「 呢個BB眼仔轆轆,好可愛。」戴住白色手套嘅阿姨向我微微一笑。

嘻嘻,我遺傳自爸爸媽媽嘅優良血統,當然可愛啦。

「 不過就係塊臉肥左小小,大個可能會變做肥妹。」旁邊一個曲髮嘅姨姨伸岀指頭碰一碰我嘅臉頰。

「 女仔最忌就係俾人話肥。」戴住白色手套嘅阿姨轉身望向我。

「 小日見,唔好將頭先姨姨嘅說話放係心上。小朋友肥嘟嘟先可愛,先會有更多嘅阿姨叔叔錫架。」阿姨輕輕地摸一摸我嘅頭髮。





「 日見媽媽黎啦,我地岀一岀去先。」曲髮姨姨拉一拉手套阿姨嘅衫袖。

隨住姨姨們離開,踏入黎嘅係一個長頭髮嘅女人同一個留住劉海嘅小女孩。

「 日見,我嘅寶貝,你幾好嗎?」女人小心翼翼地抱起我。

好香,係一陣熟悉嘅香味。呢種香味,係我黎到世界上聞到嘅第一陣味。

「 暮晨,過黎同妹妹打個招呼,以後我地就係一家人。」媽媽向小女孩招一招手。





「 妹妹同暮晨好似樣。」小女孩失神地凝視住我嘅臉孔。

「 傻瓜,你地都係媽媽嘅乖女,當然似樣。」媽媽輕輕地敲一敲小女孩嘅額頭。

「 以後你地要好好地相處,知唔知?」媽媽一邊牽起我嘅手,一邊牽起小女孩嘅手。

個日係我第一次遇見程暮晨——個個陪我長大嘅姐姐。
已有 0 人追稿