我係死神，專門審判自殺嘅人(離魂記‧前傳): 11
「啊‧‧‧詹士約咗我，問下阿媽今晚幾點走先～」阿敏走過去佢阿媽到，問：「媽，今晚個教會飯聚一定要去？」
「係啊，你當順你媽媽一次啦。」佢老豆拍拍阿敏膊頭。
「一定要。」佢阿媽睇落似嚴母：「姨姨叔叔佢哋都未見過你，佢係你爺爺以前教會啲朋友，大家好似一家人咁。」
「唉～明明唔關我事，死都要迫埋我去。」阿敏嘆咗聲。
另一邊，我用通天眼觀察住詹士，只發覺佢正喺一條大街上跑步，好似越跑越開心。
不過佢嘅心情，只會隨住時間而變得沉重。
出發去教會個陣，阿敏喺搭巴士嘅路程上不禁一問：
「其實點解阿媽仲要返去教會見啲教友‧‧‧‧‧‧」阿敏望住我：「聽爸爸講‧‧‧當年佢哋都好似冇挺身而出去坦護佢。」
「人，就係咁奇怪。」我望住窗外嘅眾生。
「或者‧‧‧佢根本就唔想離開佢哋？」阿敏托住嘴角，深入思考：「阿媽佢‧‧‧‧‧‧依十幾年嚟都好似從來冇朋友咁。」
「佢唯一有嘅，就係你哋。」我說。
「嗯‧‧‧」
「唯一有嘅，就係你。」
「咁你要咁講‧‧‧」阿敏望住巴士外嘅毛毛雨：「都係嘅。」
落車之後，佢哋一家行入教堂裡面，我因為係死神，唔方便行入教堂，所以只企喺外面守侯。
過咗一陣，就見到一堆人有笑有講咁行出嚟，正正係阿敏一家、上次見到兩個位阿嬸信徒、幾個成年人，仲有幾個同阿敏一樣年齡嘅少年。
相較於其他女人，阿敏母親則笑得比較內斂，就算係信教，邊個比較有修養都一目了然。
而阿敏父親則同其餘成年男性傾計，大家有講有笑，比較正常。
最後阿敏個邊，三個一樣讀緊中學大嘅男仔喺佢隔離，不斷同佢傾計，阿敏只得無奈咁逐一回答。
不過識佢都有一段日子，佢嘅笑容一睇就知係扮出嚟。
但係‧‧‧
佢步出教堂個一刻，晨光就彷彿為佢而誕生一樣。
光與影相互吞噬，令人難以直視。
儘管笑容有幾假‧‧‧
都因為佢內心嘅光芒，令身邊嘅旁人感到溫暖可以依賴。
有住令人難以抗拒嘅魅力，同時能嵌到對方心窩。
「你叫‧‧‧‧‧‧偉敏？個名好好聽啊，我叫Ricko！喺英國讀書，都有喺個邊番教會。」其中一個頭髮偏啡，留有一大片前陰：「見阿媽喺香港都有返囉，放假咪嚟陪下佢囉。」
「喔‧‧‧孝順仔。」阿敏好生硬咁對佢點點頭。
「我呢‧‧‧‧‧‧叫Marco！有喺網絡上寫過書嫁，出埋書添，你鐘唔鐘意睇小說嫁？」另一個打扮文青嘅青年答。
「認真呢？咁有文彩。」阿敏對住佢笑一笑。
「Hi，阿敏，我叫嘉豪。」最後一個，似係有做運動嘅後生仔：「喺拔萃讀，入面嘅男徑校隊，你係屬咩嫁阿敏？」
「我？呃‧‧‧‧‧‧我屬虎。」阿敏答。
「你知唔知我屬咩啊？」嘉豪微微一笑，展現暖男般嘅笑容：「我屬於你。」
我同阿敏都不其然，內心打咗個打冷震。
緊接，佢哋一齊喺教會進行一啲不明禱告儀式、唱聖詩、分享心事同內心嘅畏懼。
成程阿敏同佢老豆臉上都冇帶半點笑容，而係覺得好悶就快要訓著嘅樣。
