我係死神，專門審判自殺嘅人(離魂記‧前傳): 9
「‧‧‧」阿敏望住我，再望番個位殘疾人士：「不過佢好似都唔領情咁嘅‧‧‧‧‧‧」
「因為佢承受緊，你最憎嘅嘢。」我淡淡地說。
阿敏又望一望我，之後反而更加深入咁望住坐輪椅嘅殘疾人士。
個位殘疾人士好快參觀完依間學校就離開，佢望住啲學生可以打鬥一片時嘅眼神，係充滿渴望帶有包含住苦澀。
阿敏一直跟一直跟，就好似從前咁，跟住喺啲自殺者背後。我唔明白當年救佢嘅男仔到底影響佢有幾大？可以軀使佢咁做。
或者有啲事情，要就快到死個刻，先至會明白。
個嗰坐輪椅嘅人去經過食店會望一望，不過都唔會入去食飯。
佢唔搭地鐵同巴士，反而揀單車徑嚟控制架輪椅行。
「哎吔小心啲啊仔！小心俾車撞啊！」單車徑路上一位年輕嘅阿媽拉住個幾十歲仔，因為個位坐輪椅嘅人兄咁啱經過佢哋隔離。
「媽咪，我都想要部啊‧‧‧」個仔望住坐輪椅個嗰人。
「傻仔！個啲俾跛嘅用嫁，吐口水再講過！」
「‧‧‧」
「喂，細路，飲番啲口水。」阿敏上前叫住個位細路，之後望向佢阿媽：「跛嘅好失禮你咩？無啦啦做要講人姐‧‧‧」
「你‧‧‧你痴線架‧‧‧」個阿媽有啲驚咁望住阿敏。
「你仲痴線，無啦啦個位先生就俾你咁講一次。」阿敏繼續講。
坐輪椅個嗰人似乎都留意到，就停咗架輪椅車，講：「小姐‧‧‧唔該你，太太唔好意思‧‧‧」之後，就繼續開動輪椅獨自上路。
阿敏呆一呆，就跟上前：「佢哋呢種人諗到咩就講咩，你唔洗太放喺心喎。」
「唔緊要‧‧‧好少事姐。」佢就好似習慣咗一樣。
「係呢，你去邊啊？我咁啱又係依條路返屋企。」阿敏嘅嫣然一笑好少男人可以免疫，呢個人除外。
「我都係，返屋企。」佢答。
「做咩唔答地鐵巴士？方便啲喎。」
「廢事煩到人‧‧‧。」
喺佢講出依句嘅同時，阿敏心領神會咗一下，好似明白咗啲咩嘢，就即刻向前奔跑，再次返嚟個陣已經買咗一個漢堡包返嚟。
「食唔食啊？」阿敏撥一撥因為跑步搞到濕熱嘅頭髮，將個漢堡包俾輪椅人。
「‧‧‧」輪椅人不明所以。
「其實呢‧‧‧由你喺學校開始我就見到你好似有啲餓，不過唔敢叫嘢食‧‧‧‧‧‧‧‧所以我自把自為咁跑咗去前面買個包俾你，你唔會厭棄嘛？」阿敏純真嘅笑容，可能感染到對方。
令到佢，真係收下咗個漢堡包。
「多謝你‧‧‧」
因為運動而臉紅紅嘅阿敏點頭：「唔洗。」而佢肺部都喘得幾勁，不過冇喘出聲咁解。
喺路上，輪椅人同阿敏就一同而行，好似無言中嘅一種共識。
「係呢，未知你叫咩名？」阿敏低頭望住佢。
「‧‧‧詹士。」
「哈‧‧‧咁型嘅，叫我阿敏啊。」佢輕輕拍一拍詹士膊頭。
「其實‧‧‧你想點？」佢終於停低咗部輪椅，問阿敏。
「‧‧‧」
「唔好再扮嘢好唔好？」佢講完之後，就繼續開輪椅走。
剛才收咗阿敏嘅漢堡包，佢一手舉起就大力擲過去垃圾桶到，浪費咗阿敏一番心機。
「砰！」個包佢擲唔入垃圾桶裡面，只係打中咗外邊嘅蓋，睇嚟隻手都係殘疾。
而阿敏就愣住咗喺原地，完全唔識反應。
「睇嚟，你完全唔識開解即將自殺者。」我走過去同佢講。
「我‧‧‧已經盡力，想識下佢。」阿敏答。
「識佢？定係俾假希望佢？」我反問。
「我真係想幫佢‧‧‧‧‧‧」
「因為你覺得佢好可憐？定係覺得佢好慘？」我望住阿敏，講：「你依家關心佢，咁你真係打消咗佢自殺念頭之後仲會唔會理佢？會唔會每星期至少約佢一次出嚟傾下計、見下面咁？世界可悲嘅人好多，你又幫得幾多。」
