 
 
落到樓下, 好快, 惠宜就已經比樓下嘅救護員抬左上白車, 而我亦跟住上車同惠宜一齊被送到醫院去,  去到醫院之後, 惠宜好快就被推入急症室內進行急救, 而我亦被帶到另一間房內作初步檢查, 雖然我都吸入左唔少濃煙, 而家就正係咁咳到死死吓, 但我就正擔心緊另一邊嘅惠宜, 惠宜, 妳千祈唔好有事至好呀。

我不斷問住護士惠宜嘅情況, 護士答我個女仔仲係昏迷緊, 似乎應該係吸入左唔少嘅濃煙, 聽到呢度, 我已經忍唔住開始流住眼淚起黎, 個傻妹居然真係會為左我, 傻到火燭緊都要跑上樓去搵我, 如果今次佢真係有事, 我睇我呢世都會對佢唔住同唔會安樂。
 


已經過左幾個鐘之後, 我苦苦哀求護士比我見吓惠宜, 幾經努力, 終於都得到負責嘅醫生首肯, 我到左深切治療部之內,  望住正響床上仲係昏迷住當中嘅惠宜, 響呢一刻, 我個心真係極度自責同難過。
 
我坐響長走廊處,  正無哂心機咁守候住惠宜最新情況嘅時候, 突然, 我見到一個男人, 已經生左BB 嘅惠姍, 同佢呀爸呀媽亦已經趕到左醫院, 佢地同護士了解左惠宜嘅情況之後, 惠姍見我坐左響惠宜病房門外長椅之處, 跟住就慢慢咁行到我面前呆企住響度,  四周嘅空氣好似凝結左咁一樣, 而我亦已經無晒任何感覺, 但心入面就只係關心房內惠宜嘅安危。 
 
突然, 惠姍居然響我面前跪低, 跟住就見佢喊到收唔到聲咁, 尼路正要上前之際, 惠姍示意尼路唔好多事, 惠姍開始同我講, 「偉,  我知係我對你唔住, 雖然我唔知點解惠宜會去果度, 但啲護士話比我知, 係你響火場內抱住惠宜救番佢出黎, 偉, 多謝你, 嗚….嗚….嗚….」
 
呢個時候, 深切治療部嘅護士正響房入面走出黎話惠宜經已醒番, 但護士話惠宜想見一個叫姐夫嘅人, 跟住就問我地知唔知佢想搵嘅姐夫會係邊個? 我起身行入房內, 病床上嘅惠宜一見到我, 即時就伸出一隻軟弱無力嘅手, 我捉住惠宜隻手, 兩個人就已經喊到收唔到聲。
 
惠姍一眾等人正響房外隔住玻璃咁黎望住我地, 好彩惠宜總算都叫做無事, 但就要繼續留響醫院內進行觀察同治療, 已經留醫左一個星期, 惠宜住院咁多日黎, 我每日都會去醫院度陪佢, 而我亦應承左惠宜響佢出院之後就會同佢響埋一齊, 而我地之間嘅戀情亦因此而終於都比惠姍佢地知道。