唯獨得佢母親係發自內心咁覺得開心而笑，從來喺佢屋企咁耐，都未見過佢阿媽笑得咁真。
上帝，你就係有依種能力令人歡笑同安全感‧‧‧
而我，就係為世人帶嚟悲傷同憎恨？
「憶悅‧‧‧有啲嘢，我想同你講。」上次俾我嚇個位阿嬸之一，有個想同阿敏母親單獨對話。
阿敏母親一開始有啲唔知點反應，不過都跟咗佢去教堂後方密談。
「咩事‧‧‧？」阿敏母親問。
「憶悅‧‧‧‧‧‧好耐冇見。」個位阿嬸感慨咁拍拍佢手臂。
「嗯‧‧‧的確好耐。」相比起阿嬸，阿敏母親已經算係保養得宜。
「你都有個女，我都已經有個仔‧‧‧」阿嬸好似有口難言：「其實，關於以前嘅事‧‧‧‧‧‧」
「‧‧‧」
「希望你唔好介意‧‧‧」
阿敏母親呆咗一陣，先答：「唔緊要，已經咁多年，已經咪又係咁過‧‧‧。」
兩個人行返去教堂大堂，似乎要進入最後一個禱告嘅儀式，阿敏母親就叮囑阿敏閂咗手機。
就係咁，佢閂咗同詹士溝通唯一嘅橋樑。
另一邊廂嘅詹士，佢一直憂心咁望住手機，一直望住個天發呆，得閒‧‧‧又拎起個結他彈幾下。
佢番對腳好開心。
但佢發現‧‧‧
根本就冇人同佢分享到依種喜悅。
開心嘅感覺，亦隨時間慢慢消耗‧‧‧‧‧‧
由一開始詹士跑跑跳跳，到後嚟越行越慢，佢發現自己真係好孤獨、好孤獨。或者一開始殘疾嘅佢，認為自己冇朋友都係正常，就算冇朋友身邊都好多陌生人關心佢。
依種感覺，令佢好難受。
「從頭到尾‧‧‧越嚟我都係自己一個‧‧‧」詹士喺屋企拎起枝酒嚟飲。
開始做番，佢生命逆天之前會做嘅事。
飲一枝，就有第二枝，詹士佢越飲越多酒。不同嘅係佢喺海旁一路行一路飲，多少都有啲享受腳步虛浮嘅感覺‧‧‧
望住大個海，佢終於明白到。
一直以嚟，並唔係因為自己殘疾而嬲而憤世嫉俗一切。
而係，身邊根本無一個可以隨意咁陪自己出街、有講有笑、傾下計嘅對象。
咁簡單嘅事，對詹士嚟講係一件困難。
諗到依到，佢就忍唔住伏低頭哭泣。
因為佢殘疾嘅身份，佢變得難以接近。
因為咁，佢變得孤獨。
阿敏既然成為走入佢內心世界嘅人，但佢依一刻卻好似唔存在咁‧‧‧搵極都搵唔到，距離詹士佢死亡嘅時間又越嚟越近‧‧‧‧‧‧
漸漸地，佢已經覺得一切都唔重要。
詹士，飲住酒麻醉住依一切。
儘管有咗一雙腿，都已經行不動。
我望一望錶，已經傍晚六點幾，係時候返去睇阿敏。佢個一邊似乎被阿媽睇得好實，場面亦都好莊嚴，身邊又坐住幾件不斷想溝嘅男仔，令到佢好難開到手機。
但最終，佢都係決定企喺身。
而所有本來虔誠禱告緊嘅人，都回頭望住佢‧‧‧‧‧‧
「我‧‧‧有啲事，要開一開手機先。」講完，阿敏就暫時離開教堂大堂，走咗出去。
一打開手機，佢就發現詹士搵咗佢好多次‧‧‧‧‧‧
阿敏亦即刻回撥俾佢，始終詹士約咗佢。
不過可惜，「嘟‧‧‧嘟‧‧‧嘟‧‧‧‧‧‧」嘅聲音一直傳播著，詹士佢並無接到電話。可能係太醉，可能係根本聽唔到，又或者係聽到都已經當聽唔到。
