嗰晚我哋睇咗套【精裝難兄難弟】,笑到碌地。
 
「你呀,唔好成日講粗口啦,戒咗佢啦。」
 
「咁,我鳳爪你嗰排骨!你馬拉糕軟淋淋!你蝦腸鬆泡泡。你春卷啦你。OK?」
 
「哈哈,全部都係我鐘意食嘅嘢,好啦,以後唔準講粗口啦。」曼喬輕輕摸摸我嘅頭仔,以視支持。
 
「喬喬,你有冇諗過,香港有一日會有第二個電影頒獎典禮,類似金像獎咁?」
 


「例如?」
 
「金像獎係頒獎俾過去一年優秀嘅電影,就算冇拎獎但有提名,嗰部戲都會因此受到關注。既然係咁,我都好希望有一日有一個頒獎典禮,可以提名返以前舊嘅電影,例如以前冇被金像獎提名過給電影,而又屬於滄海遺珠嘅,就可以獲得提名,交俾影迷同評審投票,例如2016年,可以搞一個回望40年,搵返1976年嘅電影嚟提名,再選出最佳。1976年有【半斤八兩】,我個人幾鐘意【跳灰】咖。如果我哋睇過呢啲咁好嘅電影都唔講,以後就冇乜人會知咖啦。好似啲人成日話【無間道】係神作,但我覺得1981年嘅【邊緣人】先係警匪臥底片嘅經典。」
 
「啱呀。又例如每年有咩叱咤勁歌新城十大中文歌曲,都係頒獎俾過去一齊嘅舊歌,咁點解唔可以統一搞兩個頒獎典禮,一個頒俾新歌,一個頒俾以前嘅舊歌。樂迷又可以聽少啲垃圾歌,聽返以前好正嘅粵語流行曲。」
 
我望住曼喬,曼喬望住我,似乎為大家嘅志同道合而開心。
射手座天馬行空,古靈精怪,啱key唔出去,但曼喬嘅出現令我覺得我絕不孤單,原來我有知己咖。
 
 


 
個晚訓覺嘅時候,曼喬忽然唔攬我訓覺,但我係唔會問嘅,扮曬冇所謂咁自己訓。
 
「陳先生,以後你要習慣冇人攬住你訓覺嘅時候lu,咳咳!」曼喬見我扮曬嘢,又出呀你戲弄我一番。
 
「不嬲都係你嘆我咋嘛,貪我肥仔攬住舒服,你唔攬係你損失啫,我又唔會恨。」
 
「頂!你都唔sweet嘅!你話想攬,我咪攬返你lor,費事你毒L玻璃心,喊喊豬。」
 
「都話人妻我冇興趣lor,做乜啫你?」


 
「哼!嬲死你呀!明明你就好想,明明你就好開心。」
而我就即刻扮訓,唔出聲,背脊對住佢,點知曼喬就係咁整我,捏我,最後又係攬住我訓。
 
擁抱的溫度,只有你清楚!澳洲妹性格係Open 啲,可能佢真係對我冇乜男女感情,只係兄弟or姊妹感情。但對於我嚟講,擁抱本身就係一種情感嘅表達方式,如果唔鐘意我,就唔好攬我,攬咗我,就唔好放手!心入面係咁諗,但又唔捨得離開佢嘅攬攬。
 
呢一晚我又係一個人喺度上高登。高登已經成為我生活一部分,以至於我成日都會上高登睇post。雖然高登越嚟越無趣,越嚟越少高質post。但係情感驅使,我依然係keep住上高登,我諗係一種習慣,係一種感情掛。再講啦,唔係高登我都唔會識得林佳君同曼喬。佢啲嘅出現填滿咗我人生嘅空白,豐富咗我人生,亦令我人生有返寄託。
 
如果四月嘅風都有些少涼意,咁五月嘅風就真係熱。曼喬亦終於練得一對瘦瘦長腿。
 
嗰晚睇一齊睇【港督最後一個保鏢】,笑到喊,曼喬如常係度一邊睇戲一邊織毛衣織圍巾,而我將準備嘅禮物拎出嚟,送俾曼喬。
 
「咩嚟咖?」
 
 


「你拆開嚟睇咪知。」
「你傻咗呀?買Chanel袋……」曼喬驚喜地見到嗰靚靚Chanel袋,把口似係怪責,但好似係冧嘅樣。
 
「成日用淘寶嘢,見返呀Wing起碼都要拎住個名牌袋先襯咖嘛,你咁高質你咁正你咁……唉唔想再擦你鞋啦,三皮幾一個袋,我覺得你應該同我拖手轉圈圈慶祝lor,而唔係怪責我lor。」
 