「咁我‧‧‧眼前見到嘅‧‧‧‧‧‧只係想幫得幾多得幾多姐‧‧‧」阿敏好似有啲洩氣。
咁又係，苦心買番嚟嘅包，以為人哋接收咗佢一番好意，點知下一秒係無情地擲佢街邊垃圾桶到。
「幫。你想幫就幫？人哋唔想你幫。」我說。
「死神‧‧‧」
「都話咗你阻止唔到佢自殺。」我淡然地說。
「我覺得如果放棄做一個人‧‧‧係一件好蠢嘅事。」阿敏有心無力咁摸一摸赤熱嘅額頭：「傷心嘅仲會係自己屋企人。」
「死亡唔好？返正所有人遲早都會死，佢哋只不過快啲咁解。」
「死神啊！我真係好想救到一個人‧‧‧真係好想好想‧‧‧‧‧‧」
「你想嘅就成真，世界會大亂。」
「你不如諗下，當初救你個嗰男仔，佢點樣拯救你。」
「佢‧‧‧唔係單純捐心嘅拯救‧‧‧」
我望住阿敏。
「而係‧‧‧徹底咁拯救咗我個心。」
比生理上的支援，有些人更需要內心的快慰。
個日之後，阿敏心理陰影面積就好似擴大咗咁，一諗到自己滿心歡喜咁俾個漢堡人，點知人哋一手就擲到去垃圾桶到。
我睇見第一眼、再望望阿敏個可憐樣又真係會即刻想笑，但再睇真啲，成件事又真係會幾令人心碎。
阿敏返到屋企就伏喺張床上，用張被蓋過自己成個人：「哎～唉～」
「覺得好羞家？」我望住窗外嘅夜幕景色，月亮就好似阿敏咁收埋自己喺黑雲之後。
「係啊‧‧‧不過更重要嘅係‧‧‧‧‧‧」阿敏掀開張被，一副充滿能量嘅樣：「我已經諗到點樣接觸詹士！」
同剛才頹住咁返屋企‧‧‧‧‧‧
真係幾大分別下。
「沖涼先！」身材修長嘅阿敏伸一伸懶腰，就出咗去。
而我獨自喺間房低頭望住張被：「唔通‧‧‧人類伏喺入面焗自己一陣就會開心番，拎番啲正能量？」講完，我就掀起張被蓋住自己成個人，試下到底係咪蘊藏咗乜嘢奧秘。
一秒、
兩秒、
三秒，
我果斷拎走張被，因為根本乜都冇變過。
阿敏沖完涼之後就同屋企人喺廳食飯，食食下飯，佢阿媽就突然問佢：
「敏‧‧‧點解最近仲係聽到你喊死神死神？你間房根本一個人都冇。」佢阿媽好似好在意依件事咁：「你到底同緊邊個講嘢？」
「都‧‧‧‧‧‧話做緊話劇囉。」阿敏答。
「但係我聽你有問有答咁喎，仲有你喺學校都唔係話劇社。」
「唉‧‧‧阿媽，你理得我姐？總之我唔係信咗邪教啦～～」阿敏講到好灰心。
「我只係‧‧‧只係！唔想個女出到街‧‧‧俾人笑信咗撒旦邪教個啲啊。」佢阿媽望實佢，眼神睇落真係好在意。
「得啦，我知爺爺婆婆都係基督徒，你自細都浸聖經書大嘅‧‧‧咁又點啊？人有宗教自由嫁。」阿敏可能今日心情都唔太好，所以反駁。
「你知就好啦？好信唔信，去信埋啲邪教，害人嫁！」
「害人‧‧‧？你見過死神未？」阿敏同阿媽互相直視，各不相讓：「你又知死神一定係衰人？」
「總‧‧‧總之一定係唔好嘅嘢！」
「因為佢拎走你條命，佢就唔好？我奉行天職渣，好過你偽善呀！」阿敏望實佢阿媽，個種憎恨嘅眼神就好似回憶起啲乜，但好快就從眼波中逝去。
唔易察覺。
「你兩個嘈乜啊～？」佢老豆喺間房出嚟，用住和氣嘅聲線。
「個女啊‧‧‧冇睇一陣，依家就好似入咗邪教咁！」阿敏母親說。
「係啊，我係入咗啊！吹呀。」阿敏都幾硬淨：「仲唔快啲掉低我？叫你個主保護你嘛！」
「你個衰女真係‧‧‧‧‧‧！」
「我唔同啦，我有死神保護。」阿敏抱住雙手，翹腿咁坐。
「老公你睇下佢點對我‧‧‧‧‧‧」阿敏母親好勞氣咁指住。
