「高登情緣」「港產片Feel」有一種愛叫做純愛。: 第十一章

「我哋去海邊行下，坐下啦。」KK話。
 
就係咁，去到海邊，KK突然情感大爆發，爆喊。本身我就唔識點應付女仔，以上呢種場景更加不知所措，我除咗遞上紙巾都唔知可以做啲乜。KK坐喺度，我坐佢隔離，見佢唔拎紙巾，於是主動幫佢抹下眼淚同安慰下佢。第一次借膊頭俾女仔挨應該係愛情故事嚟，點知KK埋嚟，我完全feel唔到係愛情，而係膊頭一陣酸痛，因為佢喊咗好q耐，果然女人係水造嘅。我望住天空，腦袋放空。
 
KK開始哭哭啼啼地講嘢。
 
「長洲係我第一次見呀Wing嘅地方，亦係唯一一次見面嘅地方。」
 
「一直以嚟，屋企人都係想我嫁個好老公。住大屋，著靚衫，揸靚車，食好嘢，一年去幾次旅遊……做咩啫，呢啲唔係我想要過嘅生活，我係一個好簡單嘅女仔，著淘寶嘢，宅喺屋企煲劇，食住花生飲住啤酒已經好開心。」
 


「澳洲居留權我可以唔要，我只想返香港過返我想要嘅生活，如果可以就搵返Wing。我點解要去戲院追歐美大製作？我只想煲返以前嘅港產片。我點解要去高級餐廳食貴價嘢？我只想去茶樓食點心去茶餐廳食碟頭飯。」
 
太陽落山，天色暗曬，我聽KK講咗好多佢同佢EX嘅嘢，之後到我情感大爆發：
 
「如果我有能力嘅話，我協助你追返你嘅EX。」
 
KK望住我呢個死毒男，不禁爆笑，可能笑我冇呢個能力掛呵呵。
 
帶KK去福田又好似太遠，乾脆就返荃灣，住一晚半晚應該冇問題嘅，班大耳窿唔會咁勤力掛夜晚都喺度？
 


樓下食完嘢，我同KK就上返屋企。
 
「以後多多指教啦，我叫江曼喬，我啲friend多數叫我曼喬or喬喬。」入咗屋企後KK微笑咁自我介紹。
 
我推住曼喬嘅行李入房間，我心諗，下，多多指教？呢度唔方便日日住咖，呢度日頭唔安全咖，之後我就執好我老豆老母張床，開定熱水俾曼喬沖涼。待佢沖完涼後，我帶佢入房間叫佢訓啦，我再沖涼。
 
點知我沖完，曼喬都未訓。
 
「喂呀，我訓生普床唔慣，陪我傾住訓啦ok？」
 


「講明先，我夜晚訓覺可能會大叫，你唔好驚。」
 
「哈哈，咁得意？」
 
「童年陰影嚟，唔好意思。」房間同廳只有一墻之隔，而我就喺訓廳嘅梳發上同曼喬傾計。
 
「冇試過同男仔隔住個墻咁講嘢。」曼喬笑道。
 
「你聽日去邊度搵工呀？不如跟我一齊走IPHONE啦，行行企企，一日嘅糧都多過做侍應嘅5倍。」
 
「即係點做？」
 
「香港人興炒賣IPHONE，通常會賣IPHONE去先達等手機鋪，咁咁多IPHONE都需要搵人運返大陸咖嘛，我哋咪就係做呢啲角色，唔辛苦咖，一轉都係孭十部IPHONE。不過唔好驚海關，佢哋掃到我哋都冇問題，貨唔需要我哋陪，只不過要逗留喺海關辦公室一陣。」
 
「你同我一齊，我就唔驚啦！」


 
傾傾下，大家都訓著，到我打開眼個陣已經係早上七點幾。
 
「早晨呀，巴打！」曼喬踎喺sofa旁邊，眼仔碌碌望住我笑。
 
我即刻彈起，但冇理由表露出好驚佢嘅感覺，越驚佢越想捕捉我驚慌失措嘅表情，佢會挨埋嚟。
 
「喂，你啲行李擺喺度啦，我哋今晚應該都返嚟呢度訓嘅。」
 
「好。」
 
「都市情緣VCD，琴晚唔記得俾你添。」
 
「嘩，正！」曼喬如獲珍寶咁款，揸住張VCD笑得好開心，好似期待已久嘅禮物終於到手咁。
 


之後我就帶咗佢去樓下七仔買咗個包，之後再搭地鐵去落馬洲。
 
挨咗一粒鐘車程，終於到咗落馬洲。見到輝哥，佢即刻問我條女係邊個，我咪話係我朋友，一齊黎走IPHONE。咁等齊手足我哋就去咗飲茶，他幾個男仔一見到Kiko，就好似久旱逢甘霖，嘩個個都爭住嚟傾計。咁又係嘅，平時都係啲阿嬸喺隔離，係男人都扯火啦，堅嬲呀！曼喬個樣幾淑女，但見到燒賣蝦餃牛肉，大啖啖咁擦，睇得出佢好鐘意食香港嘅點心。
 
「安仔，咁你同你個friend一齊行啦，你教佢啦，信我，最好都係拖下手扮下嘢。」輝哥吩咐。
 
「得啦冇問題。」
 
轉個頭我就同曼喬講
 
「唔駛拖手咖，我哋好似朋友咁傾住過關就得。」
 
「好。」