第一章
 
有故事嘅男仔,Charm唔Charm?我以為冇,但又俾我識到一個原本好巴喳大小姐嘅女仔,佢因為我而變成一個小鳥依人嘅女仔,佢叫林佳君。我哋喺高登認識,起初都係喺度傾港產片,後尾佢捉住我做佢嘅水泡陪佢每日傾計,我咪捉住佢做我嘅樹窿對住佢抒發我嘅負能量。
 
我係一個屋企冇電腦嘅高登仔,本來得閒先會去圖書館借電腦上高登。但係,因為林佳君嘅出現令到去圖書館變成一件好熱血嘅事情,我每日都會去圖書館上高登,只要圖書館開門,我就會借兩粒鐘將諗定嘅對白PM林佳君。高登普通會員每日只可以PM其他會員三次,換句話嚟講,每日我最多係收到林佳君嘅三封PM,而我亦只能PM林佳君三次。啱啱識佢都係圍繞住講港產片,即每日大家合共六封PM,有兩封都係講港產片,有兩封就係講今日遇過啲乜嘢新奇事情,有兩封就係講心事。
 
有日我發覺佢竟然可以PM我多過3次,我Feel到佢好似鐘意咗我。因為只有高級會員先可以每日PM人哋多於3次,我望住林佳君Account嘅註冊日期,明明係2009年註冊,點會自動升級?未夠八年呀!佢肯定係遞交身份證去驗證升級。當時候我見到佢咁傻豬,我都忍唔住陪佢傻豬一次,去朋友屋企scan身份證升級做高級會員。後尾發覺每日五六次PM都係唔夠,於是我又走去問朋友借ISP Email,整多兩個Account同林佳君PM。
 
如果唔係林佳君同佢條仔分手,我諗我同佢真係日日keep住PM。我哋傾咗半年都冇諗過轉MSN同電話SMS,係林佳君有日PM佢屋企電話俾我。
 


我見電視劇入面啲女仔分手,唔係喊到豬頭咁嘅咩?林佳君冇喊,反而係爆seed狂鬧條仔想呃佢蝦條,佢唉嚟唉去話點解識親都係公子哥兒,點解都冇一個真心愛佢。
 
「你唔會都係咁咖呵?」電話入面林佳君忽然拋出呢句說話,令我既開心又緊張。
 
「唔會嘅,我……我唔知呀,我未拍過拖,我唔知。」
 
「嘻,做乜口窒窒呀?」
 
「我應該唔夠膽呃蝦條嘅……我嗰度好細……我冇試過……」就係唔知因為年少無知定純過蒸餾水,忽然爆響口,俾林佳君笑足幾年。
 


「哈哈哈哈,笑死人咩,自爆!」
 
嗰陣時WhatsApp仲未流行,MSN因為我屋企冇電腦所以唔方便用,於是我同林佳君除咗會喺高登PM嚟PM去,之後開始越嚟越多傾電話。
 
兩個港產片迷,因為港產片而相識,但林佳君係黃秋生嘅Fans,佢成日都會同我講「八仙飯店」同「伊波拉病毒」嘅劇情,嚇到我瀨尿救命。之後要喺夜晚傾電話,我喺樓梯口驚到成日覺得黃秋生會衝出嚟劈我。
 
但係驚,我又唔想掃林佳君嘅興,咪頂硬上。點知林佳君成日想扮黃秋生,要我陪佢做戲。但我真係唔敢睇曬嗰兩套戲呀。
 
「你唔係驚呀?我feel到你口震呀!」林佳君嘻嘻咁笑。
 


「冇,我男人嚟咖嘛,點會驚呀?」
 
「筷子大大力插落去!」
 
「Yeah,斬佢做叉燒包呀嘛。」
 
「你真係好懷疑你冇睇過。」
 
「我睇有線電視係冇筷子插咖wor。」八仙飯店張海報已經係我嘅噩夢我根本唔敢睇成套戲,我腦筋急轉彎,忽然醒起朋友講過有線版本係cut咗好多鏡頭,我咪即刻扮曬嘢話有線冇呢場戲。
 
「買VCD同DVD睇啦。」
 
「搵到先算啦。」
 
「Africa 叉燒包!」林佳君忽然大叫一聲,寒風陣陣,我嚇到差啲電話都跌埋落地。


 
當然我從來都冇同佢講過,其實我曾經係一樁兇殺案嘅唯一生還者,我親眼見過老豆發狂斬死老母,當時我得三歲,自此我留下陰影,一個人喺屋企要開燈先訓得著。我做過孤兒,但係好彩有爹地媽咪收養,先叫有返個屋企。