「你兩母女一人少句，我就係無神論者嚟嘅‧‧‧有咩大家平心靜氣講ok？」阿敏父親安慰佢兩個。
「我就真係唔信世界上有死神啊！」阿敏母親用力拍一拍檯。
You know what？
我向來對待每一位世人都係平等。
不過有人喺我面前質疑我嘅存在時，多少我都會覺得佢哋有啲唔尊敬‧‧‧
所以，我對佢哋廳上個嗰鐘，施咗少少魔法落去。
「咔‧‧‧咔‧‧‧‧‧‧咔咔‧‧‧‧‧‧咔‧‧‧」掛喺牆上嘅大鐘，時針、分針、秒針都扭向緊同一個數字到──「６」。
望到阿敏父母都目瞪口呆‧‧‧‧‧‧
阿敏阿媽有啲口震震：「一‧‧‧一定係咁啱姐‧‧‧」講完，佢就撳一撳太陽穴好似有啲頭暈。
「轟──！」窗外突然行雷，落咗場驟雨。
「老‧‧‧老婆你返房休息先。」阿敏父親扶住佢去房，並交代阿敏：「阿敏，你洗好哂啲碗佢。」
剛才嘅吵鬧結束，只係得番雷雨聲。
「死神，神嚟嘅一筆啊。」阿敏贏咗阿媽，但係一啲開心都冇：「識得配合我。」
「只係佢質疑我存在，咁啱又俾我聽見，我先出手。」我整一整理頸領。
「聽日我去搵詹士仲嚟得切嘛？」
「當然得。」我望一下手腕上嘅錶。
第二日，可能係炎熱嘅夏季關係，雨仲未停落嚟，繼續滋潤依一片大地。而阿敏好早就沖涼刷牙，然後準時七點半落樓下茶餐廳食早餐。
基本上，佢每一個朝早都係咁過。
「要唔要食啲通粉？」阿敏將隻匙放到我面前。
我視而不見咁望住佢。
之後佢又徒手拎起塊多士拎咬：「琴晚我諗咗好耐‧‧‧‧‧‧我知道點解接近詹士。」
「願聞其詳。」
「你講咗佢位置我知先。」
「世上冇免費午費。」我答。
「‧‧‧唔」阿敏點點頭，諗咗諗後笑住咁答我：「但係有免費早餐喎！」
我想啪手指瞬移個刻已經太遲，佢竟然好似預知我會用右手啪手指咁，一隻手捉住我右掌，另一隻則拎住自己啱啱食到一半嘅多士塞入我嘴裡面‧‧‧‧‧‧！
強‧‧‧
強姦‧‧‧‧‧‧！！！
「哈！留意你好耐啦死神，次次瞬間轉移都要先用右手手指啪一下‧‧‧！係咪你俾我睇穿咗呢？」
「‧‧‧」
「～快啲，講我知啦。」阿敏見到我受苦嘅樣好似笑得幾開心。
真係‧‧‧好‧‧‧‧‧‧好難食‧‧‧
「死神啊‧‧‧」阿敏突然唔再捉住我隻手同塞我食多士，可能知道對我手段太硬係冇用。
「咳‧‧‧以後有嘢慢慢講。」我說。
「唔。」阿敏點頭，伸直腰好乖咁坐喺到，雙眼望住我。
「聲明一下先：我係因為想知逆天嘅生命，去救另一位順天嘅生命會發生咩事，唔係出於我本意想幫你。」
「得啦得啦～總之唔關你事，OKOK。」阿敏說。
「喺觀塘海濱。」
「橫風橫雨‧‧‧佢去海濱做乜鬼？」阿敏聚精會神咁諗一諗，就拎起自己今日帶嚟個塊滑板離開茶餐廳：「死神，我哋走啦。」
「你慢慢。」我啪一下手指，就到觀塘海濱。
呢種天沉沉、雨大大嘅日子，的確唔會有人咁好閒情出嚟海旁望海，除咗一個人。
佢披著住一件大雨衣，坐住輪椅，任由雨水打落自己身上咁望海。比較奇怪嘅係，佢特登拉高條褲，等冷冷嘅雨水打落佢殘疾嘅雙腳上，另一邊就開始控制輪椅車移動，十分奇怪。
而我就企喺一旁，咁樣望咗佢幾一、兩個鐘。
阿敏，亦都趕到。
望到此情此景，阿敏頓咗一下，然後就踩住滑板上前跟喺詹士身後，一邊就觀察住佢。
阿敏想點？
久而久之，詹士就發現有人跟住佢尾，就停咗落嚟，然後好似想將輪椅車開得更快咁，擺脫身後嘅阿敏。
