「高登情緣」「港產片Feel」有一種愛叫做純愛。: 第二十二章

KnockKnockKnock，我即刻跑上二樓敲個對情侶嘅門。
 
「Nick，Nicole，江湖救急！我女朋友返緊嚟，幫幫手租呢間房俾我一晚，就一晚，呢度1千蚊當我請你出去按摩又好食嘢都好，借間房間俾我。」
 
「嘩，咁大手筆呀！咁你哋會唔會喺度咩咩咖？」
 
「一定唔會！攬住訓咋，保證乾乾淨淨。」
 
「點解一定要呢間房？」
 


「因為我之前同佢就係住呢間房，幫幫手啦！」
 
「冇問題，我哋換衫出街啦，多謝你先wor安哥。」
 
佢兩個走咗之後，我簡單佈置返個房間，其實都冇乜野執，因為我都叫對情侶唔好郁間房嘅嘢，齋住就ok
 
ding dang！曼喬到左，曼喬一見到我就攬住我。
 
「點嘛，攬到我實一實做乜？」我諗住打破僵局，一直攬落去一齊做化石就唔好啦。
 


「我唔理呀，我要搬返嚟住，你同我趕走班友仔，呢度係屬於我同你嘅地方。我哋要同銀行借錢，俾首期，買屋。只有買屋先係我哋美好將來嘅基礎。個個月租成皮嘢真係唔抵呀。」曼喬廁抬高頭望住我。
 
我諗我係反應遲鈍，我唔明買屋同我哋美好將來有咩關係，我哋？即係點？容不得我思考，曼喬拉住我入屋。
 
 
 
之後我帶住曼喬入房，諗住呵佢訓覺，點知佢一個車輪打埋嚟令我始料不及，一抽一放嘅急喘呼吸聲，彼此心跳聲，口水與口水交擦嘅聲音，舌頭與舌頭打滑嘅聲音，都令我呢個茄輪初哥充滿好奇。
 
我閉上眼睛，將壓抑嘅眼淚收緊喺眼眶當中，我好努力咁帶住感情去吻，但係我只不過係一個替代品，個種酸痛喺心入面湧出去逼使眼淚喺眼皮底捐出嚟。當曼喬需要我個陣，佢腦海中係諗緊第二個男人，只不過係借我黎用；當曼喬唔需要我個陣，我腦海中係諗緊佢同第二個男人纏綿，只不過係我暗自神傷。
 


曼喬捉住我手掂佢對波，掃佢大髀，一個有經驗嘅女仔帶住一個男人入戲本來係好事，但係我冇辦法投入，我愛曼喬,但佢唔愛我，佢當我係好朋友，就算我好錫佢，但我點可以錫佢錫到上床呢?冇男女感情嘅x 交叉 zy，我接受唔到。
 
每日應該飲六杯水，應該禁煙禁酒禁嫖禁毒，發生性行為應該戴袋，初夜應該留俾老婆，愛情應該專一，做好事應該不望回報，做人應該腳踏實地，待人要真誠唔做作，人地幫過自己應該感恩…每個人都應該有自己一套原則，我唔可以因為愛一個人就放低原則。
 
今晚搞嘢，咁聽日?以後?開啟咗我性愛之路，唔係叫我之後去叫雞或者上網呃蝦條呀?唔得，係砌只砌老婆仔！相愛就大大力砌，唔愛我就唔會砌。
 
「sorry，我唔得。」我輕輕推開曼喬。
 
「你唔鐘意我?」曼喬欲繼續打茄輪，挨埋嚟但俾我拒絕。
 
「我哋係好朋友。」
 
「邊個要同你做好朋友呀？你唔鐘意我咩？」
 
一子錯滿盤皆落，我呢個世紀白癡，開始大暴走，講埋啲不合時宜嘅對白。我真係好抗拒個種被當替代品嘅感覺。


 
「可以，齋訓，friend」
 
「ok，咁俾我攬下你，其他嘢我唔想講。」
 
「好」
 
結果我幾乎成晚冇訓，攬住曼喬，就係臨時天光先訓落，點知醒返曼喬已經唔係我身邊。
 
而床嘅側邊檯，留住一封信。