佢已經覺得唔重要，所以就開始用搖搖欲墜嘅腳步行番屋企。
一個自殺嘅人，就係會亂諗嘢。
打咗幾十次電話都唔通‧‧‧阿敏只好行返入教堂，繼續沉悶咁聽牧師說話。
阿敏一家就係咁，供奉咗全日時間俾教會。雖然睇落只有佢阿媽係開心，但阿敏就正好相反，塊臉又悶又苦澀。
「阿敏，好悶啊？」佢老豆行去佢身邊問。
「老豆‧‧‧‧‧‧我真係覺得浪費咗自己一日時間。」阿敏答。
「但係睇你阿媽，佢幾開心。」佢老豆淺淺一個笑容：「佢好似搵返某樣嘢咁，返到個家咁。」
「唉‧‧‧」
「我哋之後直落去食飯喎。」阿敏老豆說。
「係～」
緊接，阿敏佢哋同教會成員直落去到西貢一間海鮮酒家食飯。沿路上，嗰三個男仔雖然不斷糾纏阿敏，不過都不獲理會。
去到成班人坐埋一檯個陣，班後生仔嘅父母更加想撮合佢自己個仔同阿敏一切。
當然。容貌清秀、身材修長、運動讀書都名列前茅，冇不良嗜好、性格平易近人，又俾到人一種大姐姐嘅感覺，又邊對父母唔想自己個仔有依種女朋友？
一個讚自己個仔英國讀見識有幾廣、一個讚自己個仔網絡寫小說寫到出書有幾威、一個讚自己個仔讀名校入校隊。
令到阿敏父親都唔知點應好，只得隨便笑下回應。
「真係估唔到阿悅你生咗一個咁叻嘅女‧‧‧‧‧‧」一位教友感慨咁講。
「‧‧‧」阿敏母親合嘴微笑，但嘴角有啲隱悔。
「又係睇依啲嘢‧‧‧‧‧‧」低頭寂悶望住自己對腳嘅阿敏，不自覺細聲吐出依句。
咁啱，阿敏手機傳嚟一則訊息，佢望咗一望。
阿宏：「阿敏你都喺西貢？我好似喺間酒家見到你‧‧‧‧‧‧」
「阿宏‧‧‧？」阿敏佢左望右望，發現阿宏一家喺某個位置都咁啱食緊飯。
「係呢，咁大個應該拍咗拖啦？」一位阿姨問。
「未。」阿敏母親答。
「憶悅，阿敏佢係咪同你一樣都信教？」
「佢應該覺得好悶。」劉憶悅搖一搖頭。
「原‧‧‧原來你未拍拖嫁阿敏‧‧‧‧‧‧！？」Ricko聽到呢點，雙眼就幾乎發光：「你‧‧‧你上唔上嚟我屋企玩下貓，佢好可愛架‧‧‧同你一樣。」
「你叫Ricko？」阿敏望住佢。
「係‧‧‧？」
「我有男朋友。」阿敏立即望住我，做個口型：「死神‧‧‧！」
又想我現身？我索性喺佢轉頭望住我個刻，就自己轉身望向另一邊，扮見阿敏唔到。
見到咁，佢逼於無奈下立即覆阿宏訊息：「過一過嚟！」
阿宏見到就放低手上雙筷，慢慢咁行過嚟阿敏個張檯到，阿敏亦都企喺身搭住阿宏膊頭：「喂，又會喺到嘅你‧‧‧」
「吓‧‧‧你叫我‧‧‧‧‧‧」阿宏仲未知情況。
阿敏極速向佢眨眼。
「喔‧‧‧！喔喔‧‧‧‧‧‧喔喔喔！！我明啦。」阿宏望一望張檯嘅人，又望望阿敏，立即好大反應、好誇張咁講：「我嚟食飯渣嘛，阿敏！咁啱嘅？咁啱我住喺附近，你又咁啱上次漏咗一張A4紙喺我屋企未攞返，不如你依家嚟拎返呢？」
佢點頭：「喔‧‧‧好啊。」相比起阿宏，阿敏演技自然得多。
「阿媽阿爸‧‧‧各位，我走先，我份功課漏咗佢屋企，做唔哂升唔到班。」阿敏講完就搭住阿宏膊頭離開酒樓。