阿敏就踩得越快，追住詹士，最終兩個人就玩咗1km左右嘅鬥快比賽，阿敏亦都快過去。
詹士終於停低落嚟，問：「點解要追住我‧‧‧‧‧‧」
「我贏咗。」阿敏回眸，對佢露出勝利者嘅微笑。
詹士呆咗呆，幾秒後苦笑起嚟：「從來啲人永遠只會同我並肩或者喺我身後‧‧‧超越我嘅，你係第一個。」
「因為我當你係正常人。」阿敏收起滑板，輕鬆咁嘆咗口氣：「呼，好耐未試過咁涼爽。」
「嗯。」詹士望住自己對腳。
「點解要俾啲雨水打落隻腳上？」阿敏借由對話，慢慢行近詹士。
「因為咁樣‧‧‧隻腳就好似有凍凍地嘅感覺。」詹士答。
原來係咁，真係估佢唔到。
咁識自我安慰。
「今日個天‧‧‧真係好沉。」阿敏望住海旁出面嘅大海。
詹士望住陰沉嘅天空，冇回答。
「不過咁做好，條街少人啲。」阿敏望住自己腳邊塊滑板，說：「玩滑板都唔洗左閃右避。」
依個就係你接觸詹士嘅方法？阿敏。
「認同‧‧‧。」詹士點頭。
「要唔要再鬥？」阿敏拎起塊滑板，笑對詹士。
「啍‧‧‧」詹士低沉一笑，點頭。
兩個人又再用各自嘅代步工具嚟比賽。
「嗄‧‧‧嗄‧‧‧‧‧‧」阿敏陪詹士踩咗120分鐘，終於覺得攰：「喂‧‧‧唔鬥啦，好攰。」
詹士喺阿敏休息個陣突然講：「琴日‧‧‧對唔住。」
「唔洗，我都知‧‧‧對住偽善嘅人會好燥。」阿敏坐喺滑板上，望海休息。
「嗯‧‧‧」
「接住。」阿敏拋咗包陽光檸檬茶俾詹士。
詹士反應過嚟想立即伸手接住，不過接唔住甩手跌咗落地，唯有彎腰執番。
隻手果然‧‧‧
「‧‧‧你唔驚發燒？話哂落緊雨‧‧‧我就話有雨衣‧‧‧」詹士問。
「風雨總會停嘅。」阿敏咬住飲管，答：「我就唔信佢落足一世。」
「踩滑板嘅感覺係點？」詹士問。
「呃‧‧‧型囉，講真，我追求快就去踩單車啦，真係得個型字，哈哈哈。」阿敏自己講完都笑。
「‧‧‧」
「嫉妒？」阿敏問。
「少少‧‧‧」詹士苦澀咁彎起嘴角。
「你試下坐我塊滑板囉，我坐你部輪椅。」
「‧‧‧」詹士好似意料不到。
「冇人同你咁提出過呢？」
如是者，阿敏真係同佢換咗「坐騎」。佢好小心咁抱起詹士坐到滑板上，自己則坐喺輪椅，成件事都好痴線。
「又真係好似幾型‧‧‧」詹士望一望自己。
「嫁電動輪椅都好嘆啊。」阿敏開住佢亂咁移動。
「你哋有腳可以行可以走‧‧‧我有乜可以俾你哋嫉妒。」詹士有啲頹氣。
阿敏好快就背番佢到輪椅上，望住詹士：「係唔係經常都好多人關心你？」
「關心‧‧‧？佢哋只不過懶係善心咁渣？」可以睇得出，詹士係一個憤世嫉俗嘅人：「成日走過嚟想幫個樣、幫呢樣，啲事咪又係雞毛蒜皮，所謂識到嘅朋友同你出街一、兩次就已經覺得煩，已經唔想搵你啦。」
「咩意思‧‧‧」
詹士苦笑：「我坐輪椅，無論想入鋪頭食餐飯、入戲院睇套戲、搭巴士同地鐵都要麻煩一堆職員，佢哋又要俾其他人望住哂，依種目光佢哋唔覺得難受‧‧‧我自己都覺得難受。」
「咁你雙腳有事，都係迫於無奈‧‧‧」
「迫於無奈？係啊，個天想迫我死呀──！」詹士對住個海大叫。
「你又唔好諗到咁絕‧‧‧」阿敏繼續說：「世上總有啲嘢‧‧‧會令你有動力架嘛？」
「有‧‧‧係有，我鐘意嘅一個女仔‧‧‧不過都係因為我依雙無用嘅腳‧‧‧‧‧‧！都係佢累事‧‧‧！」詹士用力敲打隻腳，十分憎恨自己、不斷自殘打自己雙腳：「我只不過係想做個正常人‧‧‧！」
「詹士，冷靜啲啦，你要打就打我。」阿敏捉佢隻手。