「咁貴,你碌卡呀?」
 
「得啦,三皮嘢,打個白鴿轉就返嚟啦,我呢啲人才。」
 
其實如果你唔走,我成個世界都只會係你一個,你要咩我都俾你啦,傻婆。
 
原以為好似電視劇般曲折離奇,點知順攤到令人意外。曼喬WhatsApp Wing,Wing竟然就搵返曼喬。
 
望住曼喬帶住呀Wing返屋企執行李,成個幸福小女人咁,我就知道佢搵到佢夢寐以求嘅愛情了。
 


「多謝你呢五個月嘅照顧呀!安仔!我走啦。」曼喬拖住Wing,當面向我道謝。
 
「得啦,唔好咁婆媽啦,走咗唔會返嚟啦,同埋啲生意我一個人賺曬。」
 
「多謝你照顧曼喬咁耐。」人哋話靚仔多寸咀,但冇諗過呢個呀wing竟然係謙謙君子,冇半點囂張。
 
「唔好咁講。」
 
看著情敵帶走自己心愛嘅女人,我竟然冇衝上去打佢一拳,仲接受佢致謝,諗諗下,亦只能夠咁啦。待佢哋走遠,我即刻拎起電話,禁開曼喬WhatsApp,千言萬語嘅唔捨得輸入中,但偏偏send唔出,一字一句嘅關心,亦最終俾我del咗。算啦,唔好騷擾人啦。
 
原以為我呢個守護兵功成身退嘅時候,曼喬卻每一日都keep住WhatsApp我,以致我問佢唔駛掛住同wing S W E E T咩,佢話wing返工呀,佢好悶,一定一定要我陪!
 
呢種命令式嘅句子,令我竟然有種莫名其妙嘅sweet味道,呵呵就好似回到啱啱認識曼喬,佢都係有男朋友,但我哋無所不談,fried過打band。可能我天生就係做兵仔嘅人才。
 
 


我望住曼喬嘅WhatsApp,忽然感懷身世,原以為做一世倉務員,結果誤打誤撞搵到人生第二條路,人亦開始變得冇以前咁驚人,心胸亦廣闊咗。以前人前扮開心背後真感傷嘅日子已經遠離我,因為曼喬嘅陪伴令我終於明白乜嘢係開心,雖然佢返咗去呀Wing身邊。
 
「係呀?又要我陪呀?乜你呢個人妻咁花心咖,成日有仔就要其他仔陪。」終於輪到我戲弄返曼喬。
 
「我哋好似又返返去半年前啱啱識咁,原來半年時間咁快過去,但又好似經歷咗好多嘢咁。」
 
「係呀,我見證一個肥婆地獄式減肥瘋狂做gym又唔識嘢,結果半年都唔使減肥成功,真係好勵志!」
 
「你係咪鐘意咗我?」
 
「你係咪鐘意咗我?」又問呢啲問題,我梗係照字搬字再反彈啦。
 
「係呀,咁點嘛?」
 
「但我唔鐘意你呀,我大把女,對住你半年我已經厭曬啦。」


 
「你講大話,明明就鐘意我!曼喬笑吟吟地說。
 
「陣間呀wing見到我哋WhatsApp你就水洗唔清啦。」
 
「咁呀wing唔要我,你養唔養我先?」
 
「你忽然搬走,我錦繡花園一個人交成萬銀租呀,回水呀春卷你!我就嚟借貴利交租啦,仲養你!你個wing大把錢啦,養埋你再養埋英女王個孫女都夠啦。」
 
「唔理你啦,憎死你,我哋絕交啦!」
 
「我養你lor,一齊訓天橋,但一定要攬住訓。」
 
「都話你鐘意我攬你咖啦,死毒L。」
 
「冇呀。」
 
「你呀,唔好成日掛住俾家用,好好為自己未來打算下,家用俾少啲,自己儲多啲,唔好成日租屋啦,儲筆錢做首期上車啦。網上生意你可以繼續做,但你都可以搵下自己有興趣嘅工作,你之前唔係話鐘意煮嘢食嘅,去學師,學成之後都係一技之長呀。」
 
「得啦,我識諗咖啦,你都教咗我好多,得閒諗下點冧阿Wing,唔好擔心我啦。」
 
 
 
同曼喬傾完計,我獨自搵返以前同曼喬嘅錄音嚟聽,睇返我同佢嘅合照,睇返近半年我同佢遊玩香港時候嘅相。籍住呢啲歷史證據去幻想,曼喬仲同我一齊咖,呵呵。
 
當我見到曼喬 Fb同Ig有更新,例如同呀wing合照,我就會即刻cap圖cut咗呀wing,然後望住曼喬張圖,我一個人在甜蜜蜜,陶醉當中。