詹士望住阿敏，慢慢咗道消氣：「我好白痴啊可？哈‧‧‧居然憎自己喎‧‧‧‧‧‧」
「我明‧‧‧我明你依種感受啊。」
「你明？你明啲咩～？」詹士又苦笑，雙眼已經失去咗生存嘅意志：「好多人都講明我感受，得個講。」
「我明‧‧‧‧‧‧係因為我細個都同你一樣，身體有事‧‧‧」阿敏望實詹士，聚精會神咁望住佢深處靈魂：「而我個陣莫講朋友，連親人對我嘅‧‧‧‧‧‧都只係偽善。」
「‧‧‧」詹士冇答。
「個陣我阿媽‧‧‧其實好想我死。」阿敏捉住詹士隻手：「不過好彩有個人，走入我嘅世界，拯救咗我。」
詹士沉默咗數十秒之後，問：「‧‧‧個陣你咩事」
「個陣‧‧‧細個俾車撞，搞到受重傷有醫院，個心就快衰竭，我好悶咁喺醫院過每一日，直到佢出現。」
「我同你唔同‧‧‧‧‧‧」詹士又再咬牙望住自己對腳。
「你試下唔好淨係識低頭望自己對腳，」阿敏托高佢下巴，逼詹士望住自己：「望下人對眼。」
「好似我啲咁嘅垃圾‧‧‧‧‧‧望乜姐‧‧‧！我依種人就係應該死咗去‧‧‧冇貢獻，最多咪係拎殘疾人士嘅身份去接受幫助！講咁多做乜‧‧‧」詹士握實拳頭。
「因為我見到你對眼，同曾經嘅我一樣。」阿敏繼續凝視住詹士：「所以我想‧‧‧救得一個，得一個。」
明明係我講俾你聽依個男人即將會自殺‧‧‧‧‧‧
「喺我參觀學校個日‧‧‧你留意到我？」詹士頹然地問。
「唔。」阿敏點頭，說：「我知道，你有自殺嘅念頭。」
其實，詹士個樣係唔差，以人間審美觀嚟講１０分都有７.５分？或者，佢唔係殘疾，人生可能會愉快得多。
但學上帝講，可能一切，都係神嘅考驗‧‧‧？
嘖，佢推卸責任嘅萬能答案。
「‧‧‧」詹士望實阿敏。
「所以，請你打消依個念頭。」一直蹲低嘅阿敏，企喺身：「因為我哋能夠出生都係幸運兒，所以唔洗理其他人點諗‧‧‧‧‧‧我哋喺寵幸我哋嘅人面前，自自然然就會變得有價值。」
詹士幾秒後，居然露出久違嘅笑容：「你講嘢仲長過啲社工‧‧‧‧‧‧」
「最好就感染到你。」阿敏笑一笑。
自個剎那開始，我好似感覺生死律有著微小嘅變化。
唔通‧‧‧
佢真係改變到一個順天本應要自殺嘅人，改變心意？
我望一望錶，詹士原定死亡嘅日子係一個星期之後，我就睇下佢到底係咪真係有咁嘅能力。
如果係嘅話‧‧‧
咁阿敏本身嘅存在，可能已經係一個錯誤。
阿敏搭緊地鐵返屋企個陣，我特意拍手俾啲掌聲佢。
「佩服。」
「死神？哈‧‧‧‧‧‧係咪我成功咗啊？」戴住耳機嘅阿敏見到我出現喺地鐵，感到有啲意外。
因為一般我都唔會陪佢搭地鐵，而係直接瞬移過去佢即將會去嘅目的地。
「Maybe？」我抱住雙手，背靠車門：「睇嚟你同佢做咗朋友。」
「係啊，」阿敏拎起部手機俾我睇：「仲加埋Whatapps。」
「你覺得自己係幫緊佢？」
「係，我係咁覺得。」阿敏答。
「咁我拭目以待。」
夜晚返到去，阿敏阿媽無煮到飯，睇嚟仲為緊琴日件事而嬲，連佢老豆聽到阿敏返嚟都要即刻出嚟搵佢傾下。
「阿敏‧‧‧你阿媽好嬲。」佢父親相對比較溫文。
「我知‧‧‧」阿敏好似唔當一回事，繼續做自己嘢：「所以？」
「點都好，邊個錯邊個啱‧‧‧都認下衰女入去同阿媽講聲對唔住先，好冇？」佢父親想勸佢。
「老豆，我都係女人，我都好小氣嫁。」
「女啊，講一句姐？老豆今個星期俾多５００零用錢你囉好冇？」
「其實呢‧‧‧我都唔知你點解會同到佢結婚，仲生埋我。」阿敏拍住佢父親膊頭，說：「你好勁啊老豆，你點捱到？」
「唉‧‧‧女，坐低。」佢老豆雙手撳低阿敏膊頭，逼佢坐落梳化上：「你阿媽為咗我，都犧牲過好多嘢。」
「所以呢？」
我企喺一邊一直聽住佢兩父女講話，回想起一直以嚟阿敏都幾乎唔會全日留喺屋企，除咗可有可無嘅對答，日常同阿媽傾計都唔會超過十句，又或者‧‧‧兩母女根本冇面對面互相開懷笑過一次。
加上阿敏今朝同詹士講過，佢阿媽細個嗰陣已經想佢死？
睇落，似乎真係另有內情。
阿敏同佢老豆喺梳化上面爭論咗大概二十分鐘之後，始終都係勸唔掂阿敏。
「你阿媽都係擔心你姐‧‧‧阿敏。」佢父親好似左右做人難：「知你青春期會反叛少少信乜嘢撒旦教‧‧‧但你阿媽都係為你好。」
「擔心我？假嫁喎。」
「你知你阿媽佢出身喺基督家庭‧‧‧爺爺同婆婆都對佢好嚴格，所以佢先接受唔到你信呢啲嘢姐，爸爸我就唔介意嘅‧‧‧‧‧‧但你都要體諒下阿媽嘛？」
「佢要消氣自然會消，我要消氣都自然會消。」阿敏抱住雙手，絕不退讓。
「你兩母女好勝心都係咁勁‧‧‧‧‧‧」佢老豆十分之無奈：「阿敏，我同你講啲嘢好冇？」
「有嘢講，有屁放。」
「你知唔知你媽咪生你個陣，其實背負住好大壓力？」
「唔知～」
「因為啊‧‧‧唉，本來都唔想講呢啲羞事‧‧‧不過為咗等你明白，都要講清楚。」阿敏老豆說：「我同你媽媽生你個陣，其實係未婚懷孕。」
「‧‧‧」阿敏愣咗幾秒：「關‧‧‧關我鬼事！你哋自己唔用套，賴我啊？」
「聽埋我講先～」佢老豆就好似憶起當年咁講：「個陣我係個廿幾歲嘅o靚仔未識你阿媽，因為朋友帶路去教會可以識到好純好靚嘅女仔‧‧‧所以，無神論嘅我就去咗教會一次。」
「唉‧‧‧老豆，你咁衰嫁？」阿敏卑視咁望咗自己老豆一眼。
「之後呢～我就喺個到識咗你阿媽，我個陣一入教堂望見唱緊聖詩嘅佢‧‧‧簡直好似見到女神咁‧‧‧‧‧‧我認定咗，我一定要依個女仔做我女朋友！」
「老豆～其實未婚懷孕好普遍姐？」
「傻女‧‧‧個陣八、九十年代，民智未開，傳統觀念重，加上你媽咪個邊全家都係基督教徒，爺爺仲係牧師‧‧‧‧‧‧所以當時嚟講係好大件事。」
「咁之後呢～」
「之後我就一直引佢注意，可能佢見掛乖嘅男仔？你阿媽佢對我好似特別留意咁，哈哈‧‧‧我哋之後仲偷偷哋拍拖，展開咗一場秘密嘅戀愛。」阿敏老豆嘅眼神完全係回想緊當年。
「嘩～恭喜哂喎。」阿敏hea住講。
「仲記得，我哋每一晚都會偷偷哋喺教堂禮堂相聚，播住一首叫《情人的眼淚》嘅歌，一直跳舞一直望住彼此‧‧‧‧‧‧可惜好景不常，你阿媽教堂入面嘅同年朋友，佢發現咗你阿媽有啲唔尋常，最最尋尋之下‧‧‧發現咗我哋兩個偷偷哋拍拖仲夜晚喺教堂相見。」
「哇‧‧‧咁你咪‧‧‧‧‧」
「我就冇事‧‧‧你阿媽就慘啦，俾爺爺婆婆訓話不得只，仲唔俾佢出街，就算返到教會都日日俾朋輩教徒暗裡卑視排斥，每日都以淚洗臉啊‧‧‧‧‧‧」
「Sosad～」
「個陣我覺得身為男人應該做啲咩，所以就跑咗去佢屋企樓下，個陣全香港大多數人都住緊唐樓，我就喺樓下大喊：『阿悅，雖然我冇咩錢，跟我一齊可能會日日捱苦！但我會盡我最大能力，去令你依一世都開開心心！』就係咁，你阿媽從窗口捉住水管爬落嚟，最後我接住佢，就一齊私奔去。」
「大團圓結局～」阿敏好假咁拍一拍手。
「之後嘅日子，你阿媽去咗我屋企住，地方窄小就情不自禁發生個啲事囉～」阿敏父親安懷一笑：「不過都好，後尾你老豆我好生性，為咗你阿媽而努力拚搏，最後都叫創業成功。而你媽媽亦都受過高等教育，都算可以教下中、小學書。」
「真係蛤蟆配天鹅。」
「可以咁講啦哈哈哈，咁你知啦？我唔可以令你媽媽唔開心，因為佢為咗我，已經拋低咗家人、朋友、仲有教會一切嘅嘢，佢當年背負幾大壓力，得佢一個知。」
「咁點解我大個咗都見得番婆婆？」
「過咗咁多年，生咗你之後幾十年大家先話開始關係破冰，你媽媽帶住你主動搵番婆婆公公，可惜個陣公公已經離開咗‧‧‧‧‧‧呢個一直係你媽媽嘅遺憾。」
「唔～」阿敏聽完之後沉思咗幾秒，就起身走到走廊好隨便咁拋低句：「對唔住～」就行返入房。
阿敏父母，真係一段可歌可泣嘅愛情故事。
就喺半夜，夜蘭人靜，阿敏都熟睡‧‧‧我以為人間嘅一日又就咁完結之際‧‧‧‧‧‧我莫名其妙咁聽到阿敏佢阿媽半夜開門嘅聲音，佢阿媽行出咗廳。
我當然亦都跟住出去。
佢母親出到廳之後望一望周圍，就開咗擺放喺櫃上嘅老舊CD機，入面正正播放住《情人的眼淚》依一首歌，不過可能係CD碟太舊嘅關係‧‧‧令到啲音質有啲「咔‧‧‧沙‧‧‧」嘅聲音。
而佢母親就係咁坐喺梳化上，聚精會神望住地板咁聽依首歌‧‧‧連燈都唔洗開，畫面好詭異。
直到首歌播完，阿敏母親佢閂咗CD機，然後慢慢行返入走廊，去到阿敏間房前面時停低，佢輕輕咁打開道門，從門縫之中偷偷直視住訓得正冧嘅阿敏‧‧‧‧‧‧
最終，幾十秒過後，佢先行返入房繼續訓覺。
望住依一切嘅我，眉頭一皺‧‧‧
發現事情並不單純。
晨光一起。
阿敏如常地伸個大懶腰就起床，睇嚟訓得好飽滿。不過今日佢冇打算出街食早餐，因為一出房門，佢母親已經一早準備好早餐，仲用平淡嘅語氣叫阿敏過嚟一齊食。
同琴晚，完全係兩個人。
有吐司、有炒蛋、有煎香腸、有蕃茄、有焗豆、有牛奶，阿敏母親睇落完全同琴日夜媽媽聽住《情人的眼淚》嘅佢唔同。
「過嚟一齊食啊‧‧‧阿敏。」
阿敏就算點不肖都好，都知對方消咗氣，冇理由繼續食住個勢咁不留情臉，於是就行過去講咗句早晨，就兩母女一齊食早餐。佢父親起埋身之後見到依個畫面，都覺得恩惠，就充滿番能量咁返工去。
「死神，今日天氣幾好。」返入房嘅阿敏，走到窗前仰望住外面嘅藍天白雲。
「同你心情一樣？」企喺佢身後嘅我維持住二十四小時抱手姿勢。
「係呱？」阿敏望住遙遙嘅天空，好似見到某人而傻傻一笑：「我覺得自己開始見到佢嘅影子‧‧‧‧‧‧」
「‧‧‧」
「詹士呢，我同佢傾傾下音樂，問佢聽咩歌，之後佢推薦啲歌俾佢聽。」阿敏食指掂住下鄂諗一諗，繼續講：「然後我又叫佢學結他，就算雙腳郁唔到啊，雙手靈活又彈得一手好曲，總有人欣賞嘅～」
「睇嚟傾得唔錯。」我溫和地笑：「喺手機。」
「人困境個陣，聽啲正能量嘅歌真係有用。」阿敏亦都微微一笑，陪我喺佢間房望住窗外面嘅天空：「心境都會變。」
「‧‧‧」
「死神，介紹你聽啊──《幸運兒》。」
依一日咁好嘅天氣，估唔到阿敏會選擇留喺屋企休息。
所以我就選擇咗去睇詹士到底做緊咩，結果‧‧‧‧‧‧完全出乎我意料之外。
佢喺某間商場嘅柏斯琴行出面，望咗玻璃櫃嘅結他一陣，就立即俾錢買咗枝最平嘅木結他。
同佢原本自殺之前會做嘅事完全唔同。我立即上天界問命運女神借咗本「命運冊」一睇，先發現詹士佢嘅命運完全喺一日之內改變‧‧‧‧‧‧
由原本將所有積蓄飲酒，到變拎所有錢買結他。佢好不容易咁帶住結他返到屋企，然後打開枝結他深深咁聞一聞佢陣木味。
我自己身手上本「生死冊」之中，死亡記錄上面詹士佢個名亦都越嚟越淺色‧‧‧
一切，正正係阿敏見完佢個一日。
「唔‧‧‧」詹士點點頭，然後就上網睇彈結他教學。
同應有嘅劇情，完全唔同。
莫非‧‧‧阿敏真係改變咗依個本應順天自殺嘅人？
就喺我思考緊期間，無法被世人看見嘅「裡空間」即係我身處嘅位置，只係一般人類見唔到嘅空間，係只有神與神之間見到對方嘅空間。一陣強烈嘅幻光綻出，一頭金髮、戴住眼鏡，著住普通女性白領衣著嘅命運女神出現到我面前。
「死神，還返般「命運冊」嚟啦～睇夠喇～？」原來係命運女神。
「俾返你。」我將本記錄冊俾返佢。
「又會咁突然搵我借本嘢嚟睇～」命運女神望一望周圍嘅環境。
「嗯，調查緊啲事。」
「居然會親自上嚟人間查事，好緊要～？」佢扮到唔經意咁問起。
「少事。」我答。
「Ya！！！！我識彈C chord啦！！！」學緊彈結他嘅詹士突然大叫。
「咦‧‧‧」命運女神有啲疑惑，行過去詹士隔離：「依條友‧‧‧‧‧‧」
之後，佢轉頭用疑慮嘅眼神望住我。
「如你所見。」我說。
「點解會咁？」
「自己查。」
「‧‧‧」命運女神表情有啲認真咁望住我：「你知道「自然律」被破壞會有咩下場？逆天嘅話，世界好可能會大亂，成個自然系統會崩潰。根據蝴蝶效應，事情只會越發越大，未完全影響到之前，早啲解決。」
「‧‧‧？」
「死神，幾日之後攞佢命。」命運女神望住我：「依個先係佢原本應有嘅命運。」
「我有分數。」眼前依個女人真係煩。
「係咁就好。」佢撥一撥自己長長嘅金髮，說：「喺我姐妹未發現之前好完成，佢兩個冇我咁心軟，做嘢好認真。」
「快啲返去。」我不屑佢一眼。
「多謝你關心。」佢微微一笑，瞬移離開返到天界。
‧‧‧叫你快啲返去只係因為你真係好樣衰。
望住眼前嘅詹士，我已經有咗答案。
就係逆天嘅阿敏，的確係可以改變順天之人嘅命運。
就咁睇，似乎只係好少事，只係關於一個人嘅生死。
但係長遠嚟講，阿敏喺人間越生活得落，佢接觸嘅人就越多，咁不知不覺間俾佢逆天改命嘅人亦會越多‧‧‧‧‧‧到時就真係一發不可收拾。
根源上，阿敏係有問題。
只不過，其實問題來源係喺當年救阿敏個一嗰人身上。
佢嘅存在‧‧‧
到底係啲乜？點解會令到阿敏條命變成逆天。
返去阿敏屋企個陣，大概已經黃昏，對我嚟講，人類嘅一日真係好快，但地獄嚟講可能又唔知已經過咗幾多年。
「諸神的黃昏‧‧‧‧‧‧」我望住窗外嘅黃昏。
「死神，」阿敏突然從後拍拍我膊頭，俾部手機我睇：「你睇！詹士佢彈咗結仔俾我睇啊！」
出乎意料‧‧‧詹士只係學玩咗一日，已經可以彈到簡單嘅生日歌。
「佢真係聽你講彈結他。」
「其實我冇啊，我只係講咗句：『彈結他的男生特別帥』佢就買咗囉。」
「咁拎鐮刀嘅死神？」我退後一步，憑空召喚把鐮刀指向阿敏。
或者我直接刪除身位逆天根源嘅阿敏？就唔洗大費周章、時間去周圍調查個啲事情，以防「自然律」被破壞‧‧‧
「特別恐怖‧‧‧‧‧‧」阿敏都俾我舉動嚇一嚇。
我凝望住佢，眼神之間有一絲微妙嘅波光掠過‧‧‧‧‧‧
最後，我收番把鐮刀。
我抱番雙手、雙眼合上，背靠牆壁：「我都覺得別恐怖。」而且不附合我